Ananias andri Safira nyansuba Ruh Tuhan ¹ Kude yeru, naan erang kaulun upu bangaran Ananias, baya daranganni, Safira , ngari harata wat here. ² Dan,andri pangarasaen matueh waweini, Ananias nahan mehe teka hasil arian ru ma hanye raerai, ekat ngendei mehe ni ai balalu ngandak hang hadapan pe'e kawan rasul. ³ Tapi, Petrus maharek:" Ananias, daya inun Iblis nampenu ateinu hampe hanyu ipusu ma Ruh Barasis andri nahan mehe hasil ngari tane yiru? ⁴ Hantek masih huan na ari, puangkah tane ru magun watnu? andri, udi ngarini, puangkah tane yeru naan hang imme kuasanu? Dagana inun hanyu mamikir ulahan yiti hang wuang ateinu? Hanyu puang ipusu ma murunsia, kude ma Alatalla." ⁵ Balalu, hantek karengei pander yeru, Ananias tumbang palus mitus hewuk. Maka, timbul katakuten hante ma katuluh ulun sa karengei pakara yeru. ⁶ Papire ulun muda hawi, namu kain kafan andri ngutung ni ma luar, lalu masarni. ⁷ Udi yeru, kurang labis telu jam, darangan Ananias hawi, kude hanye pakarasa inun sa haut bakajadian. ⁸ Dan,Petrus maharek ma hanye," Wara ma aku, inun hanyu ngari tane ru andri haraga sahante yiti?" Safira nyangai, "hiai, sahante yeru." ⁹ Udi yeru Petrus bapander ma hanye," daya inun hanyu andri darangannu ba mupakat nyansuba Ruh Tuhan? Tantau, kawan kia pee ulun sa haut masar darangannu masih naan hang muka awanawang andri here pada sagar nginsing hanyu ma luar." ¹⁰ Salenga , Safira tumbang hang hadapan pe'e Petrus balalu mitus hewuk. Hantek kawan ulun muda masuk, here kaindi Safira haut matei, balalu here nginsingni ma luar balalu masar hang tuhi daranganni. ¹¹ Maka, tamam katakuten hang penah ungkup dan ma kawan ulun sa karengei pakara yiti. ¹² Hene tanda ajaib dan mujijat sa hulet hang penah ulun rama mitah tangan kawan rasul dan here katuluh andri mapakat atei muneng hang Lewu Suleman. ¹³ Puang uweng teka here sa he'ei mindri bagabung baya here, kude kawan ulun kajut nawat ma mulia here. ¹⁴ Andri, naan batambah hene jumlah ulun parisaya, hang wuang Tuhan, kawan upu atawa wawei. ¹⁵ Dagana yeru, here ngendei ulun mekum ma lalan naangkadig amau tandu andri tilam himpan hantek Petrus hawi, paling puang ama ni tau wuah papire teka here. ¹⁶ Pada, naan rama ulun teka papire tumpuk riet Yerusalem sindrah hawi, ngendei ulun mekum andri sa na rasuk kawan ruh murun. Here katuluhni na samare. ¹⁷ Kude, kawan imam hante bangkit, baya kawan pangikutni, hanye yeru ulun kalumpuk Saduki,* dan here haut na tampenu andri bahiri atei. ¹⁸ Here nyamma kawan rasul andri nampasukni ma wuang panjara umum. ¹⁹ Kude yeru, hantek kamalem, erang kaulun malekat Tuhan nguka kawan awanawang panjara, nginsing here maluar, dan kaeau, ²⁰ "Hulu, indri, dan tahampe kabar ma kawan ulun hang Lewu Alatalla katuluh firman sual pamelum yena." ²¹ Dan, udi here karengei, niba nuku kaayat , here masuk ma wuang Lewu Alatalla dan mulai ngajar. Hantek Imam Besar dan kawan ulun sa sindrah hanye hampe, here ngumpul Sanhedrin dan katuluh majelis kawan tueh Israel, balalu nunyu ulun ma seper himpan ngendei kawan rasul ru nadap here. ²² Kude,hantek kawan ulun sa na huyu ru hampe, here puang panalu karueh rasul ru hang panjara. Udi yeru here mulek iwara, ²³ andri kaeau," Kami panalu panjara ru pakunsi nelang katuluh pangamanan dan kawan panjaga mindri hang hadapan awanawang, kude hantek kami ngukani, kami mahi panalu sunah erang kaulun hang wuang ni." ²⁴ Andri,hantek kapala panjaga Lewu Alatalla andri imam kapala karengei papanderan yeru, here tuu bingung andri kawan rasul ru, andri penu tingkes kalaawe wangun salenga tau hampe kalayiru. ²⁵ Udi yeru naan sa hawi iwara:" Tantau, ulun sa na ampasuk naun hang panjara, rahat mindri hang Lewu Alatalla ngajar ulun rama." ²⁶ balalu, kapala panjaga lewu Alatalla baya pangawalni tulak andri ngendei rasul-rasul ru, tapi puang andri kakarasan daya here takut wuah tawut watu daya ulun rama. ²⁷ Hantek here haut ngendei Petrus dan Yohanes, here na ampi hadap ma hadapan Sanhedrin. Balalu, Imam Besar nunti here, ²⁸ eauni:" kami haut mehet nagur naun himpan ada lagi ngajar hang wuang ngaran yiru, tapi hanyu haut nampenu Yerusalem andri ajarannu dan hanyu ba aheng himpan nanggung ira Ulun ti ma kami." ²⁹ Kude, Petrus baya kawan rasul nyangai:" Kami tatuu labis patuh andri Alatalla teka murunsia. ³⁰ Alatalla datu hiang takam haut ngamuan Yesus sa haut na wunu naun andri mantak-Ni hang balasangar. ³¹ Alatalla ngampambau Hanye hang tangan kawan-Ni iyalah Pamimpin andri Juru Salamat pakai ngami partobatan ma Israel dan paampunan kawan dosa. ³² Dan, kami ti kawan saksi teka katuluh yena, dan kalahiye pada Ruh Brasis , sa haut na ami Alatalla ma kawan ulun sa manaati-Ni. ³³ Hantek here karengei yeru, atei here mahanang balalu ngaheng munu kawan rasul yeru. ³⁴ Kude yeru, erang kaulun Farasi bangaran Gamaliel, guru Taurat sa na hurumat ulun rama mindri hang hadapan Sanhedrin dan nunyu himpan kawan rasul ru na endei ma luar erang pitus. ³⁵ balalu hanye maharek ma here:" Ui naun kawan ulun Israel, rengei mamaeh inun sa sagar na ulah naun ma kawan ulun yiti. ³⁶ Sabab , papire waktu yari, Teudas mangaku tenga n ulun penting dan kurang labis epat jatuh umma hanye. Kude, hanye na wunu dan katuluh pangikutni pisah-pasah, puang bale'e. ³⁷ Udi Teudas , Yudas teka Galilea pada amuan, hang andrau andrau sensus, dan hene ulun umma. Hanye pada na wunu dan katuluh ulun sa umma hanye pisah-pasah. ³⁸ Dagana yeru, hang wuang pakara yena, aku ngami nasehat ma hanyu: sanawit kawan ulun ti dan elah leh here. Dagana, amun ransana dan ulah gawi ni hawi teka murunsia pakara itu puang sagar bahasil. ³⁹ Kude, amun ransana yiti hawi teka Alatalla, hanyu puang sanggup nyantaduhni. Likan hanyu tau na anggap ganyah nawan Alatalla ⁴⁰ Here nu'u nasehat Gamalael,. Udi yeru, here nerau kawan rasul ru, balalu ngakasahni dan puang nunyu mun bapander ngenei hang wuang ngaran Yesus, balalu nyanapasni. ⁴¹ Daya yeru, kawan rasul yeru tulak teka hadapan Sanhedrin andri arai atei daya here naanggap patut rara na hina daya ngaran-Ni. ⁴² Dan, tiap andrau, hang Lewu Alatalla dan teka lewu ma lewu, here puang suah taduh ngajar dan nampe barita Injil amun Yesus hanye ru Kristus