¹ Teka hi Paulus sa jari rasul Yesus Kristus daya kabahumen Alatalla, anri teka hi Timotius pulaksanai isaiman takam. ² Nuju kawan ulun barasis isaiman sa satia wuang Kristus hang Kolose. Anugerah mahanyu anri damai sejahtera teka Alatalla Amah takam Doa anri Antuhan Syukur hi Paulus ³ Hantek badoa mahanyu, kami basyukur eleh ma Alatalla, Amah teka Tuhan takam Kristus Yesus, ⁴ Daya kami karengei hal imannu wuang Yesus Kristus anri sinta sa naan witu hanyu neu ma katuluh ulun barasis. ⁵ Iman anri sinta yiru naan daya pangharapen sa nasadia mahanyu hang surga, sa haut hanyu rengei wuang firman kebenaran, hanyeyiru Injil. ⁶ Injil yiru haut hampe mahanyu likan haut hampe ma itar dunia anri Injil iri balalu ngahasil mua anri munge, sameh ialah sa bakajadian hang helang hanyu, hantek anrau hanyu nyanrengeini anri kataru anri ahilelo Alatalla wuang kebenaran. ⁷ Hanyu haut paajar iri teka hi Epafras, tawari isapelayanan kami sa nasinta, sa haut jari Walah Kristus sa satia ma hanyu. ⁸ Hanyelah sa haut iwara ma kami hal sintanu wuang Roh. ⁹ Daya yiru, hantek anrau kami nyanrengeini, kami puang ta'u tarie laku doa ma hanyu anri ilaku nampan Tuhan ngampenu hanyu anri pangataruen ma kabahumen-Ni wuang katuluh hikmat anri pangataruen rohani. ¹⁰ Anri kalayiru, hanyu kaiyuh welum anri sara sa patut hang hadapan Tuhan, ngampiaray-Ni wuang katuluh hal, ngampihasil wua wuang gawian sa maeh, anri tumu wuang pangataruen ma Alatalla. ¹¹ Samoga hanyu nakuatkan anri katuluh kakuaten sasuai anri kamuliaan kuasa-Ni nampan hanyu kaiyuh katuluh katekunan anri kasabaran anri sukacita. ¹² Basyukurleh ma Alatalla Amah sa haut ngulah hanyu ngampenu syarat neu narime bagian teka warisan kawan ulun barasis wuang raai. ¹³ Hanye haut ngalapas tamam teka kuasa maiyeng balalu minah takam ma karajaan Anak-Ni sa nasinta. ¹⁴ Wuang Hanye, takam haut natewuh, itah pangampunen entu dosa-dosa takam. Kristus sa Tarutama wuang Katuluh Hal ¹⁵ Hanye manyarupai Alatalla sa puang kadinung, sa pangatueh hang katuluh ulahan. ¹⁶ Daya, dagana Hanye, katuluh sa naan hang surga anri hang bumi naulah, sa kadinung anri sa puang kadinung, maeh takhta, kakuasaan, pamarentah, atawa panguasa. Katuluh bana haut naulah itah Hanye anri neu Hanye. ¹⁷ Hanye haut naan sahuaan sa lainni naan, anri katuluh bana nasanga sindrah hang wuang Hanye. ¹⁸ Hanye ialah ulu teka tenga, hanyeyiru jemaat. Hanye pada ialah sa awal, sa pangatueh hingka helang ulun Matei nampan Hanye jari sa utama teka katuluh hal. ¹⁹ Daya, Alatalla ngunu nampan katuluh kapenuan-Ni muneng wuang Hanye. ²⁰ Mitah Hanye, katuluh hal nadamaikan anri Hanye kerai, maeh sa naan hang bumi atawa hang surga, hanyeyiru naperdamaikan itah ira-Ni sa tapawak hang entu kakau salib. ²¹ Hanyu dahulu nasanawit, bamusuh anri Alatalla wuang pikirannu, anri ngulah gawian sa raat, ²² wayah yina hanyu haut nadamaikan anri tenga jasmani Kristus mitah kapateian-Ni pakai nganyarah hanyu nampan jari sasarahan sa barasis, maeh, anri puang murun hang hadapan Alatalla. ²³ Jari, tatapleh hanyu muneng wuang iman, kokoh, anri taguh, puang kaiyuh nagagunsang teka pangharapen Injil sa hanyu rengei, sa haut nasiar ma katuluh sanaulah hang kapit langit, sa dayani aku, hi Paulus, balalu jari walah. Palayanan hi Paulus ma Jemaat ²⁴ Itati, aku tuu miaray wuang kararaenku Daya hanyu hang wuang dagingku aku ngansukup inun sa kakurangen wuang kararaen Kristus, daya tenga-Ni, hanye jamaat. ²⁵ Aku jari walah jamaat sasuai anri gawian sanasarah Alatalla ma aku nampan hanyu kaiyuh ngasiar firman Alatalla anri sapenuni. ²⁶ Itilah rahasia sa nasandina teka zaman ma zaman anri teka generasi ma generasi, kude sa wayahyina haut nasantarang ma kawan ulun barasis-Ni. ²⁷ Alatalla hamen nantarang ma here kalaawe tatauni rahasia sa mulia iri hang helang kawan bangsa lain, daya Kristus naan hang wuang hanyu, hanye pangharapen teka kamuliaan. ²⁸ Kami ngasiar hal Hanye nelang nagur anri ngajar katuluh ulun anri hikmat hampe kami kaiyuh ngenei katuluh ulun jari dewasa wuang Kristus. ²⁹ Neu yirulah, aku pada bahimat, bajuang sasuai anri kuasa-Ni sa bagawi hang wuang aku.