¹ Udi hie Yesus nantarang diri lagi ma kawan muridNi hang riet danau Tiberias. Hanye nantarang diriNi maka sara kalayina : ² Hi Simon Petrus, hi Tomas sa na herau hi Didimus, hi Natanael teka tumpuk Kana hang Galiea, kawan iya Zebedeus baya rueh murid lainni rahat bakumpul. ³ Hi Simon Petrus kaeyau ma here, "Aku hamen tulak takenah." Here kaeyau ma hanye, "Kami uma baya hanyu." Balalu here tulak ma luar, mamai jukung, kude malem yiru here mahi kaiyuh inun-inun. ⁴ Sungsung kaayat yiru, Yesus minri hang pantai, kude kawan muridNi puang kataru yiru Yesus. ⁵ Hanye kaeyau ma here, "Kawan iya, inun naun naan kenah sah?" Eyau here, "Mahi." ⁶ Kamulek Hanye kaeyau ma here, "Tawut luntanu ma tuhi kawan jukung, naun himat nian." Balalu here ngaraja iyalah inun sa na wara Yesus, kude here puang kaiyuh ngenat lunta yiru ma wuang jukung daya rama tuu kenahni. ⁷ Kawan murid sa na kalelu Yesus kaeyau ma hi Petrus, "Yiru Tuhan!" Dami hi Simon Petrus nyanrengei yiru Tuhan, hanye palus masang kamulek pama sa na lapasni hantek hanye takenah, balalu hanye mintun ma danau. ⁸ Kawan murid lainni ngennei jukung nelang narik lunta sa penu kenah yiru ma iring sa 200 hasta helangni teka uneng here ma lunta. ⁹ Dami here hampe ma iring, here balalu nyamelum apui, mangang kenah pada rote hang amau apui yiru. ¹⁰ Yesus balalu kaeyau, "Enei papire kaukui kenah sa wau haba naun ma yati." ¹¹ Hi Simon Petrus mamai ma jukung, narik lunta sa penu kenah yiru ma tane, jumalah kenah yiru jatuh dimepulu telu kaukui. kude biar rama kalayiru kenahni, luntani puang pairah. ¹² Yesus kaeyau ma here, "Mayati takam sameh-sameh kuman." Mahi erang kaulunpun kawan murid yiru heei nunti anri Hanye, "Hie sah Hanyu yina?" daya here karasa Hanye yiru Tuhan. ¹³ Yesus hawi, ngalap rote baya kenah yiru balalu mabagi-bagini ma kawan muridNi. ¹⁴ Yina haut katelu kalini Yesus nantarang diri ma kawan muridNi udi hanye welum kamulek teka penah ulun matei. ¹⁵ Udi here luput kuman, Yesus nunti ma hi Simon Petrus, "Simon, iya Yohanes, inun hanyu ngalelu Aku labis teka katuluh yena?" Hi Petrus kaeyau, "Tuu Tuhan, Hanyu karasa aku ngalelu Hanyu." Yesus kaeyau kamulek ma hi Petrus "Saga palihara kawan babiriKu!" ¹⁶ Yesus nunti lagi ma karueh kalini anri hi Simon, "Simon, iya Yohanes, inun hanyu ngalelu Aku?" Hi Petrus kaeyau, "Tuu Tuhan, Hanyu karasa aku ngalelu Hanyu." Yesus kaeyau ma hi Petrus, "Sagala palihara kawan babiriKu!" ¹⁷ Kamulek Yesus nunti lagi ma katelu kali ni, "Simon, iya Yohanes, inun hanyu ngalelu Aku?" Hi Petrus mahanang ateini daya Yesus nunti hanye kala yiru hampe telu kali, "Inun sah hanyu ngalelu Aku?" Hi Petrus kaeyau ma Yesus, "Tuhan, Hanyu karasa katuluh hal. Hanyu karasa amun aku ngalelu Hanyu!" Yesus kaeyau ma hanye, "Saga palihara kawan babiriKu! ¹⁸ Aku iwara sa kapinuuni ma hanyu, hantek hanyu iya, hanyu raerai sa nuruk pingangnu nelang takia ma awe sa na ahengnu; kude dami hanyu haut matueh, hanyu ngami tangannu ma ulun lain sa sagar nuruk pingangnu, ngenei hanyu ma awe sa puang na ahengnu." ¹⁹ Yesus kaeyau hal yiru neu iwara kalaawe pampatei hi Petrus sagar nawat Alatalla Amah. Udi iwara hal yiru, Hanye kaeyau ma hi Petrus, "Ware uma Aku!" ²⁰ Hi Petrus ikulik anri nantau murid sa tuu na kalelu Yesus ngarairing here. Hanye yiru erang kaulun murid sa maharung riet Yesus hantek jamuan kuman kamalem sa pada nunti, "Tuhan, hie kaulun sa sagar bakhianat anri Hanyu?" ²¹ Hantek nantau hanye, hi Petrus nunti ma Yesus, "Tuhan, kalaawe hanye na die?" ²² Yesus kaeyau, "Amun Aku hamen hanye tatap welum hampe Aku hawi lagi die, inun urusannu? Hanyu, ware uma Aku!" ²³ Katuluh sa na eyau Yesus yiru hampe ma kawan pulaksanaini, amun murid yiru puang sagar matei, padahal Yesus puang kaeyau kalayiru, ekat kaeyau, "Amun Aku hamen hanye tatap welum hampe Aku hawi lagi, inun urusannu?" ²⁴ Hanye yiru murid sa haut iwara katuluh hal yiru palus nyuratni, takam katuluh karasa sa na wara dayani yiru tuu. ²⁵ Masih rama hal sa na gawi daya Yesus, amun na surat katuluhni kiraku ang sukup litar dunia yena neu nyuratni.