Rasul-Rasul nelang Mahkamah Agama Yahudi ¹ Katika Petrus andri Yohanes bapaner ma ulun rama, hawi manalu here imam-imam, kapala panjaga Bait Allah, andri ulun-ulun Saduki, ² nelang sangit hante dagana here ngajar ulun rama andri mambarita hang wuang Yesus naan kebangkitan hang helang ulun matei. ³ Balalu, Here nyamba Petrus andri Yohanes palus namasuk here ma wuang penjara hampe ma ketuni ni dagana andrau haut kamalem. ⁴ Kude, hene hingka here sahaut persaya dagana nyanrengei paneran rasul-rasul, nelang jumlah kawan upuan hang antara here hampe kurang-labis dimempulu ribu ka ulun. ⁵ Ma ketuni ni, sasepuh, tueh-tueh andri kawan ulun pandai Taurat here bakumpul sameh-sameh hang Yerusalem, ⁶ sindrah andri Imam Besar Hanas, andri Kayafas, Yohanes, Aleksander, nelang uras ulun hingka keluarga Imam Besar. ⁷ Balalu here ngandak Petrus andri Yohanes hang penah-penah, here nunti, "Andri kuasa inun atawa andri ngaran hiye hanyu ngulah hal ina?" ⁸ Udi hiye, Petrus, natampenu andri Roh Barasis, bapander ma here kawan pamimpin bangsa andri tueh-tueh, ⁹ amun kami na pariksa andrau ina dagana ulah gawi maeh sa haut na ulah ma ulun sa maleme ina, andri sara inun ulun ina haut na samare? ¹⁰ Elah ni gawi ina nakarasa daya naun katuluh andri uras ulun Israel amun dagana ngaran Kristus Yesus, Ulun Nazaret, sa na salib naun, sa haut na bangkitkan hingka helang ulun matei, ulun ina mindri hang hadapan hanyu hang wuang keadaan sehat. ¹¹ Yesus ina hanye iru: 'Watu sa na tolak daya nu, kawan tukang watu bangunan, sa haut jari Watu Panjuru.' ¹² Nelang, mahi kasalamatan hang wuang hiye jua dagana mahi ngaran lain hang kapit langit naami hang antara murunsia sa andri ngaran iru takam ka iyuh na salamatkan. ¹³ Hantek here kadinung kaheeien Petrus andri Yohanes nelang kataru amun here iru ulun-ulun puang bapandidikan nelang awam, here jari wauh andri mulai kataru amun karueh ni suah baya andri Yesus. ¹⁴ Nelang, udi ninung ulun sa haut na samware iru mindri hang tuhi Petrus andri Yohanes, here puang tau mambantah ni. ¹⁵ Dagana iru, hantek here nunyu Petrus andri Yohanes himpan nanan Sanhedrin, here barunding sasameh here, ¹⁶ nelang kaeyau, "inun sa patut naulah takam nadap ka rueh ulun ina? Dagana, isa tanda ajaib sa luar biasa haut terjadi mitah here nelang kala iru nyata ma uras ulun sa muneng hang Yerusalem, nelang takam puang ka iyuh menyangkal ni. ¹⁷ kude, himpan hal ina puang tambah hante tasebar hang penah ulun rama, ware takam mangancam here himpan puang lagi bapander ma hiyepun hang wuang ngaran iru." ¹⁸ udi iru, here nerau Petrus andri Yohanes, balalu nunyu here rueh himpan puang bapander atawa ngajar inun pun hang wuang ngaran Yesus. ¹⁹ Kude, Petrus andri Yohanes nyanggai nelang ka eyau ma here, "Pidi, sa awe sa maeh manurut Allatala, nu'u andri hanyu atawa nu'u andri Allatala? ²⁰ Dagana kami puang tau kasuali ngantuh inun eleh sahaut na dinung nelang na rengei." ²¹ Balalu, hantek here tarus ngansam Petrus andri Yohanes, here maladar rasul-rasul iru tulak,udi puang kahaba sara nukum karueh ni dagana ulun rama sa nawat hormat Alatalla andri inun sa haut terjadi. ²² Udi hiye, ulun sa na ami kawigasen iru, haut ba umur epatpulu taun. ²³ Tawuk haut na bebaskan, Petrus andri Yohanes tulak nunung kawan hengau ni nelang mangesah inun eleh sa na antuh daya pimpinan imam andri tueh-tueh ma here. ²⁴ Pada, tawuk hengau-hengau here iru nyanrengei, here nguka suara here ma Allatala andri bulat atei ngantuh "Oh Tuhan, Hanyu sa haut ngulah langit, tane, laut andri isi ni, ²⁵ nelang kaeyau mitah Roh Barasis, mitah wawa hamba-Nu, Daut, datu nini kami: 'Daya inun bangsa-bangsa lain ngamuk, ka hiye pada andri ulun-ulun sangkal ngulah gawi sa sia-sia? ²⁶ Raja-raja dunia basiap-siap andri panguasa sameh-sameh bakumpul, nawan Tuhan nelang nawan Sa Na urapi-NI.' Mzm. 2:1-2 ²⁷ Dagana, sabujurni hang tumpuk ina haut bakumpul kai nawan Yesus, Hamba-Nu sa Barasis, sa na urapi Nu, hingka Herodes andri Potius Pilatus, sameh-sameh andri bangsa-bangsa sa lain, andri ulun-ulun Israel, ²⁸ pakai ngulah kawan ulah gawi sa daya tangan-Nu andri aheng-Nu sa huan ni hampan natampalus. ²⁹ Itati, Tuhan, dinung ansaman-ansaman here nelang ami karunia nu ma walah-Nu ina neu nahampe lengan-Nu andri katuluh isa maeh sa na aheng hang wuang ni, ³⁰ nelang Hanyu narui tangan-Nu himpan nyamare balalu ulah siri andri keajaiban-keajaiban isa naulah hang wuang ngaran Yesus, Anak-Nu sa Kudus." ³¹ Nelang, udi here laku dua, uneng here bakumpul palus gaguyuh, nelang here uras na tampenu andri Roh Barasis, palus nahampe lengan Alatalla andri kaheeien. Pamelum Ulun Persaya ³² Balalu, kumpulan here sa persaya bulat atei nelang amiruwe. mahi erang ka ulun pun sa iwara neu banda iru watni, kude katuluh banda sa naan iru sagarabat. ³³ Udi hiye, andri kuasa sa hante rasul-rasul ngami kesaksian here neu kebangkitan Tuhan Yesus nelang karunia sa hante naan hang amau here katuluh. ³⁴ Mahi erang ka ulun pun sa kakurangen hang antara here daya uras ulun sa ampun ume atawa lewu, ngari ni, nelang ngenei hasil ari'anni, ³⁵ balalu here ngandak hang pe'e kawan rasul, nelang na bagi-bagi ma uras ulun sasuai andri kaparluan ni. ³⁶ Kala yeru pada hi Yusuf, ulun Lewi, katurunan Siprus, sa na heraw pada daya kawan rasul, Barnabas, sa bararti anak panghiburan' , ³⁷ ngari ume wat ni balalu ngenei duit ni, palus nganak hang pe'e kawan rasul.