Paulus andri Silas hang Tesalonika ¹ Isa katika, Hantek Paulus andri Silas haut tapitah Amfipolis andri Apolonia, here hampe hang Tesalonika, hang yaru naan sinagoge ulun Yahudi. ² Balalu, kala kabiasaen Paulus, hanye masuk mapenah ulun, nelang, salawah telu andrau sabat hanye bapaner andri here ayat surat barasis. ³ Palus manarang nelang ngami bukti amun Kristus parlu kaingkam nakahanang nelang ambuan hingka helang ulun matei, palus ka eyau, "Yesus yina sa rahat nakabarku ma naun, hanye yiru Kristus." ⁴ Balalu, rama hingka here sa persaya palus uma Paulus andri Silas. Kala yiru pada rama ulun Yunani sa takut ma Alatalla nelang puang butit kawan wawei terhormat. ⁵ Kude, kawan ulun Yahudi jari bahiri atei palus ngenei papire ulun galandangan sarama hang daerah yiru, here ngumpul ulun rama palus ngulah deruh litar tumpuk, balalu manyarang lewu Yason palus ngantara Paulus andri Silas kai enei here ma luar nadap ulun rama. ⁶ Hantek here puang kahaba Paulus andri Silas, here nyujut Yason andri papire pulaksanai seiman mahadapan kawan pejabat tumpuk, ka eyau andri lengan mehet, "Kawan ulun yina sa haut ngulah rawek dunia, haut hawi pada ma yina. ⁷ Nelang, Yason narime here, here katuluh ngulah tindakan nawan hukum Kaisar andri ngantuh amun naan raja lain, hanye yiru Yesus." ⁸ Ulun rama amput pejabat tumpuk jari geger giruh tawuk karengei hal yiru. ⁹ Balalu, udi here narime jaminan hingka Yason andri sa lainni, kawan ulun yiru mambebaskan here. Paulus andri Silas ma tumpuk Berea ¹⁰ Kawan pulaksanai saiman balalu nunyu Paulus andri Silas, malem yiru pada, tulak ma Berea. Dami hampe yaru, here nunung sinagoge ulun Yahudi. ¹¹ Kawan ulun Yahudi hang yina labis maeh ateini na banding kawan ulun hang Tesalonika daya here narima Firman andri sanang atei, nelang tiap andrau here mantaru surat barasis himpan karasa inun sa na ajar yiru bujur. ¹² Dagana yiru, hene hingka here jari persaya, nelang puang butit pada kawan ulun Yunani terpandang hau upu atawa wawei. ¹³ Kude, tawuk kawan ulun Yahudi hang Tesalonika karasa amun Paulus pada nampe lengan Alatalla hang Barea, here jua hawi ma Barea palus ngajahujak ma rebe ulun rama. ¹⁴ balalu, hinang, kawan pulaksanai saiman nunyu Paulas tulak hampe ma pantai, kude Silas andri Timotius tatap muneng hang yiru. ¹⁵ Kawan ulun sa nengau Paulus ngatet hampe ma Atena, nelang dami narima pesen hingka Paulus ma Silas andri Timotius himpan here wansit ngapung hanye. here balalu tulak. Paulus hang Tumpuk Atena ¹⁶ Padingian Paulus ngandrei here hang Atena, Roh ni kaingkam mahanang hang wuang tengani dagana hanye kadinung tumpuk yiru penu andri kawan patung barhala. ¹⁷ Daya yiru, hang sinagoge hanye bapaner andri kawan ulun Yahudi baya kawan ulun lain sa takut ma Alatalla, pada hang unengan ulun rama, tiap andrau, andri kawan ulun sa naan hang yaru. ¹⁸ Papire ulun panai hingka aliran Epikuros andri Stoa pada basual andri hanye, papire teka here ka eyau, "Inun sa kai na paner ulun hene wawa yiti? sa lain pada ka eyau,"wangun ni hanye erang ka ulun pamberita kawan dewa bangsa lain." Daya hanye bapaner neu Yesus nelang neu kabangkitan. ¹⁹ Balalu, here ngayak palus ngenei hanye ma Areopagus, andri ka eyau,"Iyuhlah kami karasa ajaran wau inun sa na waranu yiti? ²⁰ Daya, hanyu ngantuh papire hal sa asing hang silu kami. Kami hamen karasa inun artini yiru," ²¹ (Tawuk yiru, katuluh ulun Atena andri kawan ulun asing sa muneng hang yaru katuju tuu nangalis waktu here andri puang ngulah inun-inun kasuali bapaner andri nyanrengei kawan hal wau.) ²² Balalu, Paulus mindri hang peneh-penah Areopagus nelang ka eyau, "Uu kawan ulun Atena, aku lentah kadinung hang wuang katuluh hal naun tuu ba agama. ²³ Daya, hantek aku pasiar nelang ninung uneng sumbayang naun, aku pada kadinung uneng nyarah parapah hang yaru naan nasurat, 'MA ALATALLA SA PAUANG TARU.' Dagana yiru, inun sa naun sambah amun naun puang kataru hanye, yiru sa waraku ma naun. ²⁴ Alatalla sa ngulah dunia andri katuluh sa naan hang wuangni, daya hanye Tuhan hang amau langit nelang tane, puang muneng hang wuang kawan lewu dewa sa na ulah daya murunsia, ²⁵ puang pada hanye nakarawah kawan tangan murunsia, iyalah hanye ilaku inun-inun daya Hanye raerai sa ngami pamelum andri hewuk nelang katantuluhni. ²⁶ Andri, hanye ngulah, hingka erang ka ulun, hanye ngulah katuluh bangsa murunsia himpan muneng hang amau tane yina, udi nukas kawan musim nelang kawan watas uneng welum here, ²⁷ himpan here ngantara Alatalla, nelang, amun tau here kaiyuh negei Hanye andri manalu Hanye dagana Hanye puang lawit hingka takam katantuluh. ²⁸ Daya, hang wuang hanye, takam welum, bagarak, nelang naan.Ayub 12:10 Iyalah, kawan panyair naun ka eyau 'Dagana takan yina pada samula kawan anak-Ni' ²⁹ Jari, daya takam samula kawan anak Alatalla, takam harusni puang bapikir amun wangun Alatalla yiru iyalah amas, atawa perak, atawa watu, sa na ulah manyu kapandaian andri pamikiran murunsia. ³⁰ Dagana yiru, udi wayah kalungaen takam puang na itung lagi, itati Alatalla iwara ma uras ulun hang awe-awe himpan batobat, ³¹ daya hanye haut nukas diye hang hindra katika sagar mangadili dunia hang wuang keadilan itah isa ka Ulun sa haut na pidi-Ni, udi hiye ngami bukti ma uras ulun andri nyamelum mulek ulun yiru teka pampatei." ³² Nelang, tawuk here karengei neu welum mulek teka pampatei, papire ka ulun mulai ngasese,tagal sa lain ka eyau, "Kami hamen hanyu bapaner lagi neu hal yina." ³³ Balalu, Paulus tulak hingka penah-penah here. ³⁴ Kude papire ulun umba andri hanye nelang parsaya, tamasuk pada Dionisius anggota Areopagus, andri erang ka ulun wawei bangaran Damaris, nelang papire ka ulun lainni sa uma hare.