¹ Balalu Yesus tulak ma Bukit Zaitun. ² Kaayat sungsung, Hanye mulek lagi ma Lewu Alatalla nelang ulun rama hawi nunung Hanye. Hanye maharung anri ngajar here. ³ Kawan ahli Taurat anri kawan ulun Farisi hawi ngennei erang kaulun wawei sa na jamma here hantek hanye idapa, dami here nunyu wawei yiru minri hang penah here, ⁴ here kaeyau ma Yesus, "Guru, wawei yina jamma kami rahat hanye idapa. ⁵ Hukum Taurat Musa nunyu kami hampan medak watu ma wawei sa iyalah hanye na. Inun pandapatNu ne'u hal yina?" ⁶ Here kaeyau kalayiru ne'u nyuba Yesus hampan here kahaba alasan ngampihala Hanye. Kude, Yesus ijuku nelang manulis makai kingkingNi hang tane. ⁷ Daya here sa tunti elah anri Hanye, Yesus balalu minri nelang kaeyau ma here. "Hie ulun sa puang badusa hang penah naun, ware hanye sa jari ulun kaisa sa medak wawei yina makai watu." ⁸ Udi hie, Yesus ijuku kamulek nelang manulis hang tane. ⁹ Dami here karengei kalayiru, isa-isa here tulak, mulai teka sa paling matueh, ekat lee Yesus raerai baya wawei yiru sa masih minri hang penah. ¹⁰ Yesus minri nelang kaeyau ma wawei yiru, "U wawei ma awe kawan ulun huni? Mahi sah ulun nukum hanyu?" ¹¹ Eyau wawei yiru, "Mahi, Tuhan." Yesus kaeyau, "Aku pada puang nukum hanyu. Hulu tulak, anri mulai taati ada lagi ngulah dusa." ¹² Udi hie, Yesus kaeyau ma ulun rama iru, eyauNi, "Aku yina Ra'ai Dunia". Tiap ulun sa umma Aku puang sagar takia hang wuang pi'ieng, kude baisi ra'ai welum." ¹³ Balalu, kawan ulun Farisi kaeyau ma Yesus, "Hanyu iwara ne'u diriNu raerai, jari piwaraanNu ru puang bujur." ¹⁴ Yesus kaeyau ma here, eyauNi, "Biar Aku iwara ne'u diriKu raerai, piwaraanKu yina bujur daya Aku karasa teka awe Aku hawi anri ma awe Aku sagar tulak, kude naun puang karasa teka awe Aku hawi anri ma awe Aku sagar tulak. ¹⁵ Naun mahakimi maka sara dunia, amun Aku puang mahakimi hiepun. ¹⁶ Kude, biar Aku mahakimi, penghakimanKu yiru bujur daya Aku puang mahakimi raerai kude baya Alatalla Ammah sa nunyu Aku. ¹⁷ Pada, hang wuang Kitab Tauratnu na surat amun piwaraan daya rueh kaulun yiru bujur, ¹⁸ Aku iwara ne'u DiriKu raerai anri Alatalla Ammah sa nunyu Aku pada iwara ne'u Aku." ¹⁹ Here balalu nunti ma Hanye, "Hang awe sah Alatalla AmmahNu?" Yesus kaeyau, "Naun puang kataru anri Aku kalahie pada anri Alatalla AmmahKu, amun naun kataru anri Aku himat naun pada kataru anri Alatalla AmmahKu." ²⁰ Eyauan Yesus yina na tahampe hang riet perbendaharaan hantek Hanye ngajar hang Lewu Alatalla, kude mahi erang kaulunpun sa nyamma Hanye daya katikaNi huan hampe. ²¹ Balalu, Yesus kaeyau lagi ma here, "Aku sagar nanan naun anri naun sagar ngantara Aku, kude naun sagar matei hang wuang dusa naun. Ma awe Aku tulak, naun puang kaiyuh nunung Aku." ²² Kawan ulun Yahudi yiru kaeyau, "Inun sah Hanye na hamen munu tenga raerai daya Hanye kaeyau 'Ma awe Aku tulak, naun puang kaiyuh nunung Aku?"' ²³ Yesus kaeyau ma here, "Naun asalni teka kapit, kude asalKu teka ammau. Naun asalni teka dunia yena, kude asalKu puang teka dunia yena. ²⁴ Daya yiru, Aku iwara ma naun amun naun sagar matei hang wuang dusa naun daya amun naun puang parisaya ma Aku, naun sagar matei hang wuang kawan dusa naun." ²⁵ Balalu, here nunti ma Hanye, "Hie sah Hanyu na?" Yesus kaeyau ma here, "Aku haut iwara ma naun teka mula ni. ²⁶ Wahai hal ne'u naun sa harus na wara anri na hakimiKu, kude Hanye sa nunyu Aku hanye yiru bujur anri inun sa na sanrengeiKu teka Hanye, iru pada sa na tahampeKu ma dunia." ²⁷ Here puang paham amun Yesus rahat bapanner ma here ne'u Alatalla Ammah. ²⁸ Daya yiru, Yesus kaeyau, "Hantek naun haut ngampiammau Iya Murunsia, hantek yiru pada naun karasa amun Aku yina hanye yiru Hanye, mahi hal sa na karajaKu yiru teka diriKu raerai, kude Aku iwara inun sa haut na ajar Alatalla Ammah ma Aku. ²⁹ Hanye sa nunyu Aku naan baya Aku, Hanye puang nanan Aku raerai daya Aku aur ngaraja kawan hal sa na ahengNi." ³⁰ Katika Yesus iwara ne'u katuluh hal yiru, wahai ulun parisaya anri Hanye. ³¹ Yesus kaeyau ma kawan ulun Yahudi sa parisaya anri Hanye, "Amun naun tatap hang wuang lenganKu, naun bujur-bujur muridKu, naun pada sagar karasa ne'u hal sa bujur anri hal sa bujur yiru ngampi bebas naun." ³³ Here kaeyau, "Kami ina turunan hi Abraham pada puang suah jari walah hiepun. Jari, daya inun Hanyu kaeyau, "Naun sagar bebas?"' ³⁴ Yesus kaeyau ma here, "Sa kapinu'uni, Aku iwara ma naun, tiap ulun sa ngulah dusa hanye yiru walah dusa, ³⁵ Erang kaulun walah puang muneng hang wuang keluarga hampe kalalawahni, kude erang kaulun iya muneng hampe kalalawahni. ³⁶ Jari, amun Iya ngampi bebas naun, naun tu'u-tu'u bebas. ³⁷ Aku karasa amun naun yina turunan hi Abraham, kude naun hamen munnu Aku daya ajaranKu mahi kahaba uneng hang wuang naun. ³⁸ Aku iwara ne'u kawan hal sa haut na dinungKu baya Alatalla AmmahKu, kalahie pada hanyu ngaraja kawan hal sa na sanrengeinu teka ammahnu." ³⁹ Here kaeyau ma Hanye, "Hi Abraham yiru ammah kami." Eyau Yesus, "Amun naun ri turunan hi Abraham, saharusni naun ngaraja inun sa na karaja daya hi Abraham. ⁴⁰ Kude, naun bausaha munnu Aku, sa iwara ma naun ne'u hal sa kapinu'uni, sa na sanrengeiKu teka Alatalla AmmahKu. Hi Abraham puang ngaraja hal yiru. ⁴¹ Jari, naun ekat ngaraja inun sa na karaja ammahnu raerai." Here kaeyau ma Hanye, "Kami puang nakayaan teka hasil idapa. Kami baisi isa Ammah hanye yiru Alatalla." ⁴² Yesus kaeyau ma here, "Amun Alatalla hanye yiru Ammah naun, naun himat sayang anri Aku daya Aku hawi anri asalKu teka Alatalla Ammah, Aku hawi puang daya ahengKu raerai, kude daya aheng Hanye sa nunyu Aku. ⁴³ Daya inun naun puang kataru inun sa na waraKu? Yiru daya naun puang tau nyanrengei lenganKu. ⁴⁴ Asal naun teka ammah naun, hanye yiru setan daya yiru naun hamen ngaraja inun sa na aheng ammah naun. Hanye yiru tukang wunnu teka asalni daya hanye puang itegei ma kapinu'uni daya kapinu'uni mahi hang hanye. Dami hanye ipusu, hanye iwara ne'u hal sa jari karakterni raerai daya hanye pamusu pada ammah ipusu. ⁴⁵ Daya Aku iwara sa kapinu'uni ma naun, naun puang parisaya anri Aku. ⁴⁶ Hie sah di antara naun sa tau iwara amun Aku badusa? Amun Aku iwara sa kapinu'uni, daya inun naun puang parisaya anri Aku? ⁴⁷ Hieleh sa asalni teka Alatalla Ammah, hanye nyanrengei lengan Alatalla Ammah, irulah sababni daya inun naun puang nyanrengei daya asal naun puang teka Alatalla Ammah." ⁴⁸ Kawan ulun Yahudi kaeyau ma Yesus, "Ang neh tu'u amun kami ngantuh Hanyu na erang kaulun Samaria nelang Hanyu na itun roh alamurun?" ⁴⁹ Yesus kaeyau, "Aku puang itun roh alamurun, kude aku hurumat ma Alatalla AmmahKu, kude naun puang hurumat anri Aku. ⁵⁰ Kude, Aku puang ngantara pihante ma Aku raerai, daya naan Isa sa ngantarani nelang pada mahakimi. ⁵¹ Sa kapinu'uni, Aku kaeyau ma naun, tiap ulun sa nu'u lenganKu, hanye puang sagar nantau pampatei." ⁵² Kawan ulun Yahudi yiru kaeyau ma Yesus, "Taati kami karasi amun Hanyu mula itun roh alamurun! Daya, hi Abraham baya kawan nabi haut matei. Kude, Hanyu kaeyau, 'Tiap ulun sa nu'u lenganKu, hanye puang sagar nginam pampatei.' ⁵³ Inun sah Hanyu na labis hante teka hi Abraham, ammah kami, sa haut matei? Kawan nabi pada haut matei; baya hie sah Hanyu nyansameh diriNu?" ⁵⁴ Yesus kaeyau, "Amun Aku ngampi hante diriKu raerai, pihanteKu mahi aratini; Alatalla AmmahKulah sa ngampi hante Aku, sa ne'u Hanye yiru naun kaeyau, 'Hanye yiru Alatalla kami."' ⁵⁵ Naun puang kataru baya Hanye, kude Aku kataru baya Hanye; amun Aku kaeyau Aku puang kataru baya Hanye, Aku ipusu, sameh iyalah naun, daya Aku kataru baya Hanye nelang Aku pada nu'u lenganNi. ⁵⁶ Ammahnu, hi Abraham mihewu daya hanye sagar nantau anrauKu. Hanye haut nantauni nelang pada mihewu." ⁵⁷ Balalu, kawan ulun Yahudi yiru kaeyau ma Hanye, "UmurNu leh huan hampe dimempulu taun, kalaawe Hanyu tau karasa hi Abraham?" ⁵⁸ Yesus kaeyau ma here, "Sa kapinu'uni Aku iwara ma naun, sahuan hi Abraham naan, Aku haut naan." ⁵⁹ Daya yiru, here ngalap watu ne'u medak Hanye, kude Yesus sanina palus nanan Lewu Alatalla.