¹ Hantek Yesus takia, Hanye nantau erang kaulun sa pehe' teka hanye nakayaan. ² Kawan murid Yesus kaeyau ma Hanye, "Guru, hie sa badusa, ulun yina atawa ulun matuehni hampe hanye na pehe' teka hanye nakayaan?" ³ Yesus kaeyau, "Puang hanye atawa ulun matuehni sa badusa, kude daya hampan kawan pigawian Alatalla jari hang wuang hanye. ⁴ Takam harus ngaraja kawan pigawian teka Hanye sa nunyu Aku salawah anrau masih mara'ai; daya amun maiyeng kamalem haut hawi mahi erang kaulunpun sa tau bagawi. ⁵ Salawah Aku masih hang dunia, Akuleh pira'ai dunia." ⁶ Udi bapanner kalayiru, Yesus nura ma tane balalu ngalut tane baya ruraNi ru huni, udi hie malitni ma mate ulun yiru, ⁷ nelang kaeyau, "Hulu hanyu tulak, wu'i tenganu hang kolam Siloam." Siloam aratatini "sa na huyu". Balalu ulun yiru tulak, mu'i tengani, hanye mulek nelang haut tau kadinung. ⁸ Kawan tatangga anri kawan ulun sa lanani nantau hanye hantek masih pehe' kaeyau, "Angneh hanye na sa lanani maharuk anri laku piahi?" ⁹ Mehe' ulun kaeyau, "Hiai, hanye na ulun sa laku piahi ru." Sa lainni lagi kaeyau, "Puang, hanye na sarupa ai anri ulun sa laku piahi ru." Kude, ulun sa sahuanni pehe' ru huni kaeyau, "Aku ina ulun sa laku piahi iru." ¹⁰ Balalu, kawan ulun yiru nunti ma hanye, "Kalaawe sarani salenga matenu tau kadinung?" ¹¹ Ulun yiru kaeyau "Erang kaulun sa bangaran Yesus ngalut tane udi hie malitni ma mateku. Balalu, Hanye kaeyau ma aku, 'Hulu tulak ma Siloam wu'i tenganu hang yiru', jari aku tulak palus mu'i tengaku hang yiru balalu aku tau kadinung." ¹² Here nunti ma hanye, "Hang awe sa Ulun yiru?" Eyauni, "Aku puang karasa." ¹³ Balalu, here ngennei ulun sa mulani pehe' yiru ma kawan ulun Farisi. ¹⁴ Anrau katika Yesus ngalut tane anri nyamare ulun yiru hanye yiru anrau Sabat. Kawan ulun Farisi hinra lagi nunti ma ulun yiru kalaawe hanye tau kadinung. Hanye kaeyau ma here, "Hanye malit tane sa na kalutni ma mateku, udi hie nunyu aku mu'i tengaku balalu aku tau kadinung." ¹⁶ Daya yiru, papire ulun Farisi kaeyau, "Ulun yina puang teka Alatalla daya Hanye puang nu'u aturan anrau Sabat." Sa lain kaeyau, "Kude, kalaawe tau orang kaulun sa badusa ngaraja siri ajaib kalayina?" Balalu here ridu sasameh here. ¹⁷ Here nunti kamulek ma ulun sa pehe' yiru, "Manurut hanyu hie Hanye yiru sa haut ngulah hanyu kadinung?" Ulun yiru kaeyau, "Hanye erang kaulun Nabi." ¹⁸ Kawan ulun Yahudi yiru puang harap anri hanye, amun hanye yiru sa mulani pehe' balalu tau kadinung, hampe here nerau ulun matuehni. ¹⁹ Balalu nunti ma here, "Tu'u sah hanye na iya naun, sa pehe' teka hanye nakayaan? Kalaawe salenga hanye na tau kadinung?" ²⁰ Ulun matuehni kaeyau, "Hanye na tu'u iya kami sa pehe' teka hanye nakayaan, ²¹ kude kalaawe hanye tau kadinung kami puang karasa; atawa hie sa nyamare hanye kami puang karasa. Tunti raerai anri hanye, daya hanye haut hante; hanye tau bapaner ne'u dirini raerai." ²² Ulun matuehni iwara kalayiru daya here takut anri kawan ulun Yahudi. Daya kawan ulun Yahudi yiru haut pakat, tiap ulun sa mangaku Yesus yiru Kristus, hanye sagar na sanina teka sinagoge. ²³ Yiru panyababni here kaeyau, "Hanye haut hante, tunti raerai ma hanye." ²⁴ Balalu, ma karueh kalini kawan ulun Yahudi nerau ulun sa mulani pehe' yiru nelang bapaner ma hanye, "Ami' pihante ma Alatalla, kami karasa Ulun yina badusa." ²⁵ Hanye kaeyau, "Ulun ina badusa atawa puang, aku puang karasa; isa hal sa aku karasa, kapihuan ina aku pehe', kude taati aku haut kadinung." ²⁶ Here nunti ma hanye, "Inun sa na ulahNi nadap hanyu? Kalaawe Hanye tau ngulah hanyu kadinung?" ²⁷ Hanye kaeyau ma here, "Aku haut iwara ma naun, kude naun puang hakun nyanrengei; ma inun naun hamen nyanrengeini lagi? Inun sah naun na hamen jari muridNi pada?" ²⁸ Balalu here mahina hanye nelang kaeyau, "Hanyu yiri sa murid Ulun yiru, kami na kawan murid hi Musa. ²⁹ Kami karasa amun Alatalla haut bapaner ma hi Musa, ne'u Ulun yiru, kude kami puang karasa teka awe asalNi!" ³⁰ Ulun yiru kaeyau ma here, "Tu'u sa mudel amun naun puang karasa teka awe asalNi, padahal Hanye haut ngulah aku kadinung. ³¹ Takam karasa amun Alatalla puang nyanrengei ulun badusa, kude hieleh sa takut ma Alatalla nelang ngaraja ahengNi, Alatalla himat nyanrengei hanye. ³² Teka jaman sadi hurap hampe taati, mahi erang kaulunpun tau ngulah ulun sa pehe' teka hanye nakayaan balalu tau kadinung. ³³ Amun Ulun yiru puang teka Alatalla, Hanye puang sagar tau ngaraja hal yiru." ³⁴ Kawan ulun Yahudi yiru kaeyau ma hanye, "Hanyu nakayaan penu' anri dusa, hanyu hamen ngajar kami?" Balalu here nunyu ulun yiru tulak. ³⁵ Yesus karengei amun kawan ulun Yahudi yiru nunyu ulun pehe' yiru tulak; hantek Yesus panalu anri hanye, Yesus kaeyau, "Hanyu parisaya baya Iya Murunsia?" ³⁶ Ulun yiru kaeyau, "Hie sah Hanye yiru, Tuhan, hampan aku parisaya ma Hanye?" ³⁷ Yesus kaeyau ma hanye, "Hanyu haut nantau Hanye. Hanye sa rahat bapaner anri hanyu yina." ³⁸ Ulun yiru kaeyau, "Tuhan, aku parisaya!" Balalu, hanye suruk sammah hang hadapanNi. ³⁹ Yesus kaeyau, "Ne'u mahakimi Aku hawi ma dunia yena hampan here sa puang kadinung, tau kadinung anri here sa kadinung jari pehe." ⁴⁰ Papire ulun Farisi sa naan manriung Hanye nyanrengei hal yiru nelang kaeyau ma Hanye, "Inun sah kami na pada pehe'?" ⁴¹ Yesus kaeyau ma here, "Amun naun puang pehe', naun puang badusa; Kude daya naun kaeyau ,'Kami kadinung', naun badusa."