² Yesus Mangutus Buhan Rasul-Nya ¹ Kamudian, Yesus mangiau kadua walas murid Sidin balalu mambari buhanya kuasa wan otoritas atas roh-roh jahat, wan jua gasan manyambuhakan panyakit. Yesus mangutus buhanya gasan mambaritaakan tentang Karajaan Allah wan mamulihkan. ³ Ujar Yesus lawan buhanya, "Kada usah babawaan apa-apa dalam parjalananmu, kada usah bebawaan tungkat, tas, ruti, duit, atawa dua lambar baju. ⁴ Karumah mana haja nang ikam masuki, badiam haja disana sampai ikam tulak matan pada wadah itu. ⁵ Bagi buhanya nang kada mau manarima ikam, tinggalakan haja kuta itu wan hampasakan dabunya matan batis ikam gasan paringatan lawan buhanya." ⁶ Imbah tu tulaklah buhan rasul wan bakuliling ka disa-disa sambil manghabarakan injil wan manyambuhakan urang-urang garing dimana haja. Kabingungan Herodes tantang Yesus ⁷ Herodes, sang raja wilayah, mandangar tantang sabarataan hal nang rahatan tarjadi wan inya liwar bingung sabab ada bubuhanya nang bapadah bahwa Yohanes Pembabtis hudah bangkit matan antara urang mati, ⁸ sedangkan nang lain baucap bahwa Elia hudah muncul pulang, wan ada jua nang baucap bahwa salah saurang matan para nabi nang hidup pada zaman dahulu hudah bangkit. ⁹ Herodes baucap, "Aku hudah mamanggal kapala Yohanes. Jadi, siapa garang nang tentangnya ku dangar kabar nang kaya ini?" Maka, Herodes handak banar tatamu lawan Yesus. Makanan gasan Lima Ribu Urang ¹⁰ Wayah buhan rasul bulik, buhanya mangesahakan lawan Yesus parihal sagala sasuatu nang hudah buhanya lakuakan wan Yesus bahinipan mambawai buhanya tulak ka sabuah kuta nang bangaran Betsaida. ¹¹ akan tetapi, urang banyak itu tahu balalu buhanyapun maumpati Sidin. Maka, sambil manyambut buhanya, Yesus bakesah lawan buhanya parihal Karajaan Allah wan jua buhannya nang bacari kasambuhan. ¹² Wayah hari mulai malam, kadua walas murid Yesus mandatangi Sidin wan baucap, "Suruhakan urang-urang itu tulak ka kampung-kampung wan padisaan disakitar sini gasan bacari wadah manginap wan gasan makan sabab kita di wadah nang liwar sunyi." ¹³ Akan tatapi Yesus baucap lawan buhanya, "Ikam tu nang saharusnya mambarii buhanya makan." Jawab murid-murid Sidin, "Kami cuman baisi lima ruti wan dua iwak, kacuali amun kami tulak manukar makanan gasan sabarataan urang ini." ¹⁴ Di sana ada sakitar lima ribu urang lalakian. Yesus baucap lawan murid-murid-Nya. "Suruhakan buhanya baduduk bakalumpuk, kira-kira lima puluh urang tiap kalumpuk." ¹⁵ Maka buhanyapun malakuakan sasuai apa nang Yesus parintahakan wan manyuruh sabarataan urang itu baduduk. ¹⁶ Balalu, Yesus maambil lima ruti wan dua iwak itu, imbahtu manangadah ka langit, mambarkahinya, merapai-rapaiakanya, wan manbariakan lawan buhan murid supaya buhanya manyurungakan lawan urang banyak itu. ¹⁷ Wan, buhanya sabarataan makan sampai kanyang. Imbahtu, sisa-sisa rapaian ruti nang dikumpulakan ada dua walas karanjang hibak. Petrus Maakui Yesus adalah Kristus ¹⁸ Suatu kali, wayah Yesus rahatan bardua saurangan, murid-murid-Nya ada baimbai lawan Sidin. Balalu, Yesus batakun lawan buhanya, "Siapa garang Aku ini manurut urang banyak?" ¹⁹ Jawab buhanya, "Yohanes Pambabtis, nang lain mamadahakan Elia, wan nang lain pulang mamadahakan Pian adalah salah saurang matan nabi-nabi pada zaman dahulu nang bangkit pulang." ²⁰ Imbahtu, Yesus baucap lawan buhanya, "Tatapi, manurut ikam, siapa garang Aku?" Ujar Petrus, "Pian adalah Kristus matan Allah." ²¹ Akan tatapi, Yesus manangati banar buhanya wan mamarintahakan buhanya supaya kadak memadahakan lawan siapa haja hal ini. Yesus Mamadahakan Kamatian-Nya ²² Balalu Yesus baucap, "Anak Manusia musti mandarita banyak hal wan ditolak oleh buhan tuha-tuha, imam-imam kapala, wan ahli-ahli Taurat. Balalu dibunuh wan pacangan di bangkitakan wayah hari nang ka talu." ²³ Yesus bapadah lawan buhanya sabarataan, " Pabila ada urang handak umpat Aku, inya musti manyangkal dirinya saurang, wan mamikul salibnya saban hari, wan maumpati Aku. ²⁴ Sabab, siapa haja nang bausaha manyalamatakan nyawanya, pacangan kahilangan nyawanya. Akan tatapi, siapa haja nang kahilangan nyawanya marga Aku, inya pacangan manyalamatakanya. ²⁵ Apa garang untungnya pabila seseorang mandapatakan saluruh dunia, tatapi mati atawa kahilangan nyawanya saurang? ²⁶ Siapa haja nang marasa supan sabab aku wan pamanderan-Ku, Anak Manusia pun pacangan supan maakui urang itu wayah Sidin datang dalam kamulyaan-Nya wan kamulyaan Bapa-Nya, awan buhan malaikat kudus. ²⁷ Aku bapadah nang sabujurnya lawan ikam, ada beberapa urang diantara ikam nang bardiri disini nang kadak pacangan mati sabalum malihat Karajaan Allah." Yesus Baimbai Musa wan Elia ²⁸ Kakira, 8 hari imbah Yesus manyampaiakan pangajaran-Nya itu, Yesus ma ajak Petrus, Yohanes, wan Yakobus naik ka gunung gasan bardua. ²⁹ Wayah Yesus rahatan bardua, rupa Sidin bar ubah wan pakaian Sidin manjadi putih barkilauan. ³⁰ Balalu, kalihatanlah dua urang nang rahatan bapander lawan Sidin. kadua urang itu adalah Musa wan Elia. ³¹ Nang manampakakan diri dalam kamuliaan wan bapander tentang kamatian Yesus nang pacangan lakas diganapi di Yerusalem ³² Wayah itu, Petrus wan kakawananya rahatan mangantuk banar, tatapi, imbah buhanya bujur-bujur tasadar, buhanya malihat kamuliaan Yesus wan dua urang nang bardiri lawan Sidin. ³³ Imbah Musa wan Elia pacangan maninggalakan Yesus. Petrus baucap, "Guru, baiklah kita tatap disini haja. Kami pacangan maulah talu kemah, asa gasan Pian, asa gasan Musa,wan asa gasan Elia." Akan tatapi, Petrus kada manyadari apa nang dipanderakanya itu. ³⁴ Wayah Petrus rahatan mamanderakan hal itu, datanglah awan manaungi buhanya sahingga Petrus, Yohanes, wan Yakobus manjadi takut wayah buhannya masuk kadalam awan itu. ³⁵ Imbah tu, kadangaranlah suara matan awan itu, "Inilah Anak-Ku, Dialah nang Kupilih, dangarakanlah Dia." ³⁶ Imbah suara itu tahanti, tatinggal Yesus saurangan haja. Buhanya marahasiakannya wan kada bapadah wan saikung urang pun imbah wayahitu tentang kajadian nang hudah buhanya lihat. Saikung Kakanakan Lalakian Dibibasakan matan Roh Jahat ³⁷ Baisukan harinya, wayah buhanya turun matan gunung, sarumbungan ganal urang banyak datang lawan Yesus. ³⁸ Saikung urang matan urang banyak itu nyaring bapander, "Guru, ulun mohon lawan Pian, lihatlah anak ulun sabab inya adalah anak ulun saikunganya. ³⁹ Liati, ada roh nang manguasainya, wan sakatika nintu jua inya bakuciak-kuciak. Roh itu jua mangguncang-guncangakannya sahinga muntungnya babusa, roh itu tarus manyakitinya wan kada mau maninggalakanya. ⁴⁰ Ulun hudah mamuhun lawan murid-murid Pian gasan mangusirnya, tatapi buhannya kada kawa malakuakannya." ⁴¹ Jawab Yesus, "Hai, ikam ganarasi nang kada parcaya wan sasat! Barapa lama lagi Aku musti badiam lawan ikam wan basabar lawan ikam? Bawa haja kanakan itu kamari." ⁴² Wayah kanakan itu rahatan baparak lawan Yesus, roh jahat nintu mambantingnya katanah wan mangguncang-guncangakanya. Akan tatapi, Yesus mambantak roh najis itu, manyambuhakan kanakan lalakian itu, balalu mambulikakan lawan abahnya. Yesus Mamadahakan Kamatian-Nya ⁴³ Sabarataan urang marasa takjub atas kuasa Allah, tatapi wayah buhanya masih tahiran-hiran lawan sabarataan hal nang dilakuakan Yesus, Sidin baucap lawan murid-murid-Nya, ⁴⁴ "Dangarakanlah panderan ini baik-baik: Anak Manusia pacangan disarahakan katangan manusia." ⁴⁵ Akan tatapi, buhan murid kada mamahami maksud ucapan itu, wan hal nintu tasambunyi bagi buhanya sahingga buhanya kada kawa mamahaminya. Namun, buhanya pun takutan batakun lawan Yesus manganai arti panderan itu. Siapakah nang Tautama? ⁴⁶ Wayah itu ada parkalahian diantara buhan murid-murid Yesus manganai siapa nang tautama di antara buhanya. ⁴⁷ Akan tatapi Yesus manahui pikiran wan hati buhanya, balalu Yesus maambil kakanakan halus wan maajaknya bardiri di samping-Nya. ⁴⁸ Balalu, Sidin baucap lawan muri-murid, "Satiap urang nang manarima kanakan halus ini dalam ngaran-Ku, inya manarima Aku. Wan, siapa haja nang manarima-Ku, inya jua manarima Dia nang mautus Aku. Sabab, nang paling hina diantara ikam, dialah nang tautama". Pihak nang Sama ⁴⁹ Yohanes manjawab-Nya wan baucap, "Guru, kami malihat ada nang mausir roh jahat dalam nama-Mu wan kami bausaha manghantiakanya sabab inya kada tarmasuk lawan kalumpuk kita." ⁵⁰ Akan tatapi, Yesus baucap lawan inya, "Kada usah manghantiakanya sabab siapa haja nang kada malawan ikam, inya bapihak lawan ikam." Yesus Ditolak di Samaria ⁵¹ Wayah samakin parak waktunya bagi Yesus gasan ditinggiakan. Sidin managuhakan hati gasan tulak ka Yerusalem. ⁵² Yesus mangirim babarapa utusan mandahului-Nya. Balalu, utusan-utusan nintupun tulak wan masuk ka sabuah disa di daerah Samaria gasan manyiapakan sagala sasuatu bagi Sidin. ⁵³ Akan tatapi, urang-urang diwadah itu kada manarima Yesus sabab Yesus rahatan manuju ka Yerusalem. ⁵⁴ Wayah murid-murid Yesus, yaitu Yakobus wan Yohanes, malihat hal ini, buhanya baucap, "Tuhan, apakah Pian manghandakakan kami gasan mamarintahakan api turun matan langit wan manghangusakan buhanya?" ⁵⁵ Akan tatapi, Yesus bapaling ka balakang wan managur bubuhanya. ⁵⁶ Balalu, Yesus wan murid-murid-Nya tulak kadisa nang lain. Tantangan pabila Maumpati Yesus ⁵⁷ Wayah buhannya rahatan dalam parjalanan, ada saikung urang baucap lawan Yesus, "Ulun pacangan maumpati pian kamana haja Pian tulak." ⁵⁸ Yesus pun baucap lawan inya, "Rubah baisi luang gasan badiam wan burung-burung diudara baisian sarang. Akan tatapi, Anak Manusia kada baisi wadah gasan baistirahat." ⁵⁹ Yesus baucap lawan saikung wan nang lainya, "Umpati Aku!" Akan tatapi, urang itu baucap, "Tuhan, izinakan ulun tulak wan manguburakan abah ulun tadahulu." ⁶⁰ Akan tatapi, Yesus baucap lawan inya, "Biar haja urang mati manguburakan urang mati, sabab ikam musti tulak wan mangabarakan parihal Karajaan Allah ⁶¹ Wan, ada saikung pulang baucap, "Aku pacangan maumpati Pian, Tuhan, tatapi izinakan badahulu ulun bapamitan tarlabih badahulu lawan kaluargaku." ⁶² Yesus baucap lawan inya, "Kadada saikung urang pun nang tanganya hudah mamingkuti bajak, tatapi masih bapaling ka balakang, nang pantas gasan Karajaan Allah."