Ibadah dalam Parjanjian Lawas ¹ Bahkan, parjajian nang lawas gin baisi tentang paraturan ibadah wan wadah kudus nang ada di bumi. ² Lantaran kayaitu Kemah Allah diparsiapakan: bagian luar, nang wadah kaandakan palita, meja, wan roti sajian, dikiyau Wadah Kudus. ³ Di balakang tirai kadua adalah bagian kemah nang dikiyau Ruang Mahakudus, ⁴ di wadah ini baisi altar padupaan nang diulah dari amas wan Tabut Parjanjian nang saluruh sisinya dilapisi amas. Di dalam tabut itu, ada baisi sabuah kendi amas nang baisi manna, tungkat Harun nang suah batunas, wan dua lempeng batu parjanjian. ⁵ Di atasnya, ada dua kerub kamuliaan nang manaungi Tutup Pendamaian, tatapi wayah ini kada waktu nang pas mamanderakannya secara taparinci. ⁶ Imbah sabarataan itu disiapakan babujur, buhan imam masuk ka bagian partama dari kemah itu secara rutin, gasan maulah palayanan ibadah gasan Allah. ⁷ Akan tatapi,Hinggan imam besar haja nang dibolehakan masuk ka bagian kadua matan kemah itu, itu gin hunggan satahun sakali, wan mambawa darah gasan diparsambahakan wan Allah demi dirinya sorang wan demi dosa-dosa umat nang kada sangaja diulah. ⁸ Roh Kudus manyataakan wan kita bahwa jalan manuju Ruang Mahakudus balum tabuka salawas Ruang Kudus masih ada, ⁹ hal itu adalah ibarat manganai zaman wayah ini. Kayaitu jua macam-macam pambarian wan kurban-kurban nang diparsambahakan kada kawa manyampurnaakan hati nurani urang-urang nang baibadah, ¹⁰ sabab hinggan bakaitan wan makanan, minuman, wan ritual pambasuhan gasan awak jasmani nang barlaku sampai datang wayahnya pambaharuan. Ibadah dalam Parjanjian nang Hanyar ¹¹ Tatapi, rahat Kristus datang jadi Imam Besar atas hal-hal baik nang pacangan datang, Sidin masuk malalui Wadah Kudus nang labih ganal wan labih sampurna; nang kada diulah uleh tangan manusia wan lain suatu ciptaan. ¹² Sidin masuk ka Ruang Mahakudus satu kali gasan salawasannya, kada lawan mambawa darah kambing jantan wan darah anak sapi, tatapi wan mambawa darah-Nya sorang sampai kolehan panabusan nang kekal. ¹³ Sabab, amun panyimburan darah kambing jantan wan sapi jantan, wan abu anak sapi binian gasan urang nang najis kawa manyuciakan awak jasmani buhannya, ¹⁴ Labih lagi darah Kristus, yaitu Inya nang malalui Roh nang kekal mamparsambahakan diri-Nya sabagai kurban nang kada bacacat wan Allah gasan manyuciakan hati nurani ikam dari gawian nang sia-sia supaya ikam kawa malayani Allah nanh hidup. ¹⁵ Gasan alasan inilah Kristus manjadi parantara matan parjanjian nang hanyar supaya buhannya nang sudah dikiyau Allah kawa manarima warisan kekal nang udah dijanjiakan-Nya; sabab sabuah kamatian udah tarjadi gasan manabus buhannya matan palanggaran-palanggaran nang buhannya ulah di bawah parjanjian nang pampaian. ¹⁶ Amun ada surat wasiat, maka harus ada kamatian dari urang nang maulahnya. ¹⁷ Sabab, surat wasiat hinggan barlaku amun urang nang maulahnya udah mati; surat itu kada baisi kuasa salawas urang nang maulahnya masih hidup. ¹⁸ Itulah sababnya, kanapa parjanjian panampaian pun kada barlaku mun kadada kurban darah. ¹⁹ Sabab, imbah Musa mamadahakan satiap parintah dalam Hukum Taurat gasan umat Israel, inya maambil darah anak sapi wan kambing balalu mancampurinya lawan banyu. Wan, mamakai kain wol habang wan sabatang hisop, inya manyimburinya intang Kitab Taurat wan sabarataan umat ²⁰ sambil baucap, "inilah darah matan parjanjian nang udah Allah parintahakan gasan ikam taati." ²¹ Nangkaya cara nang sama, Musa jua manyimburi Kemah Suci wan sabarataan parabotan nang dipakai intang ibadah mamakai darah. ²² Manurut Hukum Taurat, hampir sabarataan harus disuciakan lawan darah, wan mun kadada panumpahan darah, kada pacangan ada pangampunan. Yesus Kristus adalah Kurban Panghapus Dosa ²³ Lantaran itu, sabarataan nang malambangakan hal-hal surgawi sangat parlu disuciakan lawan hal ini, tatapi sabarataan nang di surga disuciakan wan kurban nang labih baik. ²⁴ Sabab, Kristus kada masuk ka dalam Ruang Mahakudus nang diulah uleh tangan manusia, nang hinggan tiruan matan nang sabujurnya, tatapi inya masuk ka dalam surga itu sorangan wan wayahini ada di hadapan Allah gasan kita. ²⁵ Kristus kada mamparsambahakan diri-Nya baulang-ulang, nangkaya imam besar nang harus masuk ka Ruang Mahakudus dari tahun ka tahun sambil mambawa darah nang lain darahnya sorang. ²⁶ Amun kayaitu, Kristus harus mandarita baulang-ulang mulai dunia diciptaakan. Akan tatapi, Kristus hinggan manyataakan diri-Nya satu kali gasan salawasannya intang zaman akhir ini gasan mahapus dosa, malalui mamparsambahakan diri-Nya sorang. ²⁷ Nangkaya manusia, nang ditantuakan mati sakali haja wan imbah itu mahadap panghakiman, ²⁸ kayaitu jua Kristus; Inya diparsambahakan hinggan sakali haja gasan mananggung dosa urang banyak, wan pacangan datang kadua kalinya, kada gasan mananggung dosa pulang, tatapi gasan mambawa kasalamatan gasan buhannya nang mahadangi Sidin.