Bariakan Diriikam wan Allah ¹ Dari mana garang asal mula pasalisihan wan parkalahian nang rancak terjadi antara buhan ikam? Kadakah itu bamula mata hawa nafsu nang bagajolak intang awak buhan ikam? ² Ikam mahandaki sasuatu, tatapi kada kawa kolehannya, balalu ikam mambunuh. Ikam iri hati wan kada mandapatakannya, makanya ikam bahual wan bakalahi. Ikam kada mandapatakan lantaran ikam kada suah maminta. ³ Atawa, ikam maminta, tatapi kada dikabulakan lantaran ikam maminta gasan dipakai nang kada baik, yaitu gasan mamuasakan hawa nafsuikam. ⁴ Woi, ikam buhan pezina, kada tahukah ikam bahwa bakawanan wan dunia baarti bamusuh wan Allah? Dagan itu, siapa haja nang handak bakawan wan dunia, inya manjadiakan diriinya musuh Allah. ⁵ Apakah ikam pikir Kitab Suci* kada baalasan baucap, "Roh* nang diandakakan Allah intang diri kita dihandaki-Inya wan camburu,"? ⁶ Tapi, Allah mambari anugerah nang labih lagi. Dagana itu, Kitab Suci baucap, 'Allah manantang urang nang sobong, tatapi mambari anugerah wan urang nang randah hati." ⁷ Dagana itu, sarahakanlah diri ikam wan Allah. Lawan haja setan, maka inya pacangan bukah matanikam. ⁸ Baparaklah wan Allah, wan Inya cagar parak wan ikam. Barasihakan tangan ikam, woi urang-urang badosa, wan murniakanlah hati ikam, woi urang-urang nang mandua hati. ⁹ Prihatin, baduka, wan marataplah; biarakan tatawa ikam baubah manjadi ratapan wan sukacita ikam manjadi dukacita. ¹⁰ Randahakanlah hati ikam di hadapan Tuhan, maka Inya cagar maninggiakan ikam. Jangan Mencela wan Mahakimi Dingsanakikam. ¹¹ Dingsanak-dingsanak, jangan basasambatan nang jahat diantara buhan ikam. Urang nang manyambat nang jahat dinsanaknya, atawa mahakimi dingsanaknya, baucap malawan hukum wan mahakimi hukum. Pabila ikam mahakimi hukum, ikam kada pelaku hukum, tatapi hakimnya. ¹² Hinggan ada satu nang Mambari Hukum wan Hakim, yaitu Inya nanh kawa mayalamatakan wan mambinasaakan; tatapi siapa garang ikam sehingga ikam mahakimi dinsanak ikam? Kahandak Allah dalam Sabataan Rencana Manusia ¹³ Wayahini, dangarakan woi ikam nang bapadah, "Hari ini atawa esok kami cagar tulak ka kota ini wan itu, badiam di sana salawas satahun, badagang, wan kolehan untung," ¹⁴ padahal ikam kada tahu apa nang pacangan terjadi kena. Apa garang arti hidup ikam? Hidup ikam itu nangkaya uap nang cungul satumat, balalu lenyap. ¹⁵ bJadi, ikam saharusnya baucap, "Pabila Tuhan mahandaki, kami cagar hidup wan malakuakan ini atawa itu." ¹⁶ Tatapi wayahini, ikam himung intang kasombongan ikam; kahimungan nangkaya itu adalah jahat. ¹⁷ Jadi, pabila ada urang nang tahu kayaapa maulah nang baik, tatapi kada maulahnya, inya badosa.