Yesus Manyambuhakan Saikung urang Palayan Parwira ¹ Imbah Yesus manuntungakan sabarataan pamanderan-Nya di hadapan urang banyak, Sidin masuk ka Kapernaum. ² Disana ada saikung urang Parwira Romawi nang baisi budak nang dihargainya. Budak nintu rahatan garing banar wan parak maninggal. ³ Imbah parwira nintu mandangar tentang Yesus, inya mangutus babarapa tuha-tuha Yahudi gasan manamui Yesus wan maminta Yesus datang gasan manyambuhakan palayannya". ⁴ Imbah urang-urang nintu datang lawan Yesus, buhanya bujur-bujur mamuhun lawan Sidin. Ujarnya. "Urang ini pantas mandapat partulungan Pian. ⁵ Sabab inya mangasihi bangsa kita wan inya jua nang mambangun sinagoge gasan kita." ⁶ Tulaklah Yesus baimbaian buhanya. Imbah Yesus sudah parak ka rumah parwirw nintu, parwira nintu mangutus babarapa kakawananya gasan bapadah lawan Yesus, "Tuan, kadak usah Pian manyusahakan diri gasan ulun sabab ulun kada layak manarima Pian di rumah ulun. ⁷ Sabab, ulun saurang marasa kada pantas gasan mandatangi Pian. Akan tatapi, ucapakan sapatah kata haja Pian, maka palayan ulun pasti pacangan sambuh. ⁸ Sabab, ulun ini jua saikung urang bawahan nang manbawahi prajurit-prajurit. Pabila ku bapander awan saikung urang prajurit, "tulaklah!", inyapun tulak. Pabila ku bapander aan prajurit nang lain, "Datanglah!", maka inyapun datang. Wan, pabilaku padahakan lawan budakku, "Lakuakanlah ini!", budakkupun pacangan malakuakanya." ⁹ Wayah Yesus mandangar hal nintu, Sidin marasa hiran lawan parwira rumawi nintu. Sambil bapaling lawan urang banyak nang maumpati-Nya, Sidin baucap, "Aku bapadah lawan ikam, bahkan diantara urang Israel pun Aku balum suah manamuakan iman seganal ini." ¹⁰ Wayah rumbungan nang diutus lawan Yesus babulik karumah parwira nintu, buhanya mandapati budaknya hudah sambuh. Anak Saikung urang Janda Dibangkitakan ¹¹ Wayah baisukan harinya, Yesus tulak ka kuta nang bangaran Naim baimbai lawan buhan murid-Nya wan rumbungan urang banyak nang maumpati Sidin. ¹² Imbah Sidin mamaraki pintu garbang kuta, ada mayat saikung urang lalakian nang dipikul kaluar. Urang nang maninggal nintu adalah anak saikunganya haja matan umanya nang hudah balu. Wan, ada banyak urang matan kuta itu nang baimbai binian nintu. ¹³ Wayah Tuhan mancangangi binian nintu, Tuhan barbalaskasihan lawan inya wan baucap, "Jangan manangis." ¹⁴ Belalu, Sidin beparak wan manjapai tandu janasah nintu. Urang-urang nang mamikul tandu nintupun barhanti. Imbahtu, Yesus baucap, "Hai anak anum, Aku baucap lawan ikam, bangunlah!" ¹⁵ balalu, urang nang tadinya maninggal nintu baduduk wan mulai bapander. Wan, Yesus mambulikakanya lawan umanya. ¹⁶ Sabarataan urang nang mancangangi hal nintu liwar katakutan belalu mamuji Allah wan baucap, "Saikung urang nabi ganal hudah muncul ditangah-tangah kita!" wan "Allah hudah malawat umat-Nya." ¹⁷ Wan, kabar tentang Dia manyabar ka saluruh Yudea wan ka sabarataan wadah lain disakitarnya. Yohanes Pembaptis Mangutus Muridnya lawan Yesus ¹⁸ Murid-murid Yohanes memadahakan lawan Yohanes tentang sabarataan hal nintu. ¹⁹ Belalu Yohanes mengiau dua ikung urang muridnya wan meutus buhanya lawan Tuhan gasan batakun, "Piankah nang pacangan datang itu? atawa, haruskah kami manghadangiakan nang lain?" ²⁰ Wayah buhanya datang lawan Yesus, buhanya pun baucap, "Yohanes Pembeptis manyuruhakan kami gasan datang lawan Pian wan batakun, "Piankah nang pacangan datang itu? atawa, haruskah kami manghadangi nang lain?" ²¹ Wayahitu, Yesus rahatan manyambuhakan urang banyak matan bamacam-macam panyakit, wabah, wn roh-roh jahat. Tuhan jua mangaruniakan panglihatan lawan banyak urang buta. ²² Jawab Yesus lawan kadua ikung urang itu, "Tulaklah wan kesahakan lawan Yohanes tentang apa nang hudah buhan ikam lihat wan dangar; urang nang buta kawa malihat, urang lumpuh kawa bajalan, urang nang garing kusta ditahirakan,, urang tuli kawa mandangar, urang mati dibangkitakan, wan urang-urang miskin dibaritakan kabar baik. ²³ Sabab nintu, berbahagialah inya nang kada tasandung oleh-Ku." ²⁴ Imbah utusan-utusan Yohanes tulak, Yesus bapander lawan urang banyak tentang Yohanes, "Gasan malihati apakah ikam tulak kapadang balantara? Malihat buluh nang ditiup angin? ²⁵ Namun, apa nang ikam lihat? Urang nang babaju bungas? Lihatlah, urang nang mamakai baju bungas wan hidup dalam kamiwahan adanya di istana-istana raja. ²⁶ Jadi, apa nang ikam lihati? Saikung urang nabi? Ya, Aku baucap lawan ikam, bahkan labih matan pada saikung urang nabi. ²⁷ Inyalah urangnya, nang parihal inya ada tatulis; "Dangarlah! ku manyuruh utusan-Ku mandahului pian. Inyalah nang pacangan mamparsiapakan jalan dihadapan-Mu." Maleakhi 3:1. ²⁸ Aku baucap lawan ikam, di antara sabarataan urang nang suah dilahirakan matan binian, kadada saikung urangpun nah labih ganal matan pada Yohanes.. Akan tatapi, nang paling halus, matan karajaan Allah, Labih ganal matan pada inya." ²⁹ Rahat urang banyak wan buhan pangumpul pajak mandangar hal ini, buhannya sabarataan mangakui kaadilan Allah lantaran buhannya imbah dibaptis lawan baptisan Yohanes. ³⁰ Akan tatapi, urang-urang Farisi wan ahli-ahli Taurat kada manarima rancana Allah gasan diri buhannya lantaran buhannya balum dibaptis wan Yohanes. ³¹ "Lawan apa garang Aku maibaratakan urang-urang nang hidup intang wayah ini? Nangkaya apakah buhannya itu? ³² Buhannya ibarat nangkaya kanakan nang baduduk di pasar, nang bakuciak saikung wan nang lainnya, 'Kami maniup suling gasan ikam, tatapi ikam kada bajoget. Kami manyanyiakan lagu nang sadih, tatapi ikam kada manangis.' ³³ Sabab, rahat Yohanes Pambaptis datang balalu inya kada makan roti atawa minum anggur, ikam baucap, 'Inya karasukan setan.' ³⁴ Akan tatapi, rahat Anak Manusia datang makan wan minum , ikam baucap, 'Lihati! Inya urang nang rakus wan pamabuk! Inya bakawan jua wan buhan pangumpul pajak wan urang-urang nang badosa!' ³⁵ Akan tatapi, hikmat dibujurakan oleh anak-anaknya." Saikung Babinian Badosa Mangurapi Yesus ³⁶ Wayahitu ada saikung urang matan buhan Farisi nang maundang Yesus gasan bemakanan baimbai Sidin. Yesus tulak karumah buhan Farisi nintu wan duduk makan. ³⁷ Di kuta itu ada saikung urang binian bardusa. Wayah inya tahu bahwa Yesus rahatan makan dirumah urang Farisi itu, inyapun manukar sabigi butul pualam nang baisi minyak harum. ³⁸ Balalu, inya badiri di balakang Yesus, parak batis Sidin, sambil manangis wan mulai mambasuh batis Yesus lawan banyu matanya wan maalapakan lawan rambutnya. Imbah itu, inya mancium batis Yesus wan mangurapinya lawan miinyak harum. ³⁹ Rahat urang Farisi nang manyaruani Yesus maitihi hal itu, inya baucap dalam hati,"Amun urang ini bujuran nabi, Inya pasti tahu siapa garang babinian nang ini wan babinian nang kayaapa nang manggatuk Sidin itu lantaran babinian ini adalah babinian nang badusa." ⁴⁰ Yesus mananggapi wan baucap, "Simon, ada nang handak kupanderakan wan ikam." Simon manjawab, "Padahakan haja, Guru ae." ⁴¹ Yesus baucap, "Ada dua ikung urang nang bahutang lawan urang nang maminjamakan uang, nang saikung bahutang 500 dinar wan saikungnya lagi bahutang 50 dinar. ⁴² Wayah kaduanya kada sanggup mambayar, urang nang maminjamakan uang itu manghapusakan hutang buhan badua itu, Balalu, siapakah diantara kadua urang itu nang pacangan labih mangasihi urang nang maminjamakan uang itu?" ⁴³ Simon manjawab, "Manurut ulun, urang nang paling banyak dibibasakan hutangnya." Yesus baucap lawan inya, "Bujur panilaian ikam." ⁴⁴ Sambil bapaling lawan binian itu, Yesus baucap lawan Simon, "Apakah ikam maitihi binian ini? Wayah aku datang karumah ikam, ikam kada mambarii Aku banyu gasan mambasuh batis-Ku, tatapi inya mambasuh batis-Ku lawan banyu matanya wan maalapakan lawan rambutnya. ⁴⁵ Ikam kada mambari-Ku ciuman, tatapi inya kada ampih-ampihnya mancium batis-Ku wayah Aku masuk. ⁴⁶ Ikam kada maurapi kapala-Ku lawan minyak, tatapi inya maminyaki batis-Ku lawan minyak harum. ⁴⁷ Sabab itu, kupadahakan lawan ikam, dusanya nang banyak banar itu hudah diampuni sabab inya manunjukakan kasih nang ganal. Akan tatapi, urang nang sadikit diampuni, sadikit jua mangasihi." ⁴⁸ Balalu Yesus baucap lawan babinian itu, "Dusamu hudah diampuni." ⁴⁹ Urang-urang nang duduk makan lawan Yesus mulai batakun-takun dalam hati, "Siapakah garangan urang ini sahingga Inya kawa maampuni dusa?" ⁵⁰ Yesus baucap lawan binian itu, "Imanmu hudah manyalamatakan ikam, tulaklah lawan damai."