¹ Yesus kaeau ma kawan murid-Ni, "Naan erang kaulun tatau sa makai bandahara. Balalu, ulun tatau yiru kaiuh kaduan amun bandaharani yiru ruyal andri haratani. ² Dagana yiru, ulun tatau yiru nerau bandahara anri kaeu, 'Inun sa rengeiku neu hanyu na? Ami partangungjawaben gawiannu daya hanyu puang tau lagi jari bandaharaku.' ³ Bandahara yiru palus bapikir, 'Inun sa sagar na ulahku daya itati tuanku haut nyantaduh aku hingka pagawianku? Aku puang kaule lagi mansangkul anri jari tukang laku sadakah aku amangan. ⁴ Aku karasa inun sa na ulahku himpan hantek aku na santaduh jari bandahara, kawan ulun tau narime aku hang lewu here.' ⁵ Balalu, hanye nerau kawan ulun sa naan utang ma tuanni. Ma sa palanungkai hanye kaeau, 'Pire utangnu anri tuanku?' ⁶ Ulun yiru nyangai, 'Jatuh balanai ilau jaitun.' Balalu, bandahara yiru kaeau ma hanye, 'Alapleh surat utangnu, maharung hinang balalu surat 50 balanai,' ⁷ Udi hiye bandahara yiru nunti ma sa lain, 'Pire hene utangnu?' Ulun yiru nyangai, 'Jatuh pikul gandum.' balalu bandahara kaeau ma hanye, 'Alapleh surat utangnu palus suratleh amun utangnu 80 pikul.' ⁸ Balalu ulun tatau yiru nawat bandahara sa puang jujur yiru daya ulahanni sa pintar yiru. Dagana, kawan anak dunia yena diwi pintar ngatur urusan anri sasamehni teka kawan anak sa welum hawuang piraai. ⁹ Aku kaeau ma hanyu, ulahleh bahengau anri panatau dunia sa puang maeh himpan hantek panatau dunia yiru galis, hanyu sagar na samut hang lewu kalalawahni. ¹⁰ Hie eleh sa satia hawuang kawan hal rumis, hanye pada satia hawuang kawan hal sa hante. Andri, hie eleh sa puang jujur hawuang kawan hal rumis, hanye pada puang jujur hawuang hal sa hante. ¹¹ Balalu, amun hanyu puang tau na parisaya ngatur harata duniawi, hie sa sagar ngami kaparisayaen ma hanyu ngatur panatau rohani? ¹² Nelang, amun hanyu puang tau na perisaya makai wat ulun lain, hie sa sagar ngami inun sa mustini jari watnu? ¹³ Mahi palayan sa tau malayani rueh tuanni daya hanye sagar muar ma tuanni sa isa balalu puang ma sa lainni. Atawa, hanye sagar diwi satia ma tuani sa isa teka ma sa lainni. Hanyu puang tau malayani Alatalla nelang ma harata bana pada." Piitungen ma Ulun Farisi ¹⁴ Kawan ulun Farisi, sa sinta duit, karengei hal yiru balalu ngakihi Yesus. ¹⁵ Yesus kaeau ma here, "Hanyu kawan ulun sa ngampi tu'u dirinu raerai hang hadapan murunsia, kude Alatalla karasa isi atei naun sa sabujurni, daya sa na angap amau hang helang murunsia na dinung ranah daya Alatalla. ¹⁶ Hukum sa na ajar daya Moses andri ajaran kawan nabi magun na ajar hampe jaman hi Yohanes; hingka jaman hi Yohanes, Kabar Maeh neu Karajaan Alatalla haut na ami nelang uras ulun ma maksa himpan masuk ma wuangni. ¹⁷ Kude sa tu'uni, diwi sutil langit anri tane na samawai teka ngumpe isa titik hawuang hukum Alatalla. Neu Sarak ¹⁸ "Uras ulun sa ngampi sarak daranganni balalu kawin anri wawei lain, hanye haut ibela. Nelang, ulun sa kawin anri wawei sa na sarak daranganni, pada ibela." Ulun Tatau anri hi Lazarus. ¹⁹ Naan erang kaulun tatau sa bapama haraga rarang urasni, nelang tiap andrau hanye welum dirak dirai hang wuang panatuni. ²⁰ Hang hadapan waanawang lewu ulun tatau yiru mangkading erang kaulun paua sa banganran hi Lazarus, sa tengani penu purat. ²¹ Hanye ngunu na ami kuman hingka tawurehan makuta sa lawu teka meja ulun tatau yiru; kawan antahu likan sa hawi nilap puratni. ²² Udi hiye, ulun paua yiru matei balalu na enei daya kawan malaikat ma pangkuan hi Abraham. Ulun tatau yiru pada matei balalu na pasar. ²³ Hang Tumpuk adiau, tawuk na siksa, ulun tatau yiru mihangut ma amau nelang kadinung hi Abraham hang uneng lawit andri hi Lazarus hang pangkuanni. ²⁴ Balalu, ulun tatau yiru nerau, 'Bapa Abraham, pi ahi aku, huyu hi Lazarus nyusup kingkingni ma ranu balalu nyamehu lelaku daya aku sangsara hang wuang apui yiti.' ²⁵ Kude, hi Abraham kaeau, 'Nak, itung hantek hanyu masih welum, hanyu haut narime kawan hal sa maeh, kude hi Lazarus narime kawan hal sa puang maeh; itati, hang yina hi Lazarus na ampi sanang, kude hanyu na siksa. ²⁶ Kamulek,hang helang takam naan labak sa lalem nelang laga himpan ulun teka yati puang tau ma yari kala hiye pada ulun teka yari puang tau mayati.' ²⁷ Balalu, ulun tatau yiru kaeau, 'Amun kala yiru, aku laku ma hanyu Bapa, utusleh hi Lazarus ma lewu amahku, ²⁸ dagana aku naan dime pulaksanai upu. Elah hi Lazarus ngampi itung here himpan diye here puang masuk ma uneng panyiksaan yena,' ²⁹ Kude, hi Abraham kaeau,'Hang here haut naan kawan Hukum Musa andri buku kawan nabi, elah here karasa hingka urasni yiru.' ³⁰ Eyau ulun tatau yiru nyangai, 'Puang, Bapa Abraham. Amun erang kaulun sa haut matei hawi ma here wau here sagar batobat.' ³¹ Sangai hi Abraham ma ulun tatau yiru, 'Amun kawan pulaksanainu puang nyanrengei Hukum Musa andri buku kawan nabi, here puang sagar tau parisaya, biar daya erang kaulun sa welum kamulek hingka helang ulun matei.'"