¹ Hang andrau andrau yiru, katika murid Yesus magin ba tammah hene, keluar keluhan teka ulun Helenis ma ulun ulun Ibrani asli, ne'u kawan wawei walu isa puang na perhatikan hang wuang pelayanan panguta tiap andrau. ² Balalu, ka ruehwalas rasul yiru nerau katuluh murid andri kaeau,"Puang tu'u kami angtatahu andri firman Tuhan daya ngurus kawan panguta. ³ Daya yiru pulaksanai katuluh, ware takam midi pitu kaulun hingka penah naun rama sa paling maeh, sa penu andri Roh barasis nelang bahikmat, sa na angkat pakai tugas ati. ⁴ Daya, kami ekat ngunu ilakudua nelang iwara lengan Firman." ⁵ Keputusan yiru ngampisanang atei katuluh ulun. Here midi Stefanus, ulun isamaeh iman ni penu andri Roh Barasis, kalahie pada hi Filipus, Prokhorus, Nikanuor, Timon, Parmenas,andri hi Nikolaus, erang kaulun proselit teka Anthiokhia. ⁶ Here na ennei nadap kawan rasul, dami udi lakudoa, here nganak tangan here hang ammau ulu pitu kaulun pidian yiru. ⁷ Firman Alatalla magin rama ulun sa karengei balalu murit hang Yerusalem magin rama. Kalahie pada, kumpulan hante imam-imam magin parisaya. ⁸ Balalu, hi Stefanus penu andri berkat nelang kuasa, hanye haut ngulah hal sa ngulah kawauhen andri siri-siri ajaib hingka penah ulun rama. ⁹ Kude, papire ulun hingka Sinagoge sa na antuh ulun Libertinid, hanye yiru ulun kirene kalahie pada ulun-ulun Aleksandria, andri papire ulun teka Kilikia hampe Asia, mindri balalu bahual andri hi Stefanus. ¹⁰ Kude here,puang kaiuh puang narime kapintaren andri Roh sa ibaya Stefanus hang papaneran ni. ¹¹ Balalu andri suni-suni here ba paner ipusu ma papire kaulun nampan kaeau," Kami haut karengei ulun yana ngantuh papaneran murun nadap Muses andri Alatalla!" ¹² Balalu, here ngirak ulun rama, kawan matueh, andri ahli taurat, balalu nunung hi Stevanus, nyama hanye, balalu ngenei hanye nadap Sanhedrin. ¹³ Here ngenei saksi-saksi palsu pakai paner, "Ulun yina puang taduh-taduh ba paner nawan unengan barasis yina andri Hukum Taurat. ¹⁴ Daya, kami haut karengei hanye ka eau bahwa Yesus hingka Nazared kai ngampi hansur unengan yina balalu ngubah kawan adat istiadat sa haut na ami Muses ma takam. ¹⁵ Dami kadinung uruwawa Stefanus, katuluh ulun sa maharung hang Sanhedrin kadinung uruwawa ni ialah uruwawa Malaekat.