¹ Udi yiru, Yesus takia kaliling tumpuk Galilea. Hanye puang hakun takia mitah tumpuk Yudea daya kawan ulun Yahudi hang yiru hamen munnu Hanye. ² Hantek yiru haut rie anrau hante ulun Yahudi, hanye yiru anrau hante Pondok Daun. ³ Daya yiru, kawan pulaksanai Yesus kaeyau ma Hanye, "Ware tulak hingka yina ma tumpuk Yudea hampan kawan muridNu pada nantau kawan pigawian sa haut na karaja dayaNu. ⁴ Daya, mahi ulun sa suni-suni ngaraja yiru amun hanye hamen na pantaru daya ulun rama. Amun Hanyu ngaraja kawan hal yiru, Hanyu iwara ne'u diriNu ma dunia." ⁵ Iru daya kawan pulaksanai Yesus puang parisaya ma Hanye. ⁶ Yesus kaeyau ma here, "KatikaKu huan hampe, kude katikanu sagar naan eleh. ⁷ Dunia puang tau muar rigat anri hanyu, kude dunia muar rigat anri Aku daya Aku iwara ne'u katuluh pigawian sa murun hang dunia yena. ⁸ Hulu naun tulak ma parayaan yiru. Aku huan tulak ma yaru daya katikaKu huan hampe." ⁹ Udi iwara hal yiru, Yesus tatap muneng hang tumpuk Galilea. ¹⁰ Kude, dami kawan pulaksanaiNi tulak ma parayaan yiru, Yesus pada suni-suni tulak ma yaru. ¹¹ Kawan ulun Yahudi ngantara Hanye hang parayaan yiru, nelang nunti "Hang awe Hanye?" ¹² Wahai sa ikeneh hang penah ulun rama yiru ne'u Hanye. Naan sa kaeyau, "Hanye ulun maeh." Naan pada sa kaeyau, "Puang, Hanye ngampitawang ulun rama." ¹³ Kude, mahi erang kaulunpun sa heei bapaner terus terang ne'u Hanye daya puang heei anri kawan ulun Yahudi. ¹⁴ Hantek parayaan yiru, Yesus masuk ma Lewu Alatalla palus ngajar hang yiru. ¹⁵ Kawan ulun Yahudi ngawauh balalu kaeyau "Kalaawe Ulun yina tau kahaba alimu pitua sa kala yiru, padahal Hanye puang paajar?" ¹⁶ Yesus kaeyau ma here, "AjaranKu asalni puang teka Aku raerai, kude teka Hanye sa nunyu AKu. ¹⁷ Amun erang kaulun hamen ngaraja aheng Alatalla, hanye himat karasa ajaranKu yina, inun iru asalni teka Alatalla atawa teka Aku raerai. ¹⁸ Ulun sa bapaner teka hanye raerai ngantara hurumat ma hanye raerai, kude ulun sa ngantara hurumat ma Hanye sa nunyuni, hanye tu'u nelang mahi pusu hang wuang hanye. ¹⁹ Angneh Musa haut ngami Hukum Taurat ma naun, kude mahi erang kaulunpun teka naun sa nu'u anri hukum yiru? Daya inun naun hamen munnu Aku?" ²⁰ Ulun rama iru kaeyau, "Hanyu itun ruh ala murun! Hie sa hamen munnu Hanyu?" ²¹ Yesus kaeyau ma here, "Aku ekat ngaraja isa gawian kude naun katuluh uras ngawauh. ²² Musa ngammi naun sunat, sa kapinu'unni iru puang teka Musa, kude teka datu nini, anri hanyu nyunat ulun hang anrau Sabat. ²³ Amun erang kaulun na sunat hang anrau Sabat hampan Hukum Musa puang na hebu, daya inun naun sangit anri Aku daya Aku nyamare ulun hang anrau Sabat? ²⁴ Ada mahakimi makai hal sa puang dinung, kude hakimi anri penghakiman sa bujur. ²⁵ Udi hie, papire kaulun sa muneng hang Yerusalem kaeyau "Ang neh Hanye yina Ulun sa hamen na wunnu daya here? ²⁶ Kude, tantauleh, Hanye bapanner anri terang-terangan kude here puang bapanner inunpun ma Hanye. Inun sah kawan pamimpin yiru haut tu'u-tu'u karasa amun Hanye yiru Kristus? ²⁷ Kude, takam karasa teka awe Ulun yina asalni. Hantek Kristus hawi, mahi erang kaulunpun sa karasa teka awe asalNi. ²⁸ Daya yiru, nelang Yesus ngajar hang Lewu Alatalla, Hanye kaeyau, "Naun mula puang kataru Aku anri teka awe asalKu. Kude, Aku hawi puang teka diriKu raerai, kude Hanye sa nunyu Aku yiru tu'u, hanyu puang kataru anri Hanye, ²⁹ kude Aku kataru anri Hanye daya asalKu teka Hanye pada Hanyeleh sa haut nunyu Aku." ³⁰ Balalu, here bausaha nyamma Hanye, kude mahi erang kaulunpun sa tau sunnah negei Hanye daya katikaNi huan hampe. ³¹ Kude, wahai kawan ulun sa parisaya anri Yesus. Here kaeyau, "Amun Kristus yiru hawi, inun sah Hanye sagar ngaraja labis wahai lagi siri ajaib teka sa haut na karaja Ulun yina?" Pamimpin Yahudi Bausaha Nyamma Yesus ³² Kawan ulun Farisi karengei inun sa na panner ulun rama yiru ne'u Yesus, balalu kawan imam kepala anri kawan ulun Farisi nunyu kawan penjaga Lewu Alatalla ne'u nyamma Hanye. ³³ Daya yiru, Yesus kaeyau, "KatikaKu baya naun ekat erang pitus lagi daya udi yiru, Aku sagar mulek ma Hanye sa nunyu Aku. ³⁴ Hanyu ngantara Aku, kude puangnu kahaba. Hang awe die Aku muneng, hanyu puang tau nunung Aku ma yaru." ³⁵ Kawan ulun Yahudi yiru kaeyau ma sameh here, "Kai ma awe Ulun ina hamen tulak hampe takam puang tau manalu Hanye? Inun Hanye hamen tulak ma penah ulun Yahudi sa naan hang penah kawan ulun Yunani, balalu ngajar kawan ulun Yunani hang yiru? ³⁶ Inun arati sa na eyauNi, 'hanyu sagar ngantara Aku, kude hanyu puang kahaba Aku. Anri, hang awe Aku muneng, hanyu puang tau nunung ma yaru?"' ³⁷ Hang anrau ta ahir, hanye yiru puncak parayaan, Yesus minri nelang bapanner, eyauNi, "Amun naan sa haus ware hanye hawi nunung Aku balalu nguut. ³⁸ Kawan ulun sa parisaya ma Aku, iyalah sa na wara daya Buku Barasis, hang wuang hanye sagar mangalir ranu welum." ³⁹ Sa na maksud daya Yesus hanye yiru Ruh, sa na tarime daya ulun sa parisaya ma Hanye. Daya Ruh yiru huan na ammi amun Yesus huan na muliakan. ⁴⁰ Hantek here nyanrengei yiru, papire teka here kaeyau, "Ulun ina tu'u-tu'u Nabi." ⁴¹ Here sa lain lagi kaeyau, "Hanye yina Kristus". Sa lain lagi kaeyau, "Tau sah Kristus hawi teka tumpuk Galilea? ⁴² Ang neh eyau Buku Barasis Kristus asalni teka turunan Dawid anri teka Betlehem, tumpuk uneng Dawid sadi muneng?" ⁴³ Hal yiru jari salisih hang penah kawan ulun daya puang sameh pandapat ne'u Hanye. ⁴⁴ Papire kaulun diantara here hamen nyamma Yesus, kude mahi erang kaulunpun sa sunah tau negei Hanye. ⁴⁵ Daya yiru, kawan panjaga Lewu Alatalla mulek nadap kawan imam kapala anri kawan ulun Farisi, sa nunti ma here, "Inun ngulah naun puang ngennei Yesus?" ⁴⁶ Kawan panjaga Lewu Alatalla yiru kaeyau, "Mahi erang kaulunpun sa suah bapanner iyalah Ulun yina!" ⁴⁷ Kawan ulun Farisi yiru kaeyau ma here, "Inun naun pada haut na ampi tawang? ⁴⁸ Naah sah erang kaulun teka antara pamimpin atawa ulun Farisi sa haut parisaya ma Hanye? ⁴⁹ Kude, kawan ulun rama yiru puang karasa amun Hukum Taurat yiru takutuk!" ⁵⁰ Balalu, hi Nikodemus, erang kaulun teka here yiru, sa suah panalu Yesus kaeyau ma here, ⁵¹ "Inun sah Hukum Taurat takam yiru mahakimi erang kaulun sahuan na sanrengei inun sa na panner ni anri inun sa na karajani?" ⁵² Here kaeyau, "Inun sah hanyu na ulun tumpuk Galilea? Pantaru anri tantaunu mahi nabi sa hawi teka tumpuk Galilea." ⁵³ Balalu here katuluh mudi ma lewu here masing-masing.