¹ Dinung tuu hante sinta Alatalla Amah ma takam hampe takam na antuh kawan anak Alatalla, samula takam kawan anak Alatalla. Yiru sababni duni yiti puang kataru takam, daya dunia puang kataru Alatalla. ² Pulaksanai katuluh sa nasinta, itati takam samula kawan anak Alatalla, kude kaawe wangun takam handrian huan dinung. Kude, takam karasa amun Kristus hawi, takam sagar jari ialah Hanye daya takam sagar kadinung Hanye hawuang kawangunanNi sa sabujurni. ³ Katuluh ulun sa naan kaharapen kalayiti ma Kristus, hanye nyaga tengani nampan tuu tuu barasis, sameh kala Kristus pada barasis. ⁴ Satiap ulun sa ngulah dosa nawan hukum daya dosa hanyeyiru pelanggaran ma hukum. ⁵ Naun karasa Kristus hawi nampan muhut dosa, nelang himat puang uweng dosa hawuang tengaNi. ⁶ Katuluh ulun sa welum baya andri Hanye saratang puang ngulah dosa; ulun sa aur ngulah dosa puang suah kadinung nelang puang katararu Hanye. ⁷ O kawan anakku, ada maladar kawan ulun nyantawang naun. Ulun sa nampalus isa bujur hanyeyiru ulun bujur, sameh ialah Kristus pada bujur. ⁸ Ulun sa ngulah dosa hanyeyiru hingka iblis daya iblis haut badosa tika asalni. Neu yiti Anak Alatalla hawi: Nampan ngampihansur pagawian iblis. ⁹ Ulun sa haut jari Anak Alatalla puang aur ngulah dosa daya pidasaran Alatalla naan hawuang hanye; balalu hanye puang aur ngulah dosa daya Alatalla yiru Amahni. ¹⁰ Daya yiru, jelas bedani hie kawan anak Alatalla anri anak Iblis. Ulun sa puang nampalus kabahumen Alatalla puang anak Alatalla, kalayiru pada ulun sa puang sinta anri kawan pulaksanaini. Sinta Sasameh Takam ¹¹ Daya, kalemah hingka asalni haut na tahampe kabar yiti ma naun, hanyeyiru takam harus sinta isa anri sa lainni. ¹² Ada jari ialah hi Kain, sa baasal hingka sa jahat sa munu annini. Inun sabab hi Kain munu annini? Daya kawan ulahan Kain ru hala kude kawan hal sa naulah annini yiru bujur. ¹³ Pulaksanai katuluh ada emah amun dunia yiti muar andri naun. ¹⁴ Takam karasa sa takam yiti haut kaluar tika pampatei ma pamelum daya takam sinta anri kawan pulaksanai takam. Ulun sa puang sinta pulaksanaini berarti hanye masih hang kapit kuasa pampatei. ¹⁵ Ulun sa muar pulaksanaini henyuyiru erangkaulun pamunu ulun, nelang naun karasa amun erangkaulun pamunu ulun watni puang uweng pamelum sejati palus ma kalalawah. ¹⁶ Takam haut karasa sinta ma sasameh: Yesus Kristus haut nyarah pamelumNi ma taka. Jari, takam pada harus nyarah pamelum takam ma kawan pulaksanai takam. ¹⁷ Amun, erangkaulun welum hang kasukupen, kadinung pulaksanaini bakakurangen, kude puang hakun ngarawah pulaksanaini yiru, puang mungkin sinta Alatala naan hawuang ateini? ¹⁸ Kawan anakku ada takam sinta ekat hang wiwi mulut atawa makai lengan, kude makai sinta sejati andri ulah gawi takam. ¹⁹ Kalayiru sarani, takam karasa takam yina hingka sabujur nelang atei takam marauh hang hadapan Alatalla. ²⁰ Daya, takam karasa amun takam na ampihala daya atei takam, Alatalla labih hante tika pangarasaen atei takam, Hanye karasa alakatantuluh. ²¹ Kawan pulaksanaiku sa nasinta, amun atei takam puang ngampihala takam, takam kaiuh nadap Alatalla andri kaheeien. ²² Inun sa nalaku daya takam, takam kaiyuh hingka Alatalla daya takam ngalut kawan parentah-Ni nelang nampalus inun sa ngampisanang atei Ni. ²³ Ina, sa naparintah Alatalla, hanyeyiru nampan takam parisaya hawuang ngaran Anak-Ni, Yesus Kristus, nelang takam harus sinta isa anri sa lainni kala sa haut na parentah Kristus ma takam. ²⁴ Ulun sa ngalut nuu parentah Alatalla welum ibaya anri Hanye, nelang Alatalla baya anri here. Nelang takam karasa Alatalla ibaya anri takam, daya Roh Alatalla haut naami ma takam.