¹ Udi hie, Imam Besar kaeyau, "Tu'u sa kalahie?" ² Balalu , Stefanus kaeyau, "Kawan pulaksanai anri ammah-amah, sanrengei aku. Alatalla Ammah sa Mahamulia iwara ma datu nini takam, hi Abraham, hantek hanye masih muneng hang Mesopotamia, sahuan hanye manatap hang Haran, ³ nelang kaeyau ma hanye, 'Tulak teka tane ranu tumpuk unengnu muneng taati, tanan uras kawan kulawarga pulaksanainu, udi hie tuju ma tumpuk sa na tutui dayaKu hampi hanyu.' ⁴ Udi hie, Abraham nanan tane tumpuk ulun Kasdim balalu manatap hang tumpuk Haran. Udi teka yiru, udi ammahni matei, Alatalla nunyu hanye mihadit pi tane tumpuk ina, unengnu manatap taati. ⁵ Kude, Alatalla puang ngami warisan ma hanye, sunah erang ka lammar tane gin mahi, ekatni Alatalla bajanyi ne'u ngami tane ma Abraham hampan tau jari hak milikni ma katurunan sa udi hanye, biar hampe katika yiru Abraham huan baisi anak. ⁶ Kude, Alatalla kaeyau kala ina, katurunanni sagar jari ulun wau hang tumpuk asing yiru anri here sagar na walah nelang na aniaya salawah epat jatun taun. ⁷ Kude, Aku sagar nukum bangsa sa haut ma walah here, eyau Alatalla, nelang udi hie pada ngennei here kaluar teka yiru ma unengan sa tau unengan here baibadah. ⁸ Udi hie, Alatalla ngami ma Abraham janyi sunat, balalu Abraham jari ammah teka Ishak anri ngampi sunatni hang umur walu' taun. Ishak jari ammah Yakub, Yakub jari ammah teka rueh walas ammah leluhur takam. ⁹ Daya hiri' anri hi Yusuf, datu nini takam ngari' hanye ma Mesir. Kude Alatalla saratang nyinrah hi Yusuf, ¹⁰ nelang nyalamat hanye teka uras kararaenni, anri ngami hanye anugerah nelang kabijaksanaan hang hadapan Firaun, Raja Mesir, sa balalu midi' hanye jari pamimpin hang Mesir anri hang istanani. ¹¹ Katika yiru, hawi bencana kelaparan hang katuluh tumpuk Mesir anri Kanaan, sa ngulah kararaen hant, datu nini takam mahi kaiyuh panguta. ¹² Kude, hantek Yakub karengei naan gandum hang Mesir hanye nunyu datu nini takam ma yaru irulah pihawian here sa pertama. ¹³ Hang pihawian here sa karueh, Yusuf iwara bahwa hanye yiru pulaksanai here, balalu Yusuf iwara ne'u kulawargani yiru ma Firaun. ¹⁴ Udi hie, Yusuf ngirim pesen palus nerau ammahni hi Yakub anri katuluh kulawarga pulaksanaini sa bajumalah pitumpulu dime ka ulun ne'u hawi ma Mesir. ¹⁵ Balalu, Yakub tulak ma Mesir palus matei hang yaru, hanye baya datu nini takam. ¹⁶ Teka yaru pasaran here na hadit ma Sikhem ma tane' sa haut na widi daya Abraham anri sajumalah duit teka kawan iya Hemor hang Sikhem. ¹⁷ Kude, katika magin riet janyi yiru, sa haut na janyi Alatalla ma hi Abraham, bangsa iru magin batammah hene hang Mesir, ¹⁸ hampe naan raja lain hang Mesir sa puang kataru anri hi Yusuf. ¹⁹ Raja yiru ngakal bangsa takam nelang manyiksa datu nini takam hampe mamaksa here ngumpe kawan genna hampe here puang kaiyuh batahan welum. ²⁰ Hang masa yiru, Moses nakayaan hanye tu'u manuwu hang mate' Alatalla. Hi Moses na urus hang lewu ammahni salawah telu wulan. ²¹ Udi hie', hantek hanye na umpe', iya wawei Firaun ngalap anri ngampihanteni iyalah iyani raerai. ²² Balalu, Moses na uruk ajar hang wuang uras hikmat kawan ulun Mesir nelang hanye bakuasa hang wuang eyau antuh nelang ulah gawini. ²³ Kude, hantek Moses ganap baumur epat pulu taun, hulet aheng hang wuang ateini ne'u nunung kawan pulaksanaini, sa katurunan Israel. ²⁴ Hantek hanye kadinung erang kaulun teka here na perlakukan puang adil daya ulun Mesir, Moses hawi ne'u mambela ulun sa na aniaya iru nelang maleh balalu munu' ulun Mesir iru. ²⁵ Moses mina' kawan pulaksanaini sagar kataru amun Alatalla ngami here kasalamaten mitah hanye, kude hayangni here puang kataru. ²⁶ Hang anrau salanjutni, Moses nunung kawan ulun Israel sa rahat babur, balalu hanye bausaha ngampirakat here, nelang kaeyau, 'U, ang sah naun na ipulaksanai, inun ngulah sa ngampihanang sasameh?' ²⁷ Kude, ulun sa ngampihanang pulaksanaini ru ngelah Moses ma lapeh nelang kaeyau, 'Hie' sa ngenat hanyu jari panguasa nelang hakim hang penah kami? ²⁸ Inun hanyu hamen munu' aku iyalah hanyu munu' ulun Mesir ru hingkariwe?' ²⁹ Nyanrengei panner ulun iru, Moses rari mitun teka Mesir balalu jari ulun wa'u hang tane ranu Midian. Hang yaru, hanye jari ammah teka rueh kaulun iya upu. ³⁰ Udi ganap empat pulu taun, erang kaulun malekat nantarang diri ma hi Musa hang jumpun haket Gunung Sinai, iyalah lela apui hang padang runrui. ³¹ Hantek Moses nantauni, hanye wauh anri paninunganni yiru. Balalu, hantek hanye nyariet ne'u nantau labih lentah lagi, rengeini lengan Alatalla kaeyau ³² 'Akuleh Alatalla datu nininu, Alatalla Abraham, Alatalla Ishak, Alatalla Yakub.' Moses balalu neter daya takut nelang puang he'ei nantauni labih lentah lagi. ³³ Balalu, Alatalla kaeyau ma hanye, 'Lapas sannal teka pee'nu daya hang awe hanyu minri taati iru tane barasis. ³⁴ Aku tu'u-tu'u haut nantau rara' umat-Ku hang tane Mesir, nelang pada haut nyanrengei hanang atei here. Aku haut minau ne'u manyalamat here. Daya yiru mayati, Aku hamen ngutus hanyu ma Mesir. ³⁵ Moses, sa puang here narime nelang kaeyau, 'Hie' sa nutui hanyu jari panguasa anri hakim hang penah kami?' Hanye yena sa na tutui daya Alatalla ne'u, jari panguasa nelang panyalamat, mitah tangan malekat isa nantarang dirini hang padang runrui. ³⁶ Hanye sa mamimpin here kaluar, nelang ngulah mujizat anri kawan siri ajaib hang tane Mesir anri Laut Merah kalahie pada hang jumpun haket salawas epat pulu taun. ³⁷ Moses ina sa kaeyau ma bangsa Israel, 'Alatalla sagar membangkitkan ma hanyu erang kaulun nabi nyalah aku hang antara naun ipulaksanai. ³⁸ Hanye ina erang kaulun sa naan baya ungkup hang jumpun haket baya malekat sa bapanner ma hanye hang Gunung Sinai anri baya datu nini takam hanye haut narime lengan Alatalla sa welum sa haut na anyu ma takam. ³⁹ Datu nini takam puang narime nelang puang nu'u anri hi Moses balalu hamen ngampisingkirni, nelang hang wuang atei here pada hamen mulek ma Mesir, ⁴⁰ eyau here anri Harun, 'Ulah ma kami kawan dewa sa sagar takia hang hadapan kami, daya hi Moses ina, sa ngennei kami kaluar teka tane Mesir, kami puang karasa inun sa haut terjadi anri hanye. ⁴¹ Hantek yiru, here ngulah erang kawua patung anak sapi, pada ngami parapah ne'u berhala yiru, nelang here mi'arai mihewu anri kawan pigawian tangan here yiru. ⁴² Kude, Alatalla bapaling teka here anri maladar here nyammah bala tentara langit, iyalah sa haut na tulis hang wuang kitab kawan nabi, 'Inun sa hanyu naan suah ngennei ma Aku kawan situa sa haut na samalis ne'u parapah salawah epat pulu taun hang jumpun haket, u umat Israel? ⁴³ Hanyu ngennei kemah Molokh baya bintang dewanu, hi Refan, patung sa na ulahnu ne'u na sammahnu, daya yiru Aku sagar ngumpe hanyu ma sabarang Babel.' Amsal 5:25-27 ⁴⁴ Datu nini takam baisi Kemah Kesaksian hang jumpun haket, iyalah sa haut na wara daya Alatalla hantek bapanner anri hi Moses, ne'u ngulahni sasuai anri gambaran sa haut na dinungni . ⁴⁵ Udi narime kemah yiru, datu nini takam ngenneini masuk sinrah anri hi Yosua, hantek marabut tane here teka kawan bangsa lain, sa haut na singkir daya Alatalla teka hadapan datu nini takam, hampe masa Daud. ⁴⁶ Daud kaiyuh lelu sinta hang hadapan Alatalla anri laku ne'u iyuh ngammuan unengan muneng ma Alatalla Yakub. ⁴⁷ Kude, Salomo sa ngammuan erang kawua lewu ma Hanye. ⁴⁸ Kude, sa Mahatinggi puang muneng hang wuang lewu sa naulah daya tangan murunsia, iyalah sa haut na wara daya nabi, ⁴⁹ 'Hang langit iru takhtaKu, ammau tane yiru uneng pirarahanKu. Lewu inun sa hamen na ammuan dayanu pi Aku?' Alatalla kaeyau, 'Atawa, inun sa uneng istirahatKu? ⁵⁰ Ang neh tanganKu sa ngulah katuluh ni yena?' Yesaya 66:1-2 ⁵¹ U, naun kawan ulun sa mape' ulu, sa puang basunat atei anri silu, naun aur nawan Roh Barasis, iyalah datu nini naun! ⁵² Kawan nabi awe sa puang suah na palijara daya datu nininu? Nelang, here munu' kawan ulun sahuan kawan nabi, daya here iwara kabar ne'u pihawian Sang Kebenaran, sa taati haut ngulah hanyu raerai jari pangkhianat dan tukang wunnu. ⁵³ Hanyu, sa haut narime Hukum Taurat iyalah sa haut na tahampe daya kawan malekat, kude hanyu puang tau maliharani!" ⁵⁴ Hantek here nyanrengei kawan hal yiru, atei here muar rigat nelang girigiten anri hi Stefanus. ⁵⁵ Kude, Stefanus sa haut na tampenu daya Roh Barasis nantau ma ammau langit anri kadinung pihante Alatalla, nelang Yesus sa minri hang tuhi kawan Alatalla. ⁵⁶ Stefanus kaeyau, "Rengei naun! Aku katantau langit pauka anri Anak Murunsia sa minri hang tuhi kawan Alatalla. ⁵⁷ Kude, here nantiak anri lengan sa mehet nelang nutup silu here. Here pakat ne'u nyarang' hi Stefanus. ⁵⁸ Udi hie, here mait hi Stefanus kaluar teka tumpuk balalu mulai medak hanye anri watu. Balalu udi hie, kawan ulun sa kadinung nguka jubah here, nelang ngannakni hang riet pe'e erang kaulun iya bangaran Saulus. ⁵⁹ Balalu, here tatap medak hi Stefanus sa nantiak nelang kaeyau, "Tuhan Yesus, tarimeleh rohku." ⁶⁰ Udi hie, nelang nepet ulu' alep, hanye kaeyau anri lengan sa mehet , "Tuhan, ada hampe here nangung dosa yena!" Balalu, udi hanye kaeyau kalayiru hanye matei.