¹ Kawan panagis sukai anri ulun badusa hawi hamen nyanrengei Yesus. ² Balalu kawan ulun Farisi anri kawan panai Taurat mulai murumunyum, "Ulun yina narime kawan ulun badusa nelang kuman sinrah here." ³ Balalu Yesus ngesah rarapisan yina ma here, eau-Ni, ⁴ "Umpamani erang kaulun hingka naun naan malihara 100 kaukui babiri, balalu kawawaian isa kaukui, inun hanye puang sagar nanan 99 kaukui lainni hang padang rikut? himat hanye tulak ngantara sa wawai yiru hampe kahaba. ⁵ dami hanye haut kahaba, hanye sagar ngantung babiri yiru hang papaleni anri sanang atei. ⁶ Dami hampe lewu, hanye tulak manalu kawan hengauni anri ulun hang kawi kawan lewuni balalu kaeau, 'Hayu takam arai mihewu daya aku haut kahaba babiriku sa wawai.' ⁷ Aku kaeau ma hanyu, kala yiru pada hang surga naan kaaraien sa labis hante daya 1 kaulun badusa sa batobat na baning 99 kaulun sa haut maeh nelang puang parlu batobat. Rarapisan Duit Perak sa Wawai ⁸ Naan erang kaulun wawei sa baduit sapuluh kaping perak, amun hanye kawawaian isa kaping, inun puang palus nyamelum lampu balalu mapas lewuni, ngantara duit yiru bagamat hanpe kahaba. ⁹ Anri, amun hanye kahaba, hanye nerau kawan hengauni palus ulun hang kawi kawan lewuni nelang kaeau ma here,'Hayu takam arai mihewu daya aku haut kahaba sakaping duitku sa wawai yiru.' ¹⁰ Aku kaeua ma hanyu, kala yiru pada arai mihewu kawan maikat Alatalla dagana isa kaulun badusa sa batobat." Rarapisan Rueh Anak Upu Anak Bungsu Nanan Amahni ¹¹ Dami hiye yesus kaeau, "Naan erang kaulun amah sa ba anak rueh kaulun upu. ¹² Anak sa bungsu kaeau ma amahni, 'Amah, ami ma aku harata sa jari bagianku.' balalu, amahni mambagi panatauni ma karueh anakni. ¹³ Puang lawah udi hiye, anak sa bungsu yiru mangumpul katuluh bagian watni, balalu tulak ma nagara sa lawit. Hang yaru hanye mahamur-hamur duitni anri welum egah-emung. ¹⁴ hantek hanye haut nangalis urasni, hawi busung juju sa tamam hang nagara yiru, balalu hanye pada nuku welum paua. ¹⁵ Udi yiru, hanye tulak balalu bagawi hang unengan erang kaulun panduduk hang yiru, sa nunyu hanye ma ume nyaga kawan iwekni. ¹⁶ Hanye hamen tu'u ngisi wuntungni makai wua karob kutaen kawan iwek yiru, kude mahi erang kaulun jua sa ngami ma hanye. Anak Bungsu Mudi Nunung Amahni ¹⁷ Hantek anak bungsu yiru sadar, hanye kaeau, 'Hene kawan ulun sa bagawi baya hi amah kutaen here balabisan, kude aku hang yiti kai matei kalauan. ¹⁸ Aku kai mulekleh ma amahku. Aku sagar kaeau ma hanye: Amah, Aku haut badusa ma surga nelang hang hadapannu. ¹⁹ Aku puang lagi patut naantuh anaknu, elah aku jari erang kaulun upaannu.' ²⁰ Balalu, hanye minri palus tulak nunung amahni. Lagi lawit teka lewu, amahni haut nantau hanye anri kasungu nelang miahi, amahni nepat nahalu balalu maluk nelang nyiuk hanye. ²¹ Dami hiye, anak yiru kaeau ma amahni, 'Amah, aku haut badusa ma surga nelang hang hadapannu. Aku puang lagi patut na antuh anaknu.' ²² Kude, amahni yiru kaeau ma kawan palayanni, 'Hinang! Eneileh pama sa panga maenni palus tamu ma hanye. Tamu pada utas ma kingkingni anri sandal ma pe'eni. ²³ Balalu, enei ma yati anak sapi sa munuk palus samalis. Takam sagar kuman nelang arai mihewu, ²⁴ Dagana anakku sa haut matei, itati welum kamulek! Hanye haut wawai, itati haut haba!' balalu hare bapesta." Anak Taraulu Sangit ma Amahni ²⁵ "Hantek yiru, anak sa taraulu rahat hang ume, balalu tawuk hanye haut riet lewuni, hanye karengei lengan paluan andri tanrik tampak. ²⁶ Palus, hanye nerau erang kaulun teka kawan palayan yiru balalu nunti naan inun hang lewu yiti. ²⁷ Sangai palayan yiru ma hanye, 'Aninu haut hawi, balalu amahnu nyamalis anak sapi sa munuk, dagana hanye mulek anri salamat.' ²⁸ Kude, anak sa taraulu yiru sangit nelang puang hakun masuk balalu amahni kaluar ngatau hanye. ²⁹ Palus, hanye kaeau ma amahni, 'Bataun-taun aku haut bagawi ngarawah amah hampe puang suah nawan lengan amah, kude amah puang suah ngami aku erang kaukui kaming muda himpan aku tau bapesta anri kawan hengauku. ³⁰ dami, hantek anak amah yiru mudi udi nangalis harata amah baya kawan wawei pandayangan, amah nyamalis anak sapi sa munuk ma hanye.' ³¹ balalu, amahni nyangai ma hanye, 'Anakku, hanyu saratang naan hang yati baya aku, nelang katuluh watku yiru watnu pada. ³² Jari, andrau yina takam patut baperta arai mihewu dagana aninu yina haut matei, itati welum ka mulek; hanye haut wawai, kude itati haut haba.'"