Paulus Tulak ma Kota Yerusalem ¹ Udi kami bapisah anri here kami pada tulak, kami balayar ma tumpuk Kos, hang anrau, ma ketuni kami ma tumpuk Rodos, teka yiru ma tumpuk Patara, ² Balalu udi kami kahaba kapal kami nyabarang ma tumpuk Fenisia, kami mamai kapal yiru palus balayar. ³ Hantek kami haut mulai nantau tumpuk Siprus, kami mitah tuhi kawi tumpuk yiru balalu nampalus balayar ma tumpuk Siria, udi hie minau hang tumpuk Tirus daya kapa sagar ngampinau enneianni. ⁴ Dami panalu anri kawan murid, kami muneng hang yau salawah pitu anrau. Nelang, mitah Roh, here tatap ngami patataan ma Paulus hampan puang tulak ma tumpuk Yerusalem. ⁵ Dami katika kami hang yaru haut galis, kami tulak nampalus pakiaan kami. Here katuluh, baya matueh wawei anri kawan iyani, ngatet kami hampe ma luar tumpuk. Balalu, udi kami nepet ulu alep nelang lakudoa, ⁶ kami iwara pitulakan kami ma here. Udi hie, kami mamai ma kapal balalu here pada mulek mudi ma lewu. ⁷ Udi kami nampalus pakiaan teka tumpuk Tirus, kami hampe hang tumpuk Ptolemais, kami muntane kawan pulaksanai sa parisaya nelang muneng baya here erang anrau. ⁸ Ma ketuni ni, kami nampalus pakiaan kami tulak ma tumpuk Kaisarea, kami masuk ma lewu orang kaulun Pambarita sa bangaran Filipus hanye iru erang kaulun teka pitu kaulun yiru, balalu muneng baya hanye. ⁹ Hanye baisi epat kaulun iya bujang paruna sa pannai banubuat. ¹⁰ Nelang kami muneng hang yiru papire anrau, erang kaulun nabi bangaran Agabus minau teka tumpuk Yudea. ¹¹ Balalu, dami nunung kami, hanye ngalap panning Paulus palus nuruk tangan anri pe'eni raerai, balalu kaeyau, "Iti sa na wara daya Roh Barasis, 'Anri sara yena kawan ulun Yahudi hang tumpuk Yerusalem sagar nuruk ulun sa baisi panning ina nelang nyarahni ma tangan kawan bangsa lain.'" ¹² Dami kami karengei hal yiru, kami anri kawan ulun sa muneng hang yaru laku ma hi Paulus hampan hanye puang tulak ma tumpuk Yerusalem. ¹³ Balalu, hi Paulus kaeyau, "Inun sa haut na ulah daya naun, nungkau nelang ngampihanang ateiku? Daya, aku haut siap, puang ekat nahuruk, hampe matei hang tumpuk Yerusalem ne'u ngaran Tuhan Yesus." ¹⁴ Kude, daya hi Paulus puang nu'u na wara kami balalu suni ekat kaeyau, "Elahleh aheng Alatalla sa jari." ¹⁵ Udi papire anrau yiru, kami katuluh basiap-siap balalu tulak ma tumpuk Yerusalem. ¹⁶ Papire kaulun murid teka tumpuk Kaisarea pada umma baya anri kami balalu ngennei kami ma lewu hi Manason, ulun teka tumpuk Siprus, erang kaulun murid sa haut lawah, sa baya hanye kami muneng. ¹⁷ Dami kami hampe ma tumpuk Yerusalem, kawan pulaksanai sa sameh parisaya nyammut kami anri kaarayen. ¹⁸ Balalu, ma ketuni ni, hi Paulus tulak baya kami nunung hi Yakobus, anri katuluh tueh ungkup pada hawi. ¹⁹ Udi nahampe tabe ma here, hi Paulus mulai bakesah isa pangisa hal sa haut na ulah daya Alatalla hang penah kawan bangsa mitah pelayananni. ²⁰ Balalu, hantek here karengei kesah iru, here nawat Alatalla. Udi hie, here kaeyau ma hi Paulus, "Dinung, Pulaksanai, papire ribu kaulun hang penah kawan ulun Yahudi hang yaru sa haut jari parisaya nelang here katuluh ngalut nu'u anri Hukum Taurat, ²¹ anri here haut na wara ne'u hanyu, hanye yiru hanyu sa ngajar katuluh kawan ulun Yahudi hang penah kawan bangsa lain ne'u iwaleng teka hukum Moses, nelang iwara pada ma here ne'u puang nyunat kawan iya here atawa puang welum ngalut nu'u anri adat istiadat takam. ²² Balalu, kalaawe itati? Here himat haut nyanrengei amun hanyu haut hawi ma yati. ²³ Daya yiru, ulah nyalah inun sa na wara daya kami ma hanyu. Hang penah kami naan epat kaulun sa rahat basumpah janyi. ²⁴ Ennei here baya hanyu nelang ampibarasis tenga dagingnu anri here pada, balalu wayat kawan biyaya here hampan here pada tau bacukur. Mitah yiru, katuluh ulun karasa amun surah ussu kawan hal sa haut na wara ma here ne'u hanyu, padahal hanyu pada welum ngalut nu'u anri Hukum Taurat. ²⁵ Kude, ne'u kawan bangsa lain sa haut jari parisaya, kami haut nulis surat nelang ngalap kaputusan hampan here mahindar teka, 'kawan lunek sa haut na sarah ma kawan berhala, anri teka ira kawan situa sa na ke'at, kalahie pada teka dusa ne'u kawan sa cabul."' Paulus Najama ²⁶ Balalu, hi Paulus ngennei kawan ulun yiru, hang anrau ma ketuni ni, udi hanye ngampibarasis tenga dagingni baya anri here, hanye masuk ma wuang Lewu Alatalla nelang iwara ne'u katika ibarasis sagar luput hantek kurban pararah na sarah ma here. ²⁷ Hantek hampe ganap pitu andrau, kawan ulun Yahudi teka Asia, dami here nantau hi Paulus hang Lewu Alatalla, here mahasut kawan ulun rama anri nyamma hi Paulus, ²⁸ nelang nantiak, " U kawan ulun Israel, awat! Ulun ina sa haut ngajar tiap ulun hang awe-awe ne'u nawan bangsa takam, anri Hukum Taurat, anri unengan yena. Nelang, labis teka yiru, hanye haut ngennei kawan ulun Yunani masuk ma wuang Lewu Alatalla anri haut ngampibere uneng barasis yena!" ²⁹ Daya, sahuan yiru here haut kadinung hi Trofimus, ulun tumpuk Efesus, sameh-sameh baya hanye masuk ma wuang tumpuk jari here minna hi Paulus ngennei hanye masuk ma wuang Bait Alatalla. ³⁰ Balalu, ridu rareh erang katumpuk nelang kawan ulun bakumpul hang yiru. Here nyamma hi Paulus nelang ma'itni kaluar teka Lewu Alatalla, udi hie kawan wawanawang Lewu Alatalla hinang na tutup. ³¹ Hantek here bausaha munnu hi Paulus, hampe habar ma kapala pasukan Roma amun erang katumpuk Yerusalem rahat ridu rareh,. ³² Hantek yiru pada, hanye ngennei kawan prajurit anri kawan perwira, balalu nempat minau nunung here. Dami, kawan ulun rama iru nantau kapala pasukan anri kawan prajurit yiru hawi, here mayu ngakasah hi Paulus. ³³ Balalu, kapala pasukan nyariet hi Paulus anri nyamma hanye, nelang nunyu hampan hi Paulus na huruk anri rueh rantai. Udi hie, hanye nunti hie sa hi Paulus anri inun sa haut na ulah dayani. ³⁴ Kude, mehe' teka kawan ulun rama yiru nantiak mayaru mayati. Balalu, katika hanye puang karasa anri tu'u inun panyabab ridu rareh iru, hanye nunyu hampan hi Paulus na ennei ma markas. ³⁵ Hantek hanye hampe hang tukat, hi Paulus harus na eteh daya kawan prajurit dayagana penu' kawan ulun bakumpul, ³⁶ daya kawan ulun rama iru tatap umma ma awe hi Paulus na ennei, nelang nantiak, "Hinang ampisingkir hanye!" ³⁷ Hantek hi Paulus hamen na ennei masuk ma wuang markas, hi Paulus kaeyau ma kapala pasukan, "Iyuh sah aku iwara papire hal ma hanyu?" Balalu, kapala pasukan yiru manjawab, "Inun hanyu tau bahasa Yunani?" ³⁸ Amun kalairu, hanyu na lain ulun tumpuk Mesir sa papire katika yari haut ngulah pemberontakan anri pamimpin epat ribu kaulun tukang wunnu ma padang gurun?" ³⁹ Kude, hi Paulus kaeyau, "Aku na erang kaulun Yahudi teka tumpuk Tarsus, tumpuk Kilikia, erang kaulun warga teka tumpuk sa haut terkenal. Aku laku awat, ammi ijin hampan aku tau bapanner ma kawan ulun rama iru." ⁴⁰ Balalu, hantek kapala pasukan iru ngami ijin, hi Paulus minri hang ammau tukat nelang ngami isyarat ma kawan ulun rama iru anri tanganni. Balalu, hantek kawan ulun haut sunni, hanye bapanner ma here makai bahasa Ibrani nelang kaeyau.