¹ Hang hinra anrau Sabat, Yesus hawi ma lewu erang kaulun pamimpin kawan ulun Farisi lepuh nguta ruti sinrah hanye balalu uras here naniuh Yesus. ² Tawuk yiru, naan erang kaulun sa wuah panyakit babadus minri hang hadapan-Ni. ³ Yesus kaeau ma kawan ulun Farisi anri kawan panai Taurat, "Inun iuh nyamare ulun hang anrau Sabat?" ⁴ Kude, here puang nyangai Hanye. balalu, Yesus negei ulun sakit yiru anri nyamare hanye palus nunyu ulun yiru tulak. ⁵ Yesus kaeau ma here, "Hie hingka naun amun anakni atawa sapini lawu ma wuang sumur hang anrau Sabat, puang palus ngenatni ma luar?" ⁶ Balalu, here jua puang tau nyangai lengan-Ni. Unengan Kahormaten ⁷ Dami hiye, Yesus mangesah isa rarapisan ma kawan tamu herawan hantek Hanye ninung kala awe here midi kawan unengan maharung sa panga maeh hang litar meja uneng makuta, eau-Ni ma here, ⁸ "Amun hanyu na herauan daya ulun ma isa pesta piaduan, ada hanyu maharung hang unengan sa panga maeh dagana sa ampun lewu yiru tau naan nerawan ulun sa labis tamam teka tenganu. ⁹ Balalu, ulun sa ampun lewu yiru sagar nunung hanyu nelang kaeau, 'Ami unengan maharungnu yiri ma ulun yina!' Balalu, hanyu jua musti miidar ma unengan sa panga murun palus kaingkam amangan. ¹⁰ Kude. amun hanyu na herauan, maharungleh hang unengan sa panga wading himpan hantek sa nerawan hanyu hawi, hanye sagar kaeua ma hanyu, 'Hengau, miidarleh ma unengan sa labis maeh.' Anri kala yiru, hanyu sagar kaiuh panghurmaten hang hadapan kawan ulun sa maharung kuman sinrah hanyu. ¹¹ Dagana, uras ulun sa ngampi amau tengani sagar na ampi ranah, kude hanye sa maranah tengani sagar na ampi amau." Herawan Kuman anri Walehan ¹² Balalu, Yesus kaeau ma ulun sa nerawan-Ni yiru, "Amun hanyu ngulah pesta kuman kaanrau atawa kuman kamalem, ada nerawan kawan hengau, pulaksanai, kawan kaluarga, atawa ulun tuhi kawi kawan lewu sa tatau daya here sagar iwaleh ma hanyu anri nerawan hanyu lepuh kuman sinra here. ¹³ Kude, amun hanyu ngulah pesta, herawanleh kawan ulun paua, kawan ulun cacat, kawan ulun lumpuh anri kawan ulun pehe. ¹⁴ daya, hanyu sagar na berkati dagadana kawan ulun yiti puang sagar kaiuh iwaleh ma hanyu lagi; hanyu sagar kaiuh walehanni hang tawuk kawan ulun bujur naele kamulek hingka pampatei." Rarapisan neu Herauan Pesta Kuman ¹⁵ Hantek erang kaulun hingka here sa kuman sinrah Hanye karengei kawan lengan yina, ulun yiru kaeau ma Hanye, "Naberkati ulun sa sagar kuman ruti hawuang Karajaan Alatalla." ¹⁶ Kude, eau Yesus ma ulun yiru, "Naan erang kaulun sa ngulah pesta kuman kamalem sa hante anri hanye nerauan ulun rama, ¹⁷ balalu hantek haut hampe wayah kuman kamalem, ulun yiru nunyu palayanni himpan kaeau ma kawan ulun sa haut na nerawan yiru, 'Hawileh, dagana urasni haut na sadia.' ¹⁸ Kude, katuluh tamu nerawan yiru mulai ngulah kawan alasan. Ulun sa palanungkai kaeau 'Aku wau midi erang ka lamar ume jari aku parlu mariksani. Tarimeleh pilakuan maafku.' ¹⁹ Sa lain kaeau, 'Aku wau midi dime pasang sapi jari aku parlu tulak mariksa kawan sapi yiru. Tarimeleh pilakuan maafku,' ²⁰ Sa lain lagi kaeau, 'Aku wau kawin. Dagana yiru, aku puang kaiuh hawi.' ²¹ Balalu, palayan yiru jua mulek andri iwara katuluhni ma tuanni. Tuan yiru sangit tu'u, balalu kaeau ma palayanni, 'wansit! kia ma kawan lalan andri ma tatiap gang hang tumpuk yina. Enei ma yati kawan ulun paua, kawan ulun lumpuh, kawan ulun kepa, andri kawan ulun pehe.' ²² Dami hiye, palayan yiru kaeyau ma hanye, 'Tuan, aku haut ngulah inung sa na huyunu, kude magun naan unengan sa lawang.' ²³ Tuan yiru kaeau ma palayanni, 'hulu tulak ma kawan lalan hante andri kawan lalan rumis. Enei kawan ulun sa naan hang yaru hawi ma yati himpan lewuku jari penu. ²⁴ Aku kaeau ma hanyu, puang erang kaulun jua hingka here sa na herawanku sahuanni yiru sagar ka ingkam kutaen pestaku.'" Neu Uma Yesus. ²⁵ Hene ulun takia sinrah Yesus. Balalu Yesus ngulik ma hare andri kaeau, ²⁶ "Amun erang kaulun hawi nunung Aku kude puang muar ineh anri amahni, darangan anri kawan anakni, pulaksanai upu anri pulaksanai waweini, diwi likan anri pamelumni, hanye puang tau jari murid-ku. ²⁷ Hie jua sa puang ngantung balasangarni balalu uma Aku, hanye puang tau jari murid-Ku ²⁸ Hie hingka naun sa hamen ngapinri isa manara, kude puang maharung nyanreken biayani dahulu himpan karasa inun sukup duitni pakai nanyarini? ²⁹ Amun puang kala yiru, hantek hanye haut ngulah pundasi balalu hanye puang sangup nanyarini, katuluh ulun sa kadinung sagar ngakihi hanye. ³⁰ Kawan ulun yiru sagar kaeau, 'Ulun yiru haut mambangun, kude hanye puang kaiuh nanyarini.' ³¹ Atawa, raja sa awe sa sagar tulak baparang nawan raja lain kude puang maharung labis dahulu ngakira inun hanye anri 10.000 tantarani kaiuh nawan musuhni sa ba jumalah 20.000 tantara? ³² Amun hanye puang kaiuh ngampi talau raja sa lain yiru, batantu hantek pasukan musuhni lagi lawit hanye sagar ngirim erang kaulun utusan himpan nunti kawan syarat ba damai. ³³ Kala yiru pada anri naun, puang sunah erang kaulun hingka naun sa kaiuh jari murid-Ku amun hanye puang nyarah ala katantuluhni." Rangi sa Mapahe Mahi Riranni. ³⁴ "Rangi yiru maeh, kude amun rangi yiru haut kawawaian nanam erangni, kala awe jua ngampulek himpan maerang lagi? ³⁵ Rangi yiru hampe puang tau lagi na pakai hang ume atawa jari pupuk ekat tau na umpe daya ulun. Hie sa naan silu pakai nyanrengei, elahleh hanye nyanrengei!"