¹ Hang anrau ka isa minggu yiru, hi Maria Magdalena tulak ma pasaran Yesus kaayat sungsung hantek anrau masih maiyeng, hanye nantau watu sa na pakai nutup pasaran yiru haut pa geser. ² Hanye balalu nempat manalu hi Simon Petrus baya kawan murid lainni, nelang kaeyau, "Here haut ngalap Tuhan teka pasaran, kami puang karasa hang awe here nganakNi." ³ Balalu hi Petrus baya erang kaulun murid lainni pada tulak ma pasaran, ⁴ here rueh nempat, kude erang kaulun murid lainni yiru nempat labis hinang teka hi Petrus jari hanye hampe labis dahulu ma pasaran yiru. ⁵ Hanye nyuwuk kude puang masuk ma wuang, hanye nantau ekat naan tetek kain linen sa pakai munut tenga Yesus ai sa naan hang yiru. ⁶ Puang lawah hi Simon Petrus pada hampe hang yiru, hanye palus masuk ma pasaran, nantau ekat tetek kain linen pamunut sa naan hang yiru. ⁷ Tetek kain sa pakai nutup uruwawa Yesus bagulung hang uneng sa lain. ⁸ Erang kaulun murid sa lain huni pada masuk mawuang pasaran. Hanye nantau balalu harap. ⁹ Daya kapihuan kajadian yiru here huan paham lengan Buku Barasis sa iwara amun Yesus sagar welum kamulek. YESUS NANTARANG DIRINI MA HI MARIA MAGDALENA ¹⁰ Balalu karueh murid yiru mudi ma lewu. ¹¹ Kude hi Maria minri hang luar pasaran yiru nelang nungkau. Hanye nyuwuk ma wuang pasaran yiru, ¹² hanye nantau rueh kaulun malekat bapama mahilak rahat maharung hang unengan tenga Yesus na angkading kapihuan yiru. Sa isa maharung hang pulak ulu sa isa ni lagi maharung hang pulak pee. ¹³ Karueh malekat yiru nunti ma hi Maria, "Inung ngulah hanyu nungkau?" Hi Maria kaeyau, "Here haut ngalap tenga Tuhanku nelang aku puang karasa hang awe here nganakNi." ¹⁴ Dami iwara hal yiru, hi Maria ngulik ma wading pada nantau Yesus minri hang yiru, kude hanye puang kataru amun yiru Yesus. ¹⁵ Yesus nunti ma hi Maria, "Daya inun hanyu nungkau? Hie sa na antaranu?" Hi Maria sa mina Hanye yiru ulun sa nyaga taman, balalu hi Maria kaeyau ma Hanye, "Ampu, amun hanyu sa haut minah Hanye, awatnu iwara ma aku hang awe hanyu ngananNi hampan aku tau ngalapNi." ¹⁶ Yesus kaeyau ma hi Maria, "Maria." Hi Maria palus bapaling nelang kaeyau hawuang bahasa Ibrani, "Rabuni", sa aratini "Guru". ¹⁷ Yesus kaeyau ma hanye, "Ada hanyu negei Aku daya Aku huan tulak nuju Alatalla AmahKu. Kude hulu hanyu tulak nunung kawan pulaksanaiKu palus iwara ma here, 'Aku sagar tulak mulek ma Alatalla AmahKu pada Alatalla Amahnu."' ¹⁸ Balalu hi Maria Magdalena hinang tulak palus iwara ma kawan murid, "Aku haut nantau Yesus," balalu hanye iwara pesen Yesus yiru. ¹⁹ Hang kamalem anrau ka isa minggu yiru, kawan wanawang unengan kawan murid bakumpul haut na tutup daya here puang heei anri kawan ulun Yahudi, Yesus hawi palus minri hang penah-penah here nelang kaeyau, "Damai sejahtera ma naun!" ²⁰ Udi yiru Yesus nantarang tangan baya sanaiNi ma here. Kawan murid tuu arai mihewu daya here nantau Tuhan. ²¹ Udi hie Yesus kaeyau lagi ma here, "Damai sejahtera ma naun. Sameh iyalah Alatalla Amah nunyu Aku kalairu pada Aku nunyu naun." ²² Udi iwara kalayiru, Yesus nyiwui here nelang kaeyau, "Tarimeleh Roh Barasis!" ²³ Amun naun ngampun dosa erang kaulun, dosa yiru na ampuni. Kalahie pada amun naun puang ngampun kawan dosani, dosani pada puang na ampuni." ²⁴ Hi Tomas, erang kaulun teka ruehwalas murid, sa na herau hi Didimus, mahi baya here hantek Yesus hawi. ²⁵ Kawan murid lainni iwara ma hanye, "Kami haut nantau Tuhan." Kude hi Tomas puang harap balalu kaeyau, "Ekat amun aku tau nantau bakas pantak hang tanganNi balalu nampasuk kingkingku ma yiru, pada nampasuk tanganku ma wuang sanaiNi, wau aku harap." ²⁶ Walu anrau udi hie, kawan murid bakumpul lagi hang lewu yiru, hi Tomas pada naan baya here. Katuluh wanawang na tutup, Yesus hawi nelang minri hang penah-penah here, nelang kaeyau, "Damai sejahtera ma naun katuluh!" ²⁷ Udi hie Hanye kaeyau ma hi Tomas, "Susuk kingkingnu ma tanganKu pada ampasuk tangannu ma wuang sanaiKu. Ada hanyu puang harap lagi!" ²⁸ Hi Tomas kaeyau ma Yesus, "Hiai, Tuhanku, Alatalla Amahku!" ²⁹ Yesus kaeyau ma hi Tomas, "Harap sah hanyu taati dami haut ninung Aku?" Na berkati here sa puang ninung kude harap." ³⁰ Masih rama siri ajaib sa na gawi Yesus hadapan kawan muridNi kude puang na surat hawuang kitab yena. ³¹ Katuluh yina na surat hampan naun katuluh harap amun Yesus yiru Kristus, Iya Alatalla Amah, nelang pada hampan hawuang harap parisaya naun yiru, naun pada welum hawuang ngaranNi.