¹ Hi Pilatus ngalap Yesus balalu marentah hampan Yesus na pepai makai uwei. ² Kawan tantara ngulah erang kawua mahkota teka patet kayu barunrui balalu masangni hang ulu Yesus, here pada masang jubah ungu ma Hanye. ³ Here maju nyanriet Yesus nelang kaeyau, "Tabe, u Raja ulun Yahudi!" Balalu here nampeleng Hanye. ⁴ Balalu hi Pilatus kaluar kamulek nelang kaeyau ma here, "Tantau naun! Aku ngenei Yesus kaluar nadap naun hampan naun karasa amun aku mahi kahaba inunpun kahalaenNi." ⁵ Balalu Yesus kaluar nelang makai mahkota runrui anri jubah ungu. Hi Pilatus kaeyau ma here, "Tantau, ina Hanye!" ⁶ Dami kawan imam kepala anri kawan tantara nantau Yesus, here nantiak, "Pantak Hanye, pantak Hanye!" Hi Pilatus kamulek kaeyau ma here, "Hulu enei Hanye anri pantak naun raerai, daya aku mahi kahaba kahalaen inunpun hang Hanye." ⁷ Kawan ulun Yahudi yiru kaeyau ma hi Pilatus, "Kami baisi hukum, eyau hukum yiru, Hanye harus matei daya Hanye nganggap Hanye yiru Iya Alatalla." ⁸ Hantek nyanrengei hal yiru, hi Pilatus magin puang heei ⁹ balalu masuk kamulek ma wuang gedung pengadilan, nelang nunti ma Yesus, "Teka awe asalNu?" Kude Yesus puang maharek. ¹⁰ Hi Pilatus kaeyau kamulek ma Hanye, "Inun ngulah Hanyu puang hakun bapaner anri aku? PuangNu karasa sah amun aku yina bakuasa neu napas Hanyu pada bakuasa neu matak Hanyu?" ¹¹ Yesus kaeyau, "Mahi kuasanu nadap Aku, ekat amun kuasa yiru na ami ma hanyu teka Alatalla. Yiru sa ngulah ulun sa haut nyarah Aku ma hanyu labis hante dosani." ¹² Dami karengei hal yiru, hi Pilatus bausaha napas Yesus, kude kawan ulun Yahudi nantiak, "Amun hanyu napas Ulun yina, hanyu puang erang kaulun hengau riet hi Kaisar; kalahie pada tiap ulun sa nganggap hanye yiru raja baarti nawan hi Kaisar." ¹³ Dami hi Pilatus nyanrengei yiru, hanye ngennei Yesus kaluar, nelang maharung hang karusi pengadilan, hang unengan sa bangaran Litostrotos, sa aratini Gabata hawuang bahasa Ibrani. ¹⁴ Anrau yiru hanye yiru anrau ulun basiap hamen Paskah niba jam enem. Hi Pilatus kaeyau ma kawan ulun Yahudi, "Ina Raja nuan!" ¹⁵ Balalu here nantiak, "Singkir Hanye! Singkir Hanye! Pantak Hanye!" Eyau hi Pilatus ma here, "Harus sah aku mantak Raja naun?" Kawan iman kepala kaeyau, "Raja kami ekat hi Kaisar!" ¹⁶ Balalu hi Pilatus nyarah Yesus ma here neu na pantak. ¹⁷ Yesus kaluar nelang ngume kayu balasangarNi raerai nuju unengan sa bangaran "Tempat Tengkorak", sa hawuang bahasa Ibrani aratini "Golgota". ¹⁸ Hang yaru here mantak Yesus baya rueh kaulun sa lain, hang tuhi kawan anri tuhi kawi Yesus. ¹⁹ Hi Pilatus pada ngulah tulisan sa na anakni hang amau kayu balasangar sa kalaina lengani, "YESUS ULUN NAZARET, RAJA ULUN YAHUDI." ²⁰ Wahai kawan ulun Yahudi mambasa tulisan yiru daya uneng Yesus na pantak riet anri tumpuk hante, tulisan yiru na tulis makai bahasa Ibrani, Latin anri Yunani. ²¹ Kawan imam kapala ulun Yahudi kaeyau ma hi Pilatus, "Ada na tulis, 'Raja ulun Yahudi,' kude tulisleh iyalah eyau Ulun yina, 'Aku Yina Raja Ulun Yahudi.'" ²² Eyau Hi Pilatus, "Inun sa haut na tulisku, puang iyuh ubah!" ²³ Kawan tantara, hantek here mantak Yesus, here ngalap pamaNi balalu mambagini jari epat, isa bagian ma erang kaulun tantara, kalahie pada jubahNi; jubah sa mahi kamitanni, ekat na tenun teka amau hampe ime. ²⁴ Kawan tantara yiru bapaner sasameh here, "Ada takam hampe ngirah jubah yina, ware takam ngundi hie sa kaiyuh jubah yina die." Hal yiru hampan ganap sa na surat hawuang Buku Barasis : "Here mambagi pamaKu hang penah here anri jubahKu makai undi." Mazmur 22:18 Kalayiru kawan tantara ngaraja katuluh hal yiru. ²⁵ Kateka yiru, ineh Yesus baya pulaksanaini sa wawei, hi Maria darangan Klopas baya hi Maria Magdalena, minri riet kayu balasangar Yesus. ²⁶ Hantek Yesus nantau inehNi baya kawa murid sa na kaleluNi minri hang yiru, Hanye kaeyau ma inehNi, "Ineh, tantaunu, ina Aku anaknu!" ²⁷ Udi hie Yesus kaeyau ma kawan muridNi, "Hanye yina inehnu!" Hingka katika yiru kawan muridNi narime ineh Yesus muneng baya here. ²⁸ Dami Yesus karasa amun katuluhni haut na karaja neu ngampi ganap lengan hang Buku Barasis, Hanye kaeyau, "Aku hamen ranu!" ²⁹ Hang yiru naan tajau baisi anggur maasem. Here nyulup wunge karang sa haut na pasang hang watang hisop ma wuang anggur maasem yiru, balalu ngami ma wawa Yesus. ³⁰ Udi nilap anggur maasem yiru, Yesus kaeyau, "Haut luput." Udi hie Hanye suntup nelang manyarah amirueNi. ³¹ Daya anrau yiru anrau persiapan Paskah, kawan ulun sa haut matei yiru puang iyuh na paladar hang kayu balasangar hampe anrau hante Sabat, kawan ulun Yahudi laku ma hi Pilatus hampan nyantepu pee kawan ulun sa haut matei yiru palus ngampinau here teka amau kayu balasangar. ³² Balalu kawan tantara yiru hawi nyantepu pee kawan ulun sa na pantak sinrah Yesus. ³³ Kude hantek here nantau Yesus haut matei, here puang jari nyantepu peeNi. ³⁴ Erang kaulun tantara nyuduk tombakni ma lambung Yesus, hantek yiru pada ira baya ranu kaluar. ³⁵ Ulun sa nantau bakesah neu hal yiru, kesah yiru mula tuu nelang hanye karasa amun hanye iwara hal sa kapinuuni hampan naun pada parisaya. ³⁶ Katuluh yiru hampan ganap inun sa nasurat hawuang Buku Barasis : "Mahi erang kawua taulangpun sa na santepu." ³⁷ Nelang hang bagian lain Buku Barasis yiru pada kaeyau, "Here sagar nantau Hanye sa haut na suduk here." ³⁸ Udi katuluh kajadian yiru, hi Yusuf teka tumpuk Arimatea, hanye pada erang kaulun murid Yesus sa puang wahai harek daya takut anri kawan ulun Yahudi, hawi nadap hi Pilatus neu laku hampan mayat Yesus iyuh na enei anri na pasar dayani. Hi Pilatus nunyu hanye ngaraja hal sa na lakuni yiru. ³⁹ Hi Nikodemus, erang kaulun sa suah nunung Yesus hang anrau kamalem, hanye pada ngenei sampuran kawan minyak mur baya hayuput, sa weatni niba dimempulu kati. ⁴⁰ Here ngalap mayat Yesus, mungkusni makai kain linen sa haut na ami rarampah, iyalah adat ipasar ulun Yahudi. ⁴¹ Hang riet Yesus na pantak, naan taman nelang hawuang taman yiru naan pasaran wau sa masih lawang. ⁴² Daya anrau yiru anrau persiapan Paskah ma ulun Yahudi nelang unengan yiru puang hampe lawit, here balalu nganak mayat Yesus hang yiru.