¹ Hang yiru, naan papire kaulun sa iwara ma Yesus neu kawan ulun Galilea sa irani na sampur daya hi Pilatus andri sarahan parapah here. ² Sangai Yesus ma here. "Inun hanyu minda kawan ulun Galilea yina labis ba dosa nabaning kawan ulun Galilea lainni daya here mandarita ialah yiru? ³ Aku kaeau ma hanyu, puang. Kude, amun hanyu puang batobat, hanyu uras pada sagar matei. ⁴ Pada kala awe anri ka walu walas kaulun sa matei, tawuk manara hang rupak sumur Siloam lawu palus meat here, inun indanu here kawan pandosa sa labis murun na baning uras ulun sa muneng hang Yerusalem? ⁵ Aku kaeau ma hanyu, puang. Kude, amun hanyu puang batobat, hanyu katuluh pada sagar matei. Kakau sa Puang Mua ⁶ Yesus pada mangesah rarapisan yina: "Erang kaulun sa naan isa ka rapun kakau ara sa na amule hang kabun angurni. Kude, tawuk hanye hawi kai ngantara wua hang kakau yiru, hanye puang ka haba. ⁷ Balalu, hanye kaeau ma tukang kabunni, 'Haut telu taun aku hawi ngantara wua hang kakau ara yina, kude aku huan suah ka haba sunah isa. Tewengleh kakau yiru! Ma inun manyia-nyia tane ma kakau yiru?' ⁸ Palus, tukang kabun yiru nyangai, 'Tuan, elahni hanye welum erang taun lagi himpan ba wua, elah aku ngadi tane hang kulilingni palus ngami pupukni, ⁹ gare kakau yiru tau mua taun hadap. Amun puang mua jua, Tuan tua neweng kakau yiru.'" Yesus Nyamare hang Anru Sabat ¹⁰ Isa katika, Yesus ngajar hang sinagoge hantek anru Sabat. ¹¹ Hang yaru naan erang kaulun wawei sa karasukan ruh hampe ngulah hanye sakit salawah walu walas taun. pungung wawei yiru bungkuk hampe puang kaiuh mindri kansang. ¹² Hantek Yesus kadinung, Hanye nerau wawei yiru anri kaeau, "U wawei, hanyu haut na bebaskan hingka panyakitnu." ¹³ Balalu, Yesus ngenat tangan-Ni ma wawei yiru palus sakatika yiru jua, hanye kaiuh minri kansang nelang nawat Alatalla. kude, pamimpin sinagoge yiru jari sangit dagana Yesus nyamare hang anrau Sabat. Hanye kaeau ma ulun rama, "Naan enem anrau pakai bagawi. dagana yiru. hawileh himpan na samare hang kawan anrau yiru, puang hang anrau Sabat." ¹⁵ Balalu, Tuhan nyangai ulun yiru,"Hanyu kawan ulun sa papura maeh! Padahal hanyu uras nepah sapi anri keledai wat naun hingka kanang balalu ngenei ma luar ngami ranu u'ut hang anrau Sabat? ¹⁶ Daya yiru, inunkah wawei yina, erang kaulun katurunan hi Abraham sa haut na huruk salawah walu walas taun daya Setan, pada puang iyuh na lapas hurukan yiru hang anrau Sabat?" ¹⁷ Tawuk Yesus kaeua kala yiru, uras kawan ulun sa nawan Yesus amangan tatu'u, balalu ulun rama sanang atei anri katuluh kaajaiben sa haut na ulah-Ni. Rarapisan Diki Sasawi anri Ragi ¹⁸ Dami hiye, Yesus kaeau, "Ialah inun Karajaan Alatalla yiru? Anri inun Aku kaiuh mararapisanni? ¹⁹ Karajaan Alatalla yiru ialah diki sasawi sa na alap ulun palus na amule hang kabunni; diki yiru welum jari kakau, balalu kawan wurung ngulah hanaini hang kawan raanni." ²⁰ Palus Hanye kaeau, "Makai inun Aku mararapisan Karajaan Alatalla? ²¹ Karajaan Alatalla yiru ialah ragi sa na alap erang kaulun wawei palus na sampurni andri 3 supak tepung hampe uras adonan yiru bakah." Ekat Butit sa Nasalamat ²² Yesus malupui kawan tumpuk, Hanye ngajar pada palus takia nuju Yerusalem. ²³ balalu, erang kaulun nunti ma Hanye, "Tuhan, inun ekat butit ulun sa nasalamat?" Yesus kaeua ma here katuluh, ²⁴ "Bausahaleh himpan kaiuh masuk mitah waanawang sa hipit; daya Aku kaeu ma hanyu, hene ulun sa bausaha masuk ma yaru, kude here puang sagar tau. ²⁵ Amun sa ampun lewu minri anri nutup waanawang lewuni, padahal hanyu hang luar nelang nalitik waanawang palus kaeau, 'Tuan,karawah uka waanawang ma kami.'Hanye sagar nyangai, 'Aku pakarasa hingka awe pihawiannu.' ²⁶ balalu, hanyu sagar nyangai, 'Kami haut kuman nelang nguut sindrah Hanyu. Hanyu haut ngajar hang kawan lalan tumpuk kami.' ²⁷ Kude, Hanye nyangai, 'Aku puang kataru hanyu nelang puang karasa hingka awe asalnu. Tulakleh hingka hadapan-Ku, naun uras panjahat!' ²⁸ Hanyu sagar nungkau nelang mangaratak dipen hantek ninung hi Abraham, hi Ishak, andri hi Yakub, sinrah katuluh nabi naan hawuang Karajaan Alatalla padingian hanyu na tawut ma luar. ²⁹ balalu, kawan ulun sagar hawi hingka timur anri barat, anri pada hingka utara anri selatan. Here sagar maharung palus kuman hang wuang Karajaan Alatalla. ³⁰ Tatuuni, kawan ulun sa hanrian sagar jari sa panga dahulu nelang kawan ulun sa panga dahulu sagar jari sa hanrian." Yesus Musti ma Yerusalem ³¹ Hang katika yiru, papire ulun Farisi hawi ma Yesus nelang kaeau, "Tulakleh, tanan unengan yina daya hi Herodes kai munu Hanyu." ³² Yesus nyangai here,"Hulu tunung palus wara ma srigala yiru, 'Anrau yina anri keuni, Aku sagar ngusir kawan ruh murun palus nyamare ulun, nelang hang anrau karuan, Aku sagar nanjari pagawian-Ku.' ³³ Kude, Aku musti nampalus pakiaan anrau yina, keuni, anri karuan daya puang mungkin erang kaulun nabi matei hang luar Yerusalem. ³⁴ Yerusalem, Yerusalem! Hanyu munu kawan nabi anri medak makai watu hampe matei kawan ulun sa na utus ma hanyu! Papire kali Aku kasungu ngaeh kawan anaknu, sameh ialah manu paunan sa ngumpul kawan anakni hang kapit elatni. Kude, hanyu puang hakun. ³⁵ Itati lewunu sagar na ampi lawang palus jari suni. Aku kaeau ma hanyu, hanyu puang sagar ninung Aku lagi hampe wayahni yati hanyu kaeau, 'Naberkati Hanye sa hawi hawuang ngaran Tuhan!'''