Sayangi Sabarataan Urang ¹ Dinsanak-dinsanakku, jangan manampaikan imanikam dalam Tuhan kita nang mulia, Yesus Kristus, dengan mambida-bidaakan urang. ² Pabila ada urang nang datang ka sinagoge ikam mambawa cincin amas wan babaju nang larang, wayah itu jua, datang jua urang miskin nang babaju rigat, ³ balalu ikam mambariakan perhatian khusus ka urang nang babaju larang itu wan baucap wan inya, "Silahakan baduduk di wadah nang baik ini, " tatapi ka urang nang miskin itu ikam baucap, "Badirian haja disana!" atawa "Baduduk haja parak batisku!" ⁴ Kadakah ikam sudah mambida-bidaakan di antara ikam wan manjadi hakim wan pikiran-pikiran nang jahat? ⁵ Dinsanak-dinsanak nang kusayangi, dangarakanlah! Kadakah Allah sudah mamilih urang nang miskin di mata dunia gasan manjadi sugih tntang iman wan mawarisi Karajaan Allah nang imbah Inya janjiakan ka buhannya nang manyayangi Inya? ⁶ Tatapi, ikam sudah mahina urang miskin. Kadakkah urang nang sugih nang manindas wan manyeret ikam ka pangadilan? ⁷ adakah buhannya nang mahujat Ngaran baik, nang ulehinya ikam dikiau? ⁸ Pabila ikiam manjalanakan hukum nang utama sasuai Kitab Suci*, yaitu "Sayangilah sasama ikam manusia nangkaya diri ikam saurang," ikam sudah manggawi nang baik. ⁹ Tatapi, pabila ikam mambida-bidaakan urang, ikam maulah dosa wan manyataakan sabagai palanggar hukum oleh hukum. ¹⁰ Siapa haja nang manaati samua hukum, tatapi gagal manaati satu bagiannya haja, inya basalah lawan saluruh hukum itu. ¹¹ Sabab, Inya nang baucap, "Jangan bazina*," jua baucap, "Jangan mambunuh." Jadi, pabila ikam kada maulah perzinahan, tatapi ikam mambunuh, ikamsudah malanggar hukum itu. ¹² Bapander wan batindaklah sasuai urang-urang nang cagar dihakimi wan hukum nang mambibasakan. ¹³ Sabab, panghakiman kada pacangan baisibelskasihan wan urang kada manampaiakan belas kasihan; belas kasihan cagar manang atas panghakiman. Iman Kada Dijalanakan adalah Mati ¹⁴ Dinsanak-dinsanakku, apa gunanya urang manyambat bahwa inya baisi iman, tatapi inya kada manggawinya? Kawakah iman itu manyalamatakan inya? ¹⁵ Pabila ada dinsanak nang kada baisi baju atawa apa nang gasan inya makan sahari-hari, ¹⁶ balalu ada diantara ikam baucap wan inya, "Lalui aja, samoga awak ikam kada kadinginan wan dikanyangakan," tatapi ikam kada mambari apa-apa gasan nang diparluakan inya, apa gunanya itu? ¹⁷ Kaitu jua iman, pabila iman kada diiringi perbuatan-perbuatan, pada dasarnya iman itu mati. ¹⁸ Tapi, pabila baisi urang nang baucap, "Ikam baisi iman, wan aku baisi perbuatan, "Aku cagar manjawab,"Tampaiakan imanikam tanpa perbuatan, wan aku cagar manampaiakan imanku wan perbuatan." ¹⁹ Ikam percaya bahwa Allah itu satu. Itu bujur. Roh-roh jahat gin percaya lawan buhannya manggitir takutan. ²⁰ wui urang bungulai! Kawakah ikam mamahami bahwa iman tanpa perbuatan adalah sia-sia? ²¹ Kadalah Abraham*, abah kita, dibenarkan uleh perbuatan-perbuatan wayah inya mangurbanakan Ishak*, anaknya, di atas altar*? ²² Lihati bahwa iman bagawi sama lawan perbuatan-perbuatannya, wan uleh perbuatan-perbuatan, iman disampurnaakan. ²³ Di ganapilah apa nang dipadahakan Kitab Suci*, "Abraham percaya wan Allah, balalu itu dihitungakan ka inya manjadi kebenaran," wa inya dikiau "Sahabat Allah". ²⁴ Jadi, ikam itihi bahwa mtan perbuatanlah urang dibenarakan, kada matan iman haja. ²⁵ Kaitu jua, kadakah Rahab, lahung itu, dibenarakan lantaran perbuatan wayah inya manarima mata-mata Israel wan mambantu buhannya bukah maliwati jalan nang lain? ²⁶ Jadi, sama nangkaya awak mun kakada roh adalah mati, kaitu jua iman mun kadada perbuatan adalah mati.