Binian-Binian nang Manolong Yesus ¹ Wayah baisuksn harinya, Yesus tulak bakuliling kakuta-kuta wan disa-disa gasan mangabarkan wan manyataakan Injil Karajaan Allah. Kadua walas rasul ada baimbai lawan Sidin, ² nangkaya itu jua buhan babinian nang hudah disambuhakan Yesus matan pada roh-roh jahat wan bamacam-macam panyakit. Diantara buhanya itu adalah Maria, nang disambat Magdalena, nang dibibasakan Yesus matan pitu roh jahat. ³ Ada jua Yohana istri Khuza bandahara Hirodes, Susana, wan masih banyak binian lainya nang mmakai kakayaan buhanya sandiri gasan mandukung Yesus. Parumpamaan tentang Panabur Banih ⁴ Wayah urang banyak bakumpul wan urang-urang matan babagai kuta mandatangi Yesus, Sidin bapander lawan buhanya mamakai parumpamaan: ⁵ "Saurang patani tulak mananam banih. Rahat inya batanam, ada sabagian nang gugur di pinggir jalan imbah itu takana jajak, wan sapalihnya dimakan burung-burung. ⁶ Sabagian pulang gugur di atas nang baisi batu, imbah banih itu mulai tumbuh, banih itu layu lantaran kadada banyu. ⁸ Sabagian nang lainnya gugur di tangah-tangah pudang sabat nang baduri balalu tumbuh jua taimbai padang sabat nang baduri itu sampai inya tagapit. ⁷ Sisa banih nang lain gugur ditanah nang subur imbah itu batumbuh sampai bahasil saratus kali lipat banyaknya." Imbah tutung mangesahakan parumpamaan itu Yesus bakuciak, "Siapa baisi talinga gasan mandangar, supaya mandagarakan baik-baik!" ⁹ Imbah itu, murid-murid Yesus batakun lawan-Sidin hal arti parumpamaan itu. ¹⁰ Inya bapadah, 'Gasan ikam dipadahakan rahasia Karajaan Allah, tatapi gasan urang lain dipadahakan intang parumpamaan supaya, 'Biar mancangangi, buhannya kada kawa malihat, wan biar mandangar, buhannya kada kawa mangarti. "Yesaya 6:9 Panjalasan Yesus tentang Parumpamaan Banih ¹¹ Inilah arti parumpamaan itu: "Banih itu adalah firman Allah. ¹² Banih nang gugur di pinggir jalan itu adalah buhannya nang mandangar firman Allah. Balalu, datang sitan maambil firman itu matan hati buhannya supaya buhannya jangan parcaya wan disalamatakan. ¹³ Banih nang gugur diatas tanah nang babatu adalah urang-urang nang mandangar firman Allah wan manarimanya lawan sanang, tatapi kada baakar. Buhannya parcaya satumat haja, tatapi kasusahan hidup datang, buhannya lakas babalik matan Allah. ¹⁴ Banih nang gugur di sala samak baduri adalah urang-urang nang mandangarakan firman Allah, tatapi samantara buhannya batumbuh, buhannya tahimpit uleh rasa kuatir, kasugihan, wan kasanangan hidup sampai buhannya kada kawa mahasilakan buah nang masak. ¹⁵ Sadangakan banih nang gugur ditanah nang subur itu adalah urang-urang nang mandangarakan firman balalu manyimpannya dalam hati nang jujur wan baik, wan babuah dalam katalatenan. "Tampaiakan Cahaya ikam ¹⁶ Kadada urang nang imbah manyalai palita, balalu manutupinya lawan gantang atawa maandaknya di bawah ranjang. Sabaliknya, inya cagar maandak palita itu di atas kaandakan lampu supaya urang nang masuk ka dalam rumah kawa malihat tarangnya. ¹⁷ Sabab, kadada masalah nang tasambunyi nang kada kawa diungkapakan, wan kadada rahasia nang kada cagar taungkap balalu di bawa kawadah nang tarang. ¹⁸ Marga itu, parhatiakanlah nangkayaapa ikam mandangar sabab siapa nang baisi pacangan dibari labih banyak lagi. nang kayaitu jua, siapa nang kada baisi, matan inya pacangan diambil, bahkan sabarataan ampunnya." Kaluarga Yesus nang Sabujurnya ¹⁹ Balalu, uma wan dingsanak-dingsanak Yesus datang manamui Sidin, tatapi buhanya kada kawa mamaraki Sidin lantaran banyak urang bakarumun. ²⁰ Jadi, dipadahakanlah wan Sidin, "Uma wan dingsanak-dingsanak Pian rahatan bardirian diluar, buhanya handak banar tatamu lawan Pian." ²¹ Akan tatapi, Yesus manyahuti buhanya, "Ibu-Ku wan dingsanak-dingsanak-Ku adalah buhanya nang mandangarakan firman Allah wan malakuakanya." Yesus Manghantiakan Angin Ribut ²² Wayah itu, Yesus naik kadalam jukung baimbai wan murid-murid Sidin wan Sidin bapadah lawan buhanya, "Ayo kita manyubarang kasisi lain pada danau ini." Imbahtu, tulaklah buhanya kasubarang. ²³ Namun, imbah buhanya barlayar, Yesus taguring. Balalu, bartiuplah angin ribut ka danau itu wan jukung buhanya kamasukan banyu sahingga buhanya dalam bahaya. ²⁴ Limbah tu, buhan murid mandatangi Yesus wan mambangunakan-Nya sambil baucap, "Guru! Guru! kita pacangan binasa!" Balalu Yesus pun bangun wan mambantak angin ribut sarta galumbang nang bargalura nintu. Angin ribut nintupun badiam wan danau itu manjadi tanang. ²⁵ Wan, Sidin baucap lawan buhanya, "Dimanakah imanmu?" Buhanya manjadi katakutan wan hiran sambil baucap satu lawan nang lainya. "Siapakah garangan urang ini? Sidin bahkan mambari parintah lawan angin wan banyu, wan buhanya mamatuhi-Nya." Saikung urang Garasa Dibibasakan matan Roh Jahat ²⁶ Balalu sampailah Yesus wan murid-murid-Sidin di wilayah urang Garasa, di subarang Galilea. ²⁷ Pas rahat Yesus turun ka darat, Sidin didatangi uleh lalakian matan kota itu nang karasukan roh-roh jahat. Urang itu udah lawas kada babaju wan kada badiam di rumah, tatapi badiam di kuburan. ²⁸ Wayah urang itu makihat Yesus, inya bakuciak wan basujud di hadapan-Sidin. Wan suara nang nyaring inya baucap, "Apa garang urusan antara Pian wan aku, hai Yesus, Anak Allah Yang Mahatinggi? Aku mamuhun wan-Pian, jangan siksa aku!" ²⁹ Hal itu tajadi lantaran Yesus mamarentahakan roh jahat itu kaluar matan urang itu. Setan itu rancak manyeret-nyeret urang itu sampai inya dirantai, di jarat, wan dijaga urang, tatapi inya kawa mamutusakan rantainya wan dibawa uleh setan ka wadah-wadah nang sunyi. ³⁰ Imbah itu, Yesus batakun wan urang itu, "Siapa garang ngaran ikam?" Jawab urang itu, "Legion" lantaran banyak setan nang marasukinya. ³¹ Setan-setan itu mamuhun wan Sidin agar inya jangan mamarentah buhannya supaya tulak ka jurang maut. ³² Di wadah itu, ada sakalumpuk ganal babi nang rahat mancari makan di bukit. Setan-setan itu mamuhun wan Yesus supaya mambiarakan buhannya masuk kadalam kawanan babi itu, wan Yesus maijinakan buhannya. ³³ Maka, setan-setan itu kaluar matan urang itu balalu masuk ka dalam babi-babi, imbah itu kawanan babi itu bukahan manuruni tabing bukit itu nang curam manuju ka danau wan tinggalam. ³⁴ Rahat buhan painguan babi malihatnya, buhannya bukah wan mangesahkan kajadian itu ka kota wan di kampung sakitar itu. ³⁵ Jadi, urang banyak datang malihat apa garang nang tajadi. Buhannya datang manamui Yesus wan malihat urang nang udah dibibasakan matan setan-setan itu rahat baduduk di parak batis Yesus, sudah babaju, wan sudah waras pikirannya. Kajadian itu maulah buhannya takutan. ³⁶ Buhanya nang malihat kajadian ini mangesahakan lawan urang lain nang kaya apa urang nang karasukan sitan itu disambuhakan. ³⁷ Belalu, sabarataan urang nang badiam disakitar Garasa maminta Yesus gasan maninggalakan buhanya sabab buhanya liwar katakutan. marga nintu, Yesus naik ka parahu wan babulik ka Galilea. ³⁸ Akan tetapi, urang nang hudah dibibasakan matan sitan-sitan itu mamuhun lawan Yesus supaya inya kawa maumpati Yesus. Namun, Yesus manyuruhnya tulak, ujar-Nya, ³⁹ "Bulik haja karumah ikam wan kesahakan hal-hal ganal nang hudah Allah buat gasan ikam." Urang itupun tulak ka saluruh panjuru kuta wan mangesahakan apa nang hudah Yesus buat gasan inya. Anak Yairus Dibangkitakan wan Saikung urang Binian Disambuhakan ⁴⁰ Imbah Yesus babulik ka Galilea, urang banyak manyambut-Nya sabab buhanya sabarataan hudah manunggui Sidin. ⁴¹ Di situ ada saikung urang nang bangaran Yairus nang datang lawan Yesus, inya itu adalah saikung urang kapala sinagoge. Sambil sujud manyambah di batis Yesus, Yairus mamuhun supaya Yesus datang ka rumahnya ⁴² sabab inya baisi saikung urang putri tunggal nang kira-kira baumur dua walas tahun, wan anak itu parak mati. wan, katika Yesus tulak ka sana, urang banyak berdesak-desakan di sakaliling-Nya. ⁴³ Di situ ada saikung urang binian nang hudah mandarita pandarahan liwar salawas 12 tahun, wan kadak saikung urang pun nang kawa manyambuhakannya. ⁴⁴ Binian itu mamaraki Yesus matan balakang wan manjapai ujung jubah Sidin, maka sakajap nintu jua pandarahanya ampih. ⁴⁵ Balalu, Yesus baucap, "Siapa nang manjapai Aku?" Karena sabarataan urang manyangkal, Petrus baucap, "Guru, urang banyak bakarumun disakaliling Pian wan bardasak-dasakan lawan Pian!" ⁴⁶ Akan tatapi, Yesus baucap, "Saikung urang manjapai Aku sabab Aku marasa ada kuasa nang kaluar matan Aku." ⁴⁷ Wayah babinian itu malihat bahwa inya kada kawa manyambunyiakan diri, inya datang ka Yesus sambil manggitir wan basujud dihadapan Yesus. Di hadapan sabarataan urang, inya mangesahakan ba apa inya manjapai Yesus, wan nangkaya apa inya kawa sakajap haja disambuhakan. ⁴⁸ Imbah tu, Yesus baucap lawan inya, "Anak-Ku, imanmu hudah manyambuhakanmu. Tulaklah dalam damai sajahtara." ⁴⁹ Wayah Yesus masih bapander, saikung urang matan rumah kapala sinagoge itu datang wan baucap lawan Yairus, "Putrimu hudah maninggal. Kada usah lagi mariputakan Guru." ⁵⁰ Akan tatapi, mandangar hal itu Yesus baucap lawan Yairus." Jangan takut. Parcaya haja wan anakmu pacangan salamat." ⁵¹ Wayah Yesus sampai dirumah Yairus, Yesus kada mamparbulihakan siapa haja masuk lawan Sidin kacuali Petrus, Yohanes, Yakobus, serta abah wan uma kakanakan ngintu. ⁵² Sabarataan urang manangis wan maratapi anak binian itu, tatapi Yesus baucap, "Kada usah manangis, inya kada maninggal tatapi guring." ⁵³ Urang banyak itupun manawaakan Sidin sabab buhanya tahu anak binian itu hudah maninggal. ⁵⁴ Balalu Yesus mamingkuti tangan anak itu wan mangiaunya, "Bangunlah, Nak!" ⁵⁵ Maka, tabuliklah roh anak itu wan sakatika nintu jua kanakan itu bardiri. Balalu Yesus mamarintahakan supaya kanakan itu dibari makan. ⁵⁶ Kadua urang tuha kanakan nintu takjub, tatapi Yesus malarang buhanya supaya kada bapadah lawan urang lain tentang apa nang hudah tarjadi.