Jagai Kata-kata nang Kita Ucapakan ¹ Dinsanak-dinsanakku, jangan banyak diantara buhan ikam nang handak manjadi guru dagana ikam tahu saurang bahwa kita nang mangajar cagar dihakimi wan ukuran nang labih barat. ² Kita sabarataan basalah intang banyak hal. Pabila ada urang nang kada suah basalah intang pamanderaninya, inya adalah urang nang sampurna, nang kawa mangandaliakan sabarataan awak. ³ Kita mamasang kekang intang muntung kuda supaya inya manuruti kita, wan kita jua kawa mangandaliakan saluruh awak kuda. ⁴ Itihi jua kapal-kapal, biar ganal banar wan ditunjul uleh angin nang gancang, kapal itu kawa dikendaliakan uleh kemudi nang halus banar, wan kawa tulak balayar kaman haja juru mudi mahandakinya. ⁵ Kaitu jua, ilat adalah bagian nang paling halus matan awak, tatapi kawa manyombongakan hal-hal besar. Itihi jua kayaapa luasnya hutan nang kabaran lantaran uleh api nang halus aja awalnya. ⁶ Ilat nangkaya api, ibarat dunia kejahatan, nang diandak di antara bagian -bagian awak wan nang kawa manajisakan saluruh awak. Inya mambakar saluruh arah hidup kita samantara inya saurang dibakar uleh api naraka. ⁷ Sabab, samuaan binatang liar wan burung, reptil wan binatang nang hidup di laut itu jinak wan sudah dijinakakan uleh manusia, ⁸ tatapi kada saikung urang nang kawa manjinakakan ilat. Ilat adalah nang paling jahat nang kada kawa badiam, hibak wan racun nang mamatiakan. ⁹ Lawan ilat kita mambarkati Tuhan wan Bapa kita, tatapi wan itu jua kita mangutuk urang, nang diciptaakan sarupa wan Allah. ¹⁰ Matan muntung nang sama kaluar pujian wan kutuk. Dinsanak-dinsanakku, saharusnya kada buleh nangkaya itu. ¹¹ Apakah sabuting mata banyu kawa mangaluarakan banyu nang manis wan banyu nang pahit taimbai rahat itu jua? ¹² Dingsanak-dingsanakku, kawakah pohon ara mahasilakan buah zaitun, atawa pohon anggur mahasilakan buah ara? Kaitu jua, mata banyu asin kada kawa mahasilakan banyu nang hambar. Dua Macam Hikmat ¹³ Siapa garang diantara buhan ikam nang bahikmat wan baisi pamahaman? Biarhaja wan sikapnya nang baik, inya manampaiakan perbuatan-perbuataninya dalam kalembutan wan hikmat. ¹⁴ Tatapi, pabila ikam baisi iri hati nang hibak kapahitan wan ambisi nang egois intang hatiikam, janganlah himung wan jangan badusta malawan kebenaran. ¹⁵ Hikmat nangkaya itu kada turun matan atas, tatapi matan dunia, kada rohani, wan jahat. ¹⁶ Pabila ada iri hati wan ambisi nang egois, di situ ada kakacauan wan sagala macam perbuatan jahat. ¹⁷ Hikamt nang datang matan atas, partama-tama adalah murni, balalu katuju nang damai, lemah lembut, tabuka, belas kasihan wan buah-buah nang baik, kada manbida-bidaakan, wan kada munafik. ¹⁸ Buah kebenaran ditaburakan dalam damai uleh buahn pendamai.