¹ Yiru paner Yesus ma kawan muridNi, balalu Hanye tatungak ma amau langit nelang kaeyau, "Alatalla Amah, katikani haut hampe, pihante IyaNu hampan IyaNu pada ngampihante Hanyu. ² Iyalah Hanyu haut ngami Hanye kuasa hang amau katuluh murunsia, hampan Hanye pada tau ngami pamelum sa palus ma kalalawahni ma katuluh sa haut na amiNu ma Hanye. ³ Welum palus ma kalalawahni hanye yiru amun naun kataru anri Hanye, ekat isa Alatalla Amah sa tuu nelang pada kataru baya Kristus Yesus sa haut na huyuNi. ⁴ Aku haut nawat Hanyu hang amau tane nelang nyanyari pigawian sa haut na amiNu ma Aku. ⁵ Taati, u Alatalla Amah tawat Aku baya Hanyu makai tawat sa watKu baya Hanyu sahuan naan dunia yena. ⁶ Aku pada haut iwara ngaranNu ma kawan ulun sa haut na amiNu ma Aku hang dunia yena. Here yiru watNu daya Hanyu haut ngami here ma Aku, kalahie pada here haut nuu uruk ajar lenganNu. ⁷ Taati here haut karasa amun inun sa haut na amiNu ma Aku yiru asalni teka Hanyu. ⁸ Daya Aku haut ngami ma here lengan sa na amiNu ma Aku, nelang here pada narimeni palus tuu karasa amun asalKu teka Hanyu, here pada parisaya amun Hanyu sa nunyu Aku. ⁹ Aku lakudoa ma here puang ma dunia daya here sa haut na amiNu ma Aku; here yiru watKu. ¹⁰ Katuluh watNu yiru watKu pada; nelang Aku haut na tawat hang wuang katuluh hal yiru. ¹¹ Aku sagar puang muneng hang dunia yena, kude here masih muneng hang dunia yena. Aku hawi ma hadapanNu, Alatalla Amah sa Barasis, awat nyaga nyanlinung here hawuang ngaranNu, ngaran sa haut na amiNu ma Aku, hampan here jari isa sameh iyalah Takam. ¹² Salawah Aku baya here, Aku haut nyaga nyanlinung here hawuang ngaranNu sa haut na amiNu ma Aku. Mahi erang kaulunpun sa wawai, ekat hi iya pampatei, hampan ganap inun sa na surat daya Buku Barasis. ¹³ Taati Aku sagar nunung Hanyu; katuluh yina na waraKu hang dunia hampan here baisi kaarayenKu sa penu hawuang here. Aku haut ngami lenganNu ma here, daya yiru dunia muar rigat anri here, daya asal here puang teka dunia yena, sameh iyalah Aku pada puang teka dunia yena. ¹⁵ Aku puang laku Hanyu ngalap here teka dunia yena, kude laku Hanyu nyaga nyalinung here teka ala murun. ¹⁶ Asal here sameh iyalah Aku puang teka dunia yena. ¹⁷ Awat ampibarasis here hawuang kapinuuni; daya lenganNu hanye yiru sa kapinuuni. ¹⁸ Iyalah Hanyu haut nunyu Aku ma dunia yena, kalayiru pada Aku nunyu here ma wuang dunia. ¹⁹ Ma here, Aku ngampibarasis tengaKu hampan here pada na ampibarasis hang wuang kapinuuni. ²⁰ Aku pada lakudoa ma kawan ulun sa parisaya anri Aku mitah piwaraan here, ²¹ sameh iyalah Hanyu, Alatalla Amah hawuang Aku kalahie pada Aku hawuang Hanyu, here jari isa hawuang Takam, hampan dunia parisaya amun Hanyu sa haut nunyu Aku. ²² TawatNu ma Aku, yiru pada na amiKu ma here hampan here jari isa iyalah Takam. ²³ Aku hawuang here, Hanyu hawuang Aku hampan takam jari isa. Daya yiru dunia karasa amun Hanyu haut nunyu Aku, Hanyu malelu here, sameh iyalah Hanyu malelu Aku. ²⁴ U Alatalla Amah, Aku ngaheng hampan here sa haut na anyuNu ma Aku, here pada baya Aku hang awepun Aku muneng, hampan here nantau pihanteKu sa haut na anyuNu, daya hanyu malelu Aku sahuan naan dunia yena. ²⁵ U Alatalla Amah sa adil, dunia yena puang kataru anri Hanyu, kude Aku tuu kataru anri Hanyu, iyalah here pada karasa amun Hanyu sa nunyu Aku. ²⁶ Aku haut iwara neu ngaranNu ma here nelang tatap iwara hampan lelu sintaNu ma Aku pada naan baya here hang wuang Aku.