¹ Udi yeru, Paulus nanan Atena anri tulak ma Korintus. ² Anri, Paulus manalu ulun Yahudi bangaran Akwila, katurunan Pontus, wau leh hawi teka Italia baya matuehwaweini, Priskila, daya Klaudius haut ngami parentah ma katuluh ulun Yahudi himpan nanan Roma. Paulus hawi nunung here, ³ Anri dagana here negei pagawian sa sameh, Paulus muneng baya here anri bagawi daya gawian here hanyeru ngulah tenda. ⁴ Anri, Paulus babagi akal pikir hang sinagoge tiap anrau Sabat nelang bausaha ngampiyakin kawan ulun Yahudi anri Yunani. ⁵ Kude, hantek Silas anri Timotius minau teka Makedonia, Paulus mulai anri bulat atei bagawi nampe barita kabar salamat, nelang basaksi tuu-tuu ma kawan ulun Yahudi amun Yesus hanyeru Kristus. ⁶ Kude, hantek here manantang nelang manyumpah Paulus, hanye ngebas pama ni nelang bapaner ma here," Iranu naan hang amau ulunu raerai! Aku barasih. Mulai taati hampe papalusanni, aku sagar tulak ma utus bangsa lain." ⁷ Udiyeru, hanye nanan unengan yeru balalu tulak ma lewu erang kaulun sa bangaran Titius Yustus, erang kaulun puang Yahudi sa manyambah Alatalla, sa lewuni naan hang tuhi sinagoge. ⁸ Krispus, kepala sinagoge, jari parisaya hawuang Tuhan anri katuluh ulun sa muneng hang lewuni, anri hene ulun Korintus sa udi nyanrengei Paulus jari parisaya anri naapanrus. ⁹ Balalu, Tuhan bapaner ma Paulus hang katika malem hawuang paninungen," Ada takut, tapi tampalusleh bapaner anri ada suni, ¹⁰ daya Aku baya hanyu anri mahi erang kaulun jua sa sagar manyarangnu lepuh manyiksanu daya naan hene ungkup-Ku hang tumpuk yena." ¹¹ Maka, Paulus muneng hangyaru salawah isa taun enem wulan, nelang ngajar lengan Alatalla hang helang here. ¹² Kude, hantek Galio jari prokonsul Akhaya, kawan ulun Yahudi anri pakat atei amuan nawan Paulus anri ngendeini ma hadapan kursi pangadilan, ¹³ nelang maharek," Ulun yena ganyah mampangaruhi ulun rama himpan manyamah Alatalla sa balawanan anri Hukum Taurat." ¹⁴ Kude yeru, hantek Paulus kai nguka wawani, Galio maharek ma kawan ulun Yahudi yeru," jaka yena hanyeru pasal kahalaen atawa pasal kajahaten sa puang patut, ui kawan ulun Yahudi, aku patutleh nangungjawab pangaduan naun. ¹⁵ Kude, jaka yena pasal daya eau wusi paner, anri kawan ngaran, anri hukumnu raerai, urusleh raerai. Aku pahakun jari hakim ma kawan hal yeru" ¹⁶ Balalu, Galio ngaluar here teka uneng pangadilan. ¹⁷ Udi yeru, here katuluh nyamma Sostenes, kapala Sinagoge, palus ngakasah ni hang hadapan pangadilan . Kude yeru, Galio puang igaganu pakara yeru. ¹⁸ Udi yeru, Paulus muneng papire anrau lagi, balalu paramisi anri kawan ulun parisaya anri tulak balayar ma Siria, sinrah Priskila anri Akwila. Hang Kengkrea, Paulus haut nyukur wuluni daya hanye haut bahajat. ¹⁹ Udi yeru, here hampe hang Efesus anri Paulus nanan Priskila anri Akwila hang yaru, tapi hanye raerai masuk ma sinagoge anri basurah anri kawan ulun Yahudi. ²⁰ Hantek here laku Paulus himpan muneng balawah, Paulus puang narime, ²¹ tapi paramisi anri here nelang bapander," Aku sagar mulek nunung naun jaka Alatalla ngabahumenni." Anri, hanye balayar teka Efesus. ²² Udi hanye minau hang Kaisarea, hanye mamai nelang ngami tabe ma kawan jemaat, balalu minau ma Antiokhia. ²³ Anri, udi nangkelah papire waktu hang yaru, hanye nanan unengan yeru balalu bakuliling teka isa unengan ma unengan lainni hang watas Galatia anri Frigia, sambil ngami kakuaten katuluh murid. ²⁴ Wayah katika, naan ulun Yahudi bangaran Apolos turunan Aleksandria, hawi ma Efesus. Hanye erang kaulun pintar nelang paseh hawuang hal Surat Barasis. ²⁵ Ulun yena haut naajar neu Lalan Tuhan anri basumangat hawuang ruh. Hanye bapander nelang ngajar anri taliti neu Yesus, daya hanye ekat karasa baptisan Yohanes. ²⁶ Hanye mulai bapaner anri mahi katakuten hawuang sinagoge, kude hantek Priskila anri Akwila nyanrengeini, here narikni ma wading anri manarang ma hanye Lalan Alatalla sa labih mangana. ²⁷ Anri, hantek Apolos nyubarang ma Akhaya, kawan pulaksanai isa iman ngami kateguhan atei ma hanye nelang nyurat ma kawan murid himpan manyambut pihawiaanni. Hantek hanye hampe, hanye hene ngarawah here sa daya karunia haut jari parisaya, ²⁸ daya hanye anri kape mambantah kawan ulun Yahudi hang muka ulun rama, saratang nantarang teka Surat Barasih amun Kristus hanyeru Yesus.