¹ "Pulaksana'i andri kawan amah, rengei pembelaan ku taati ma naun." ² Balalu, katika here karengei bahwa Paulus nerau here h ang wuang bahasa Ibrani, here magin suni, balalu Paulus kaeau, ³ "Aku erang kaulun Yahudi, lahir hang Tarsus, Kilikia, kude na ampihante hang tumpuk yina, naajar hang bawah Gamaliel andri ketat sesuai hukum datu nini takam, balalu jari taat ma Alatalla, sameh andri naun hang andrau yina. ⁴ Aku ngahanangen pengikut Ni hampe here matei, nuruk balalu nampasuk here, upu maupun wawei ma wuang penjara, ⁵ Ialah pada Imam Besar pada katuluh majelis penatua tau basaksi maaku. Hingka here aku narime surat-surat ma kawan pulaksana'i hang Damsyik balalu tulak lepuh nuruk here sa naan hang yaru ma Yerusalem jari tahanan sa ka'i na hukum. ⁶ Balalu, terjadilah, padingian aku ganyah hang lalan nelang ka'i hampe hang Damsyik, kakira hang penah andrau, salenga naan cahaya mara'ai hingka langit mara'ai ngaliling aku. ⁷ Aku tumang ma tane nelang karengei lengan kaeau ma aku , 'Saulus, Saulus daya inun hanyu ngahanangan Aku?' ⁸ Balalu , aku nyanga'i,'Hiesa Hanyu, Tuhan?' Balalu, hanye kaeau ma aku, 'Akulah Yesus hingka Nazaret, sa ganyah hanyu kahanangen.' ⁹ Kawan ulun sa baya aku kadinung cahaya yiru, kude puang kataru lengan Ulun sa ganyah bapaner ma aku. ¹⁰ Balalu, aku kaeau, 'Inun sa harus na ulah dayaku, Tuhan?' Balalu Tuhan nyanga'i aku, 'Mindri balalu tulak ma Damsyik, bulu hang yaru, hanyu ka'i na wara katuluh sa haut natantu pakai na gawi nu.' ¹¹ Balalu, ganyah aku puang kadinung daya kemuliaan cahaya yiru, aku na ayak daya kawan ulun sa sindrah aku balalu masuk ma Damsyik." ¹² Udi yiru, naan ulun bangaran Ananias, ulun saleh menurut Hukum Taurat, andri nakenal maeh daya katuluh ulun Yahudi sa muneng hang yaru, ¹³ hawi ma aku, balalu udi mindri hang tuhi aku, hanye kaeau, 'Pulaksana'i Saulus, kadinunglah!' Balalu, ganyah yiru pada, aku tau kadinung lagi balalu kadinung hanye. ¹⁵ Balalu, hanye kaeau, 'Alatalla datu nini takam menetapkan hanyu pakai mantaru kabahumen Ni andri kadinung sa Wuah, baya karengei lengan hingka wawa Ni, ¹⁵ daya hanyu ka'i jari saksi Ni ma katuluh ulun ne'u inun sa haut hanyu kadinung andri karengei. ¹⁶ Balalu, taati, daya inun hanyu unte-unte? Amuan dan na apandrus hanyu, nelang nabarasih dosa-dosanu nelang nerau ngaran Ni."' ¹⁷ ''Ganyah aku mulek ma Yerusalem balalu rahat ilakudua hang Bait Alatalla, aku na kuasai Roh, ¹⁸ balalu aku kadinung Hanye bapaner maaku, 'Irarereu andri hinang kaluar hingka Yerusalem daya here puang akan narime kesaksian nu ne'u Aku.' ¹⁹ Balalu, aku kaeau, 'Tuhan, here raerai karasa bahwa aku nelang nuruk here sa persaya ma Hanyu hingka isa sinagoge ma sa lain ni. ²⁰ Udiyiru, ganyah ira saksi Nu, Stefanus, na tundrak, aku raerai ganyah mindri hang yaru, satuju,nelang nyaga pama kawan ulun sa munu ni.' ²¹ Udi yiru, Yesus kaeau ma aku,'Tulaklah! Daya, aku kai ngutus hanyu lawit ma kawan bangsa lain.'" ²² Ulun rama yiru nyandrengei Paulus hampe ma paneran ni yina. Udi yiru, katuluh here ba paner nelang kaeau, "Singkir ulun ialah yiru hingka amau tane daya hanye puang pantas welum!" ²³ Balalu sementara here miuik eleh, nelang numuk jubah here,nelang namur habu ma udara, ²⁴ kepala pasukan marintah supaya Paulus na ennei ma markas, nelang kaeau bahwa Paulus harus na pariksa andri cambukan nampan hanye kahaba alasan inun ngulah here miuik nawan hanye kalayiru. ²⁵ Kude, dami here udi ngansang hanye andri kawan tadi kudit, Paulus kaeau ma perwira sa mindri hang riet hanye, "Inunkah sah ma naun pakai ngakasah erangkaulun warga negara Roma andri puang naadili?" ²⁶ Dami perwira yiru karengei, hanye tulak ma kepala pasukan balalu iwara ma hanye, eauni, "Inun sa sagar na ulah daya nu? Daya, ulun yina erangkaulun warga negara Roma.'' ²⁷ Balalu, kepala pasukan yiru hawi bulu kaeau ma hi Paulus, "Eauni ma aku, inunkah hanyu erangkaulun warga negara Roma?" Balalu, Paulus kaeau, "Hiai." ²⁸ Kepala pasukan yiru nyangai, "Aku kahaba kewarganegaraan yina andri jumalah duit sa hene .''Balalu, Paulus kaeau, "Kude, aku jari warga negara daya kelahiran." ²⁹ Balalu, kawan ulun sa ka'i mariksa Paulus irarereu nanan hanye nelang kepala pasukan jari takut dami hanye karasa bahwa Paulus erangkaulun warga negara Roma nelang hanye haut nuruk ni. ³⁰ Kude, udi andrau yiru, daya kepala pasukan hamen karasa alasan sa bujurni inun ngulah Paulus na tuduh daya kawan ulun Yahudi yiru, hanye napas Paulus andri marintah kawan imam kepala andri katuluh Sanhedrin napan bakumpul, balalu hanye ngenei Paulus minau balalu ngampihadapni ma penah-penah here.