¹ Yesus kaeyau, "Anri kapinu'uni, Aku iwara ma naun, ulun sa masuk ma kannang babiri puang mitah wanawang, kude mitah lalan lain, ulun yiru erang kaulun pangalat anri parampok. ² Kude ulun sa masuk mitah wanawang, hanye yiru pakatik babiri. ³ Ma hanye, ulun sa jaga hang wanawang nguka wanawang yiru, kawan babiri nyanrengei lenganni, balalu hanye nerau isa-isa ngaran here nelang ngennei here ma luar. ⁴ Udi ngaluar katuluh babiri yiru, hanye takia badahulu balalu kawan babirini ngarairing hang wadingni daya here kataru anri lenganni. ⁵ Ulun lain puang sagar here ngarairing pada ngulah here nempat daya here puang kataru anri lengan kawan ulun lain yiru. ⁶ Rarapisan yena na wara daya Yesus ma here, kude here puang kataru inun sa na wara daya Yesus yiru. ⁷ Daya yiru, Yesus kaeyau lagi ma here, "Kapinu'uni, Aku iwara ma naun, Akulah wanawang nuju kawan babiri yiru. ⁸ Katuluh ulun sa hawi sa huan Aku iru pangalat anri parampok, kude kawan babiri puang nyanrengei lengan here. ⁹ Aku yina wanawang. Amun erang kaulun masuk mitah Aku, hanye sagar na salamat, nelang kaluar masuk kahaba padang rikut. ¹⁰ Pangalat hawi ne'u ngalat, munnu anri nyampatei; Aku hawi hampan here welum hang wuang pisukup. ¹¹ Aku yina pakatik sa maeh; pakatik sa maeh ngami welumNi ma kawan babiriNi. ¹² Erang kaulun sa na upa', puang erang kaulun pakatik, sa puang baisi kawan babiri yiru, dami nantau serigala hawi, hanye nempat nanan kawan babiri yiru, balalu serigala nguta nelang misah kawan babiri yiru. ¹³ Hanye nempat daya hanye ekat erang kaulun upaan sa puang ngurus kawan babiri yiru. ¹⁴ Aku yina pakatik sa maeh. Aku kataru anri kawan babiriKu nelang kawan babiriKu pada kataru anri Aku ¹⁵ sameh iyalah Alatalla Ammah kataru Aku kalairu pada Aku kataru Alatalla Ammah; nelang Aku ngami pamelumKu ma kawan babiriKu yiru. ¹⁶ Aku pada baisi kawan babiri lain sa puang teka kannang yina; Aku pada ngennei here nelang here pada kataru anri lenganKu; here sagar jari kumpulan hante babiri anri isa pakatik. ¹⁷ Daya yiru Alatalla Ammah sinta anri Aku, daya Aku ngami pamelumKu hampan Aku tau ngalapni kamulek. ¹⁸ Mahi erang kaulunpun sa ngalapni teka Aku kude Aku sa ngamini makai ahengKu raerai. Aku bahak ne'u ngami pamelumKu, anri Aku pada bahak ne'u ngalapni kamulek. Ina parentah sa na tarimeKu teka Alatalla AmmahKu." ¹⁹ Kamulek, naan ridu rareh hang penah kawan ulun Yahudi daya eyauan Yesus yiru. ²⁰ Wahai teka here kaeyau, "Hanye na rasuk ruh alamurun balalu rapui. Daya inun naun hakun nyanrengei Hanye?" ²¹ Sa lain kaeyau, "Iru puang piwaraan ulun sa na rasuk ruh alamurun. Kaiyuh sah ruh alamurun nyamare ulun pehe?" ²² Katika yiru, anrau hante Penahbisan hang Yerusalem. Hantek musim marisak, ²³ Yesus rahat takia hang Lewu Alatalla, hanye yiru Lalaya Salomo. ²⁴ Kawan ulun Yahudi bakumpul manriung Hanye balalu here kaeyau ma Hanye, "Pire lawah lagi Hanyu maladar amirue kami na bemmang? Amun Hanyu ri Kristus, wara ma kami sa kapinu'uni." ²⁵ Yesus kaeyau ma here, "Aku haut iwara ma naun, kude naun puang parisaya. Kawan pigawian sa na ulahKu hang wuang ngaran Alatalla AmmahKu, yirulah piwaraan ne'u Aku. ²⁶ Naun puang parisaya daya naun puang masuk baris kawan babiriKu. ²⁷ Kawan babiriKu nyanrengei lenganKu, Aku kataru anri here nelang here pada umma ma awe Aku. ²⁸ Aku ngami pamelum ma kalalawahni ma here, nelang here puang sagar tau matei; mahi erang kaulunpun sa kaiyuh nyiau here teka Aku. ²⁹ Alatalla AmmahKu sa haut ngami here ma Aku, lawit labis hante teka katuluhni, nelang mahi erang kaulunpun sa kaiyuh nyiau here teka Alatalla Ammah. ³⁰ Aku baya Alatalla Ammah yiru isa." ³¹ Hinra lagi, kawan ulun Yahudi ngalap watu pakai medang Yesus. ³² Kude, Yesus kaeyau ma here, "Aku haut nantarang ma naun wahai pigawian maeh teka Alatalla Ammah, pigawian sa awe sa ngulah naun salenga hamen medak Aku makai watu?" ³³ Kawan ulun Yahudi yiru kaeyau ma Hanye, "Puang daya hal pigawian maeh kami hamen medak Hanyu makai watu, kude daya hujat; Hanyu erang kaulun murunsia, mangaku Hanyu yiri Alatalla Ammah." ³⁴ Yesus kaeyau ma here, "Angneh naan na surat hang wuang Kitab Taurat, 'Aku haut ngantuh, Hanyu yiru allah?' ³⁵ Amun Allatalla Ammah ngantuh here sa narime lengan yiru 'allah', padahal Buku Barasis puang tau puang jari, ³⁶ daya inun naun ngantuh ne'u Hanye sa haut na ampibarasis Alatalla Ammah balalu na huyu ma dunia yena, 'Hanyu mahujat", daya Aku iwara ma naun, 'Aku ina Iya Alatalla?' ³⁷ Amun Aku puang ngaraja kawan pigawian Alatalla AmmahKu, ada naun parisaya ma Aku. ³⁸ Kude, amun Aku ngaraja kawan pigawian yiru, biar naun puang parisaya ma Aku, ware naun parisaya ma kawan pigawian yiru hampan naun karasa nelang kataru amun Alatalla Ammah hang wuang Aku, Aku pada hang wuang Alatalla Ammah." ³⁹ Hinra lagi, here hamen nyamma Yesus, kude Hanye lapas teka jama'an here. ⁴⁰ Balalu, Yesus tulak lepuh nyabarang hungei Yordan nuju ma unengan pamulaan ni hi Yohanes sadi ngampanrus palus muneng hang yiru. ⁴¹ Kawan ulun wahai nunung Hanye nelang kaeyau, "Biar hi Yohanes puang ngaraja isapun siri ajaib, kude katuluh inun sa na wara daya hi Yohanes ne'u Ulun yina tu'u." ⁴² Hang yiru wahai kawan ulun parisaya anri Hanye.