Paringatan gasan Urang-Urang Sugih ¹ Woi urang-urang sugih, dangarakan! Manangis wan marataplah gasan penderitaan nang pacangan manimpa ikam. ² Kasugihan ikam sudah mambusuk wan baju ikam dimakan ngengat. ³ Amas wan perak ikam sudah batagar, wan tagar itu cagar manjadi bukti nang mambaratakan ikam wan cagar mamakan awak ikam nangkaya api. Ikam sudah manimbun harta intang hari-hari pahabisan. ⁴ Dangarakan, upah buhan nang bagawi di pahumaan ikam, nang ikam tahan lantaran kaculasan, bakuciak malawan ikam. Wan, kuciakan buhan nang mamanen sudah sampai ka talinga Tuhan semesta alam. ⁵ Ikam sudah hidup di bumi bamewah-mewah wan manyanangakan diri saurang, ikam sudah malamakakan hati ikam intang hari panyambalihan. ⁶ Ikam sudah mahukum wan mambunuh urang benar, wan inya kada malawan ikam. Tabah intang Pandaritaan ⁷ Lantaran itu, Dingsanak-dingsanakku, basabarlah sampai intang Hari Kadatangan Tuhan. Itihi nangkayaapa petani mahadangi buah nang baik nang dihasilakan tanah, mahadanginya wan sabar sampai wayahnya hujan awal wan akhir. ⁸ Ikam jua harus basabar, kuatakan hati ikam dagana kadatangan Tuhan sudah parak. ⁹ Dingsanak-dingsanakku, jangan buhan ikam manggarunum saikung wan nang lainnya supaya ikam kada dihukum. Itihi, Sang Hakim suda badiri di lawang. ¹⁰ Dingsanak-dingsanakku, sebagai teladan intang penderitaan wan kasabaran, itihi buhan nabi nang bapander dalam Tuhan. ¹¹ Kami maanggap babahagia buhan nang tabah. Ikam sudah mandangar katabahan Ayub wan malihat maksud Tuhan pada akhirnya, bahwa Tuhan itu hibak wan belas kasih wan murah hati. Jangan Basumpah ¹² Tatapi, Dingsanak-dingsanakku, di atas sabarataan itu, jangan ikam basumpah, baik demi langit, bumi, atawa demi apa haja. Padahakan "Ya" pabila ya wan "Kada' pabila kada supaya ikam kada tahukum. Kuasa Doa dalam Iman ¹³ Apakah di antara ikam ada nang rahat mandarita? Biarlah inya badoa. Apakah ada nang rahat basukacita? Biarlah inya manyanyiakan mazmur. ¹⁴ Apakah di antara ikam ada nang rahat garing?Biarlah inya mangiau tua-tau* jemaat wan buhannya harus mandoaakan inya, mangurapi inya wan minyak dalam ngaran Tuhan. ¹⁵ Doa nang dinaikan dalam iman cagar manyalamatakan urang nang garing itu wan Tuhan pacangan mambangunakan inya. Wan, pabila inya sudah maulah dosa, inya cagar diampuni. ¹⁶ Danaga itu, haruslah buhan ikam baakuan dosa ikam wan saling mandoakan supaya ikam waras. Doa urang benar nang dinaikakan wan bujur-bujur, ganal banar kuasanya. ¹⁷ Elia* adalah manusia biasa nangkaya kita. Inya badoa wan bujur-bujur supaya kada turun hujan, balalu hujan kada turun intang negri itu salawas tiga tahun anam bulan. ¹⁸ Balalu, inya badoa pulang, maka langit mancurahakan hujan wan bumi manumbuhakan buahnya. Manulung Urang Babulik wan Allah ¹⁹ Dingsanak-dingsanakku, saandainya ada di antara ikam nang manyimpang dari kebenaran, balalu ada urang nang manolong inya babulik, ²⁰ tahulah bahwa urang nang mambawa urang badosa babulik ka jalan nang benar cagar manyalamatakan urang itu dari kamatian wan manutupi banyak dosa.