¹ Padingian yiru, hantek baribu kaulun bakumpul hampe naan sa tararah, Yesus baduhulu kaeau ma kawan muridni, "mamaeh anri ragi kawan ulun Farisi, hanye yiru papura maeh. ² Daya, uras sa na tutup sagar na uka anri uras sa na dina sagar na tantarang. ³ Dagana yiru, inun sa na pantanenu hang unengan maieng sagar na rengei hang unengan maraai anri sa na kenehnu hang wuang elet sagar na wara hang amau kawan hapaw lewu. Takut ma Alatalla. ⁴ Aku kaeau ma hanyu, u kawan hengau-Ku, ada hanyu takut anri here sa ekat tau munu tenga, udi yiru puang tau lagi ngulah labis teka yiru. ⁵ kude, Aku hamen ngampi itung hanyu neu hie sa patut na takutnu; Takutleh ma Hanye, sa haut munu, pada bakuasa nawut hanyu ma wuang naraka. Bujur, Hanye yiru sa patut na takutnu. ⁶ dime ka ukui wurung angkarei naari ekat ba haraga 2 kaping ai? Kude, mahi erang ka ukui jua hingka kawan wurung yiru sa puang na itung hang hadapan Alatalla. ⁷ labis likan, jumalah wulu hang ulunu pada haut na reken. Ada takut, hanyu labis baharaga hingka heneni wurung angkarei." Ngampi Itung ma sa Ngidim Yesus ⁸ "Aku kaeau ma hanyu, tiap ulun sa mangakui Aku hang hadapan ulun lain, pada sagar na akui daya Anak Murunsia hang hadapan kawan malaikat Alatalla. ⁹ kude, tiap ulun sa ngidim Aku hang hadapan ulun lain pada sagar na idim hang hadapan kawan malaikat Alatalla. ¹⁰ Anri, hie jua sa ngantuh inun eleh sa nawan Anak Murunsia tau na ampunni, kude hie eleh sa mahujat Ruh Barasis puang sagar na ampunni. ¹¹ Hantek here ngenei hanyu ma sinagoge anri ma hadapan kawan pamimpin anri panguasa, ada khawatir neu kala awe hanyu mambela dirinu atawa inun sa musti na pantanenu, ¹² dagana tawuk yiru jua Ruh Barasis sagar ngajar ma hanyu neu inun sa musti na pantanenu." Rarapisan neu Erang Kaulun Tatau ¹³ Erang kaulun hingka helang ulun rama yiru kaeau ma Yesus, "Guru, huyu pulaksanaiku himpan babagi warisan anri aku." ¹⁴ Kude, Yesus kaeau ma hanye, "Pulaksanai, hie sa ngangkat Aku jari Hakim atawa pang hubung ma hanyu?" ¹⁵ Balalu, Yesus kaeau ma here, "Bajaga nelang waspada ma katuluh masam kasarakahen daya welum murunsia puang bagantung hingka panatauni." ¹⁶ balalu, Yesus nyarita rarapisan ma here, "Naan tane wat erang kaulun sa tatau tu'u sa kaiuh hene tu'u hasil wasian. ¹⁷ jari, ulun yiru bapikir hawuang ateini, 'Kala awe akuna daya mahi lagi unenganku nyimuh hasil wasianku?' ¹⁸ balalu, hanye kaeau, 'Ina sa kai na ulahku. Aku hamen ngungkar kawan tabilungku palus ngulah sa labis hante. Hang yiru, unenganku nyimuh uras pareiku amput kawan parabutku. ¹⁹ Balalu, aku kaeau ma amirueku, 'u amirueku, hanyu naan hene harata simuhan pakai bataun-taun; istirahatleh, kuman, nguut, anri basanang-sanangleh!' ²⁰ Kude, Alatalla kaeau ma ulun yiru, "U ulun lunga! Malem ina pada, amiruenu sagar na alap hingka tenganu. balalu,hie sa sagar ampun kawan harata sa simuhnu yiri?' ²¹ Kala yiru panyarini ma ulun sa nyimuh panatau ma tengani raerai, kude puang tatau hang hadapan Alatalla," Ada Khawatir ²² Yesus kaeau ma kawan murid-Ni,"Sabab yiru, Aku kaeau ma hanyu, ada khawatir neu welumnu, neu inun sa sagar na kutanu. Atawa, khawatir neu tenganu, neu inun sa sagar na pakainu. ²³ Daya, pamelum diwi hingka makuta andri tenga diwi hingka pama pundrat. ²⁴ dinungleh kawan wurung ekak. Here puang ngamule atawa masi, here jua mahi gudang atawa tabilung, kude Alatalla ngami here makuta. Hanyu diwi baharaga na baning kawan wurung yiru. ²⁵ Hie hingka naun sa dagana khawatir tau namah sunah erang hasta ai ma umur welumnu? ²⁶ amun hanyu puang tau ngulah kawan hal sa rumis yina, ma inun hanyu khawatir anri kawan hal sa lain? ²⁷ Suba na parhati wunge bakung, kala awe welumni. Kawan wunge yiru puang bahimat bagawi puang pada nawai, kude Aku kaeau ma hanyu, aji hi Salomo hawuang panatauni sika puang makai pama kala kaeh kawan wunge yiru. ²⁸ Amun Alatalla ma hias rikut hang ume, sa andrau yina welum balalu keuni na umpe ma wuang apui, diwi likan Hanye ma hias hanyu labis hingka rikut yiru? U, hanyu sa kurang parsaya! ²⁹ jari, ada hanyu ngantara inun sa sagar na kutanu atawa inun sa sagar na u'utnu, nelang ada khawatir. ³⁰ Dagana, kawan bangsa hang dunia uras ngantara yiru, kude Amahnu karasa amun hanyu mamarluni. ³¹ ware, antaraleh dahulu Karajaan Alatalla, die urasni yina pada na tamah ma hanyu." Mangumpul Harata hang Surga ³² "Ada takut, U kawan kalumpuk sa rumis, daya Amahnu basadia ngami ma hanyu karajaan yiru. ³³ Arileh katuluh sa watnu palus ami ma sadakah. Ware ulah ma hanyu kadut duit sa puang tau rusak, hanye yiru harata hang surga sa puang tau wawai, sa puang tau na alat maling atawa na rusak gagat. ³⁴ daya, hang awe unengan haratanu, hang yiru pada unengan ateinu. Palayan sa Satia Ngaraja Tugasni. ³⁵ Elahleh pingangnu tatap na awet andri kawan lampunu tatap maraai. ³⁶ Jarileh ialah kawan ulun sa ngandrei tuanni mudi hingka unengan ulun piadu himpa here tau wansit nguka waanawang ma hanye, hantek tuan yiru mudi nelang nalitik waanawang. ³⁷ Na berkati kawan palayan, sa nadinung tuanni ba siap sadia, hantek hanye hawi. Aku kaeau ma hanyu, sabujurni hanye sagar ngawet pingangni himpan ngurus nelang nunyu kawan palayanni maharung kuman. Hanye kai hawi palus ngurus here. ³⁸ Amun tuan yiru hawi tawuk penah malem atawa dami hari nelang kadinung here rahat ngulah gawi iyalah yiru, na berkati here! ³⁹ Kude himpan na karasa, amun erang kaulun sa ampun lewu karasa pukul pire maling kai hawi ma lewuni, hanye himat puang hakun maladar lewuni na bungkar maling. ⁴⁰ Dagana yiru, hanyu jua parlu basiap daya anak murunsia sagar hawi hang wayah sa puang na pinda dayanu." ⁴¹ Udi hiye, hi Petrus nunti ma Hanye, "Tuhan, inun Hanyu mangesah rarapisan yina ekat ma kami atawa ma uras ulun pada?" ⁴² Sangai Tuhan, "Hie pamimpin palayan sa satia nelang maharati sa na parisaya tuanni pakai ngawas kawan palayan salain, pakai ngami here kuman hang wayahni kuman? ⁴³ Na berkati palayan yiru, sa hantek tuanni hawi hanye ganyah ngulah gawianni. ⁴⁴ Aku kaeau ma hanyu, sabujurni, tuan yiru sagar midi hanye pakai nyaga katuluh haratani. ⁴⁵ Kude, amun palayanni yiru kaeau hawuang ateini, 'Tuanku puang sagar hinang hawi,' balalu mulai ngakasah palayan upu anri palayan wawei lainni, udi hiye kuman palus nguut hanpe mahamui, ⁴⁶ hantek tuanni hawi hang wayah sa puang na pinda nelang puang na karasa daya palayan yiru, hi tuan sagar munu palayan yiru nelang nganak hanye baya anri kawan ulun sa puang satia. ⁴⁷ Erang kaulun palayan sa karasa kabahumen tuanni, kude puang basiap sadia atawa ngulah ialah kabahumen tuanni sagar kaiuh hene tamparan. ⁴⁸ kude palayan sa puang kataru inun sa na aheng tuanni kude ngulah kawan hal sa patut kaiuh tamparan, hanye sagar kaiuh tamparan sa puang hene. Ma tiap ulun sa na ami hene, na laku pada hene. Anri, here sa na parisaya labis hene sagar na laku pada labis hene lagi. Yesus Ngulah Watas. ⁴⁹ Aku hawi lepuh medak apui ma dunia, nelang Aku baharap apui yiru haut malelap! ⁵⁰ Kude, naan babtisan sa na ulahku, anri Aku ka ingkam hante tu'u tekanan hampe hal yiru na tampalus. ⁵¹ Inun hanyu minda amun Aku hawi lepuh ngenei pikaeh hang amau dunia? Puang, Aku kaeau ma hanyu, hanye yiru pibaburan! ⁵² Nuku teka itati, dime kaulun hang wuang isa kaluarga sagar na pisah. Telu kaulun sagar nawan rueh kaulun anri rueh kaulun sagar nawan telu kaulun. ⁵³ Here sagar na pisah; Amah sagar nawan anak upuni, anri anak upu sagar nawan amahni. Ineh sagar nawan anak waweni, anri anak wawei sagar nawan inehni. Kasian wawei sagar nawan nantu waweini, anri nantu wawei sagar nawan kasian waweini." Mantaru Siri Jaman ⁵⁴ Balalu, Yesus kaeau ma ulun rama, "Hantek hanyu ninung awan bakumpul hang tuhi barat, hanyu palus kaeau, 'Uran sagar minau.' balalu uran tatu'u minau. ⁵⁵ hantek hanyu kaingkam angin nyiwui hingka selatan, hanyu kaeau, 'anrau yina sagar mehet kai,' balalu hal yiru tatu'u tajadi. ⁵⁶ Hanyu ulun sa papura! Hanyu tau mantaru wangun langit anri tane, kude daya inun hanyu puang tau mantaru jaman yina?" ⁵⁷ "Daya inun hanyu raerai puang tau mamutus inun sa bujur? ⁵⁸ Hantek hanyu tulak sinrah musuhnu kai mahadap pamarentah, kakalileh himpan ngampi beres parkaranu anri hanye hang penah pakiaan himpan hanye puang mait hanyu ma hakim dagana hakim sagar nyarah hanyu ma pangawal, balalu pangawal yiru sagar nawut hanyu ma wuang panjara. ⁵⁹ Aku kaeau ma hanyu, hanyu puang sagar kaluar hingka yaru sahuan na wayat katuluh utangnu."