¹ Hal yena terjadi, panraian Apolos naan hang Korintus, Paulus malupui tumpuk padalaman hampe hang Efesus. Hang yaru, hanye panalu papire murid. ² Paulus maharek ma here,"Inun hanyu narime Ruh Barasih hantek hanyu haut parisaya?" Here nyangai,"Puang, malah kami huan suah karengei amun naan Ruh Barasih." ³ Balalu, Paulus maharek,"Hawuang inun, udi yeru, hanyu na apanrus?" Eau here,"Hawuang panrusan Yohanes." ⁴ Paulus maharek,"Yohanes ngapanrus anri panrusan partobatan, nelang iwara kawan ulun himpan parisaya ma Erangkaulun sa sagar hawi udi hanye, hanyeru ma Yesus." ⁵ Udi here karengei neu hal yena, here na apanrus hang wuang ngaran Tuhan Yesus. ⁶ Balalu, hantek Paulus haut nyanrapak tanganni hang amau here, Ruh Barasih hawi hang amau here, lalu here mulai bapaner wuang masam bahasa anri banubuat. ⁷ Here katuluh bajumalah kakira rueh walas kaulun kawan upu. ⁸ Maka, Paulus masuk ma sinagoge balalu bapaner anri mahi katakuten salawah telu wulan, nelang basurah anri ngampiyakin here neu Karajaan Alatalla. ⁹ Kude yeru, hantek papire kaulun nangkape atei anri napis parisaya, saratang ngantuh kawan hal sa puang patut neu Lalan yeru hang hadapan ulun rama, Paulus nanan here andri ngenei kawan murid tulak, sambil basurah tiap andrau hang sakulah Tiranus. ¹⁰ Hal yena patampalus salawah rueh taun ngulah katuluh ulun sa muneng hang Asia karengei lengan Tuhan, inun yiru kawan ulun Yahudi atawa kawan ulun Yunani. ¹¹ Alatalla ngulah hene mujijat sa tuu tamam itetei tangan Paulus, ¹² hampe sapu tangan atawa kain panuruk pingang sa suah napakai Paulus na endei ma kawan ulun sakit, maka panyakit here wawai anri kawan ruh jahat kaluar teka here. ¹³ Kude, papire dukun Yahudi sa takia bakuliling bausaha ngantuh ngaran Tuhan Yesus ma kawan ulun sa karasukan ruh jahat nelang kaeau,"Aku nyumpah naun hang wuang ngaran Yesus sa nawara Paulus." ¹⁴ Pitu anak upu Skewa, isa sa jari imam besar Yahudi, sa ngulah gawi yeru. ¹⁵ Kude yeru, ruh jahat ru nyangai anri kaeau ma here,"Aku kataru Yesus anri aku karasa neu Paulus, kude hiye hanyu?" ¹⁶ Balalu, ulun sa karasukan ruh jahat yeru nanturak nunung here, anri bakuasa amau here, nelang nyantalau here katuluh hampe here mitun teka lewu nelang tenga babentur andri batan. ¹⁷ Hal yena na karasa daya katuluh ulun Efesus, inun yiru kawan ulun Yahudi atawa kawan ulun Yunani. Anri, here uras penu katakuten anri ngaran Tuhan Yesus batambah namulia. ¹⁸ Rama teka helang here sa haut parisaya santar hawi, nelang mangakui anri mambarita kawan ulah gawi here. ¹⁹ Balalu, hene teka here sa suah ngulah alimu pitua, mangumpul kawan buku here balalu nutungni hang penah ulun rama. Anri, here mahitung haraga kawan buku yeru anri kahaba nilaini hampe 50.000 kaping perak. ²⁰ Jari, lengan Tuhan magin welum anri bakuasa. ²¹ Udi kawan hal yeru luput, wuang Ruh, Paulus ngaheng tulak ma Yerusalem udi hanye haut nampitah Makedonia andri Akhaya, nelang maharek,"Udi aku naan hang yaru, aku pada tulak ma Roma." ²² Anri, udi ngutus rueh kaulun sa malayanini ma Makedonia hanyeru Timotius anri Erastus, hanye raerai muneng papire wayah hang Asia. ²³ Kakira waktu hantek yeru, hang yaru timbul rawek rungkak sa tamam daya Lalan yeru. ²⁴ Daya, naan ulun bangaran Demetrius, erang kaulun sa gawianni ngulah kawan ampatung perak Dewi Artemis, ngami panghasilan puang dutit ma kawan tukang ni. ²⁵ Kawan tukangni yeru kumpulni baya kawan pagawai sa alin hang gawian sameh balalu maharek,"kawan pulaksanai, naun karasa amun rauh welum takam hasil teka usaha yena. ²⁶ Balalu, hanye katantau nelang karengei, puang ekat hang Efesus tapi ane hang katuluh Asia, Paulus haut ngami kayakinan anri ngulah hene ulun iwaleng nelang ngantuh Alatalla sa na ulah anri tangan murunsia puangleh Alatalla. ²⁷ Hal yena babahaya puang ekat usaha takam sagar lawu ma wuang kahinaan, tapi pada kuil Dewi Artemis sa agung yeru puang sagar dutit jua naperhitung, anri hanye, sa nasambah hang katuluh Asia anri dunia, sagar kawawaian kaagunganni." ²⁸ Hantek here karengei hal yena, here tuu sangit anri ridu rungkak nelang miuwik," Agungleh Artemis, dewi ulun Efesus!" ²⁹ Balalu, tumpuk yeru haut penu kakasauen andri here iwawansit sinrah ma balai kesenian nelang nyama narik Gayus anri Aristarkhus, ulun Makedonia sa hengau isa pakiyaan anri Paulus. ³⁰ Kude, hantek Paulus hamen tulak masuk helang ulun rama yeru, kawan murid puang maladarni. ³¹ Malah, papire pamuka Asia sa ba hengau anri hanye ngirim pesen ma hanye anri kakune ilaku ma hanye himpan puang nyarah tenga ma balai kesenian yeru. ³² Maka, mehe miuwik wusi paner sa puang lentah anri mehe sa lainni, daya pikumpulan yeru hawuang kakasauen anri mehe tenga pakarasa tarung inun alasan here haut hawi bakumpul. ³³ kawan mehe teka ulun rama yeru nanguh Aleksander dagana kawan ulun Yahudi nyuun hanye ma hadapan, anri udi Alexander ngami isarat anri tanganni, hanye ba aheng ngulah pambelaan hang hadapan ulun rama. ³⁴ Kude, hantek here karasa Alexander yeru ulun Yahudi, kurang labis rueh jam, here katuluh miuwik anri isa suara," Agungleh Artemis, dewi ulun Efesus!" ³⁵ Udi panitera tumpuk ngampitanang ulun rama yeru, hanye maharek," Ui kawan ulun Efesus, hiye ulun sa pakarasa amun tumpuk Efesus ti panjaga kuil Dewi Artemis sa agung anri sa minau teka langit? ³⁶ Jari, daya kawan hal yeru puang tau nasanggah, hanyu sabujurni tatap tanang andri ada ngalap tindakan babaran. ³⁷ Sabab, hanyu haut ngenei kawan ulun ma yena, sa puang mambegal kuil atawa ngararupus dewi takam. ³⁸ Dagana yeru, jaka Demetrius anri kawan tukang sa sameh andri hanye naan sangkal ma erang kaulun, pangadilan na uka anri naan prokonsul. Elahleh here nampe tuntutan isa andri sa lainni. ³⁹ Kude, jaka hanyu hamen hal sa lain, hal yeru tau naselesaikan hawuang sidang rakyat ngumba hukum. ⁴⁰ Sabab, takam naan hawuang bahaya natuduh ngulah karusuhen anrau yena dagana mahi naan alasan inun jua sa iyuh takam ngami panjalasan neu pikumpulan sa kasau yena." ⁴¹ Udi hanye bapander kawan hal yena, hanye mambubar pikumpulan ulun yeru.