¹ Udi Yesus iwara katuluh hal yiru, Hanye baya kawan muridNi tulak ma subarang hungei Kidron, hang yiru naan taman, Yesus baya kawan muridNi balalu masuk mawuang taman yiru. ² Hi Yudas, erang kaulun murid sa bakhianat anri Yesus, karasa taman yiru daya Yesus gaha ngumpul kawan muridNi hang yiru. ³ Hi Yudas anri wahai pasukan baya kawan walah teka kawan imam kepala anri kawan ulun Farisi, hawi ma taman yiru nelang ngenei lantera, obor baya sanyata. ⁴ Yesus, sa haut karasa inun sa sagar bakajadian, maju ma muka nelang nunti anri here, "Hie sah na antara naun?" ⁵ Here kaeyau, "Yesus teka tumpuk Nazaret." Yesus mulek kaeyau ma here, "AKu yina Yesus." Hi Yudas sa bakhianat pada minri baya here hang yiru. ⁶ Hantek Yesus kaeyau, "Aku ina Yesus," kawan ulun yiru pa unur nelang lawu ma tane. ⁷ Yesus nunti kamulek anri here, "Hie sa na antara naun?" Here kaeyau, "Yesus teka tumpuk Nazaret." ⁸ Eyau Yesus, "Haut waraKu ma naun, Aku yina Yesus. Amun naun ngantara Aku, elahleh kawan muridKu yina tulak." ⁹ Hal yina hampan ganap inun sa haut na eyau daya Yesus : "Teka katuluh sa na amiNu ma Aku, mahi erang kaulunpun sa wawai." ¹⁰ Hi Simon Petrus, sa ngenei erang kawua pedang, balalu netek silu kawan erang kaulun walah Imam Hante sa bangaran hi Malkhus. ¹¹ Yesus kaeyau ma hi Petrus, "Ampasuk pedang yiru ma wuang kumpangni! Cawan yina haut na ami Alatalla Amah ma AKu, ang neh Aku harus nguutni? ¹² Kawan tantara Romawi baya kawan perwirani pada kawan walah ulun Yahudi nyama Yesus palus nuruk Hanye, 13 balalu here ngenei Yesus nadap hi Hanas, kasian hi Kayafas sa erang kaulun Imam Hante hang taun yiru. ¹⁴ Hi Kayafas sa iwara kawan ulun Yahudi bahwa maeh amun erang kaulun matei neu rakyat. ¹⁵ Hi Simon Petrus baya erang kaulun murid lainni, ngarairing Yesus. Imam Hante kataru baya murid sa lain yiru hanye balalu masuk baya Yesus ma wuang halaman istana. ¹⁶ Hi Petrus ekat minri hang luar, riet wanawang. Balalu murid lain sa kataru anri Imam Hante huni mulek ma luar, bapaner anri wawei sa nyaga wanawang balalu ngenei hi Petrus masuk ma wuang. ¹⁷ Wawei sa nyaga wanawang yiru nunti anri hi Petrus, "Ang neh hanyu na pada erang kaulun murid Ulun yiru?" Eyau hi Petrus, "Puang!" ¹⁸ Daya anrau marisak tuu balalu kawan walah baya kawan perwira ipanruk hang yiru, here nyanaing tenga hampan puang karisaken. Hi Petrus pada baya here hang yiru. ¹⁹ Imam Hante nunti anri Yesus neu kawan murid nelang kawan ajaranNi. ²⁰ Yesus kaeyau, "Aku haut iwara sa kapinuuni ma dunia. Aku ngajar hang hene sinagoge baya hang Lewu Alatalla, uneng katuluh ulun Yahudi kumpul. Aku puang suah bapaner nelang sanina-sanina. ²¹ Daya inun hanyu nunti ma Aku? Subanu nunti anri here sa karengei nelang karasa inun sa na panerKu ma here. ²² Hantek Yesus paner kala yiru, erang kaulun penjaga minri palus nampeleng Hanye nelang kaeyau, "Kala yiru sah saraNu bapaner baya Imam Hante?" ²³ Yesus kaeyau ma hanye, "Amun Aku bapaner sa hala, tutui inun sa hala yiru; kude amun Aku bapaner sa tuu, daya inun hanyu nampeleng Aku?" ²⁴ Udi hie, hi Hanas ngirim Yesus sa masih na huruk neu nadap Imam Hante hi Kayafas. ²⁵ Katika yiru, hi Simon Petrus masih minri nelang nyanaing tenga. Balalu here nunti ma hanye, "Ang sah hanyu na erang kaulun teka murid Ulun yiru?" Hi Petrus kaeyau, "Puang." ²⁶ Erang kaulun walah Imam Hante, hanye yiru kulawarga teka hi Malkhus kaeyau, " Ang sa aku ninung hanyu baya Hanye hang taman yiru?" ²⁷ Hinra lagi, hi Petrus puang mangaku, balalu hanye nyanrengei tanru manu. ²⁸ Balalu here ngenei Yesus nadap hi Kayafas hang pengadilan, katika yiru anrau haut dami hari, here puang masuk ma wuang hampan here puang bere, nelang tau kuman Paskah. Hi Pilatus kaluar manalu here nelang nunti, "Inun tuduhan naun nadap Ulun yina?" ³⁰ Here kaeyau ma hi Pilatus, "Amun Hanye yina ulun maeh, kami puang sagar ngenei Hanye nadap hanyu." ³¹ Hi Pilatus balalu kaeyau ma here, "Enei Hanye teka yina paradu naun mahakimi Hanye makai hukum naun." Kawan ulun Yahudi yiru kaeyau, "Puang sesuai hukum, ma kami neu nukum matei erang kaulun." ³² Hal yina hampan ganap inun sa na eyau Yesus, sa iwara kalaawe pampateiNi die. ³³ Balalu hi Pilatus mulek ma wuang pengadilan nelang nerau Yesus, hanye nunti, "Inun sah Hanyu na Raja ulun Yahudi?" ³⁴ Eyau Yesus, "Tuntian yiru teka hanyu raerai atawa naan ulun lain sa iwara hal neu Aku yiru? ³⁵ Hi Pilatus kaeyau, "Inun aku ina erang kaulun Yahudi? Bangsa anri kawan imam kepalaNu raerai sa nyarah Hanyu ma aku. Inun sa sabujurni sa na karaja dayaNu?" ³⁶ Eyau Yesus, "KarajaanKu puang teka dunia yena. Amun karajaanKu teka dunia yena himat kawan walahKu nawan hampan Aku ada na sarah ma kawan ulun Yahudi. ³⁷ Hi Pilatus kaeyau, "Jari, Hanyu erang kaulun raja?" Eyau Yesus, "Hanyu raerai sa ngantuh amun Aku yina raja. Daya yiru Aku nakayaan, daya yiru Aku hawi ma dunia neu iwara hal sa kapinuuni. Tiap ulun sa asalni teka kapinuuni sagar nyanrengei lenganKu." ³⁸ Hi Pilatus nunti ma Hanye, "Inun sah kapinuuni yiru?" Udi hie hi Pilatus kaluar lagi neu manalu kawan ulun Yahudi, nelang kaeyau ma here, "Aku puang kahaba hal sa hala hang Hanye. ³⁹ Kude, naan kabiasaan naun hanye yiru aku harus napas erang kaulun tahanan hang anrau Paskah. Jari, inun naun hamen hampan aku napas 'Raja Ulun Yahudi' yina?" ⁴⁰ Here nantiak, "Ada napas Ulun yiru, ware hanyu napas hi Barabas!" Hi Barabas hanye yiru erang kaulun rampok.