¹ Daya, aku hamen hanyu karasa tuu weat parjuangan sa haut aku ulah neu hanyu, anri neu here sa naan hang Laodikia, anri neu katuluh ulun sa huan suah panalu langsung anri aku. ² Ahengku nampan atei here tahibur anri natampiisa wuang sinta hampe here naan katuluh kasugihan sa baasal teka jaminan ma pangertian anri pangetahuan teka rahasia Alatalla, hanye Kristus raerai. ³ Wuang hanye, nasandina katuluh harta teka hikmat anri pangetahuan. ⁴ Aku iwara hal iri nampan mahi ulun sa sagar ngulenu anri bahual sa rengeini ialah masuk akal. ⁵ Daya, kude tenga jasmaniku mahi bayanu, aku pada naan bayanu wuang roh, anri aku miaray kadinung hanyu ngunu sa maeh anri imannu sa taguh wuang Kristus. Tarusleh Ngiring Kristus Yesus ⁶ Jari, daya hanyu haut marine Yesus Kristus sebagai Tuhan, welumleh saratang wuang Hanye, ⁷ bawakat anri amuanleh tenganu wuang Hanye, ampitaguh imannu kala sa haut nasiar ma hanyu, anri natampenuleh anri surahan sa basyukur. ⁸ Baati-atileh nampan ada naan isakaulun sa ngajar hanyu anri filsafat sa puang badiran anri sa ngampitawang, sa baasal teka adat murunsia anri kawan roh dunia, sa puang teka ajaran Kristus. ⁹ Daya, wuang Hanye muneng katuluh kapenuan kailahian sa welum wuang wujud jasmani. ¹⁰ Hanyu haut jari penu wuang Hanye, sa hanyeyiri ulun entu katuluh pamarentah anri panguasa. ¹¹ Wuang Hanye, hanyu pada nasunat, puang makai sunat sa naulah daya tangan murunsia, kude anri sunat sa naulah daya Kristus, hanyeyiru anri netek tenga kabahumen sa badosa. ¹² Wuang baptisan, hanyu napasar baya anri Kristus, anri pada nabangkitkan sindrah Hanye mitah imannu Alatalla sa ngabangkitkan hanye hang helang ulun matei. ¹³ Kude biar dahulu hanyu haut Matei wuang palanggaran-palanggarannu anri kabahumennu sa puang basunat, Alatalla ngulah pamelumnu baya Hanye sa haut Hanye mangampuni katuluh palanggaran takam. ¹⁴ Hanye puang jari ngulah surat utang anri nuntut pakai aturan sa tau ngulah hubungan takam anri Alatalla rusak. Hanye haut ngalapni anri ngagawini hang entu kakau salib. ¹⁵ Hanye nantalau kawan pamarentah anri panguasa, balalu ngulah here mangan daya Hanye manang mitah entu kakau salib. Ada Uma Aturan-Aturan sa Naulah Murunsia ¹⁶ Daya yiru, ada maladar isakaulun pun sa ngahakimi hanyu anri masalah pangutaan anri sanaoot atawa anrau raya kaagamaan, parayaan wulan way atawa anrau sabat. ¹⁷ Katuluhni yiru ekat amma ma hal sa sagar hawi die, kude wujud sa tuuni hanye Kristus. ¹⁸ Ada maladar ulun sa katuju ngulah ialah maeh atei sa Palsu anri ipapura nyamah ma kawan malaikat. Here ialah kawan ulun sa katuju anri paninungan ma hal-hal sa aneh hampe ngulah pikiran here sakah daya pamikiran sa duniawi. ¹⁹ Ulun sa kalayiru puang nuu ma Ulu. Ulu hanye sa nyanga katuluh tenga, anri katuluh tenga na tampiisa daya kapanan ta'ulang anri daging, katuluhni yiru tumu daya ulahan teka Alatalla. ²⁰ Dami baya Kristus hanyu haut matei teka roh-roh dunia, dayainun ialah hanyu sameh tatap wat dunia,nuu ma aturan-aturan kala: "Ada negei iri, ada inam yiru, anri ada uah yiru"? ²² Aturan-aturan iri sagar wawai dami naalut daya aturan-aturan yiru naulah daya parentah anri ajaran murunsia. ²³ Aturan-aturan kala yiru dinungni ialah bijaksana anri ialah sameh samayang kude kabahumeni pakai ma tengani raerai anri maeh atei sa ipapura nelang ngampirara tenga. Kude, katuluh yiru mahi dirani salain numa ekat pakai ngampipuas tenga daging.