Yesus adalah Imam Besar Perjanjian Hanyar ¹ Inilah pokok utama pmanderan kita: kita baisi imam Besar yang duduk di sabalah kanan takhta Nang Mahatinggi di surga. ² Sidin malayani di ruang Mahakudus wan di Kemah Suci sejati nang didiriakan uleh Allah sorangan, lain uleh manusia. ³ Lantaran satiap imam besar ditunjuk gasan mamparsambahakan pambarian wan kurban, maka Imam Besar ini harus mambawa sasuatu gasan diparsambahakan. ⁴ Pabila Imam Besar ini hidup di bumi, Inya kada pacangan manjadi imam sama sakali sabab di bumi udah ada imam-imam nang mamparsambahakan pambarian sasuai Hukum Taurat, ⁵ yaitu buhannya nang baibadah manurut tiruan wan bayang-bayang matan hal-hal surgawi nangkaya rahat Allah maingatakan Musa rahat Inya handak mandiriakan Kemah Suci: "Pastiakanlah ikam maulah sabarataannya sasuai wan rancangan nang udah Kutunjukakan wan ikam di atas gunung." ⁶ Tatapi, wayahini, Yesus manarima tugas palayanan nang jauh labih mulia lantaran parjanjian hanyar nang diparantarai uleh-Sidin itu jua jauh labih tinggi wan ditatapakan badasarakan wan janji-janji nang labih baik. ⁷ Sabab, amun parjanjian nang partama kada baisi kasalahan, kada pacangan ada nang mamarluakan parjanjian nang kadua. ⁸ Lantaran Allah mandapatakan kasalahan manusia, Sidin baucap, "Lihati, wayahnya sudah ,' ujar Tuhan, 'wayahnya Aku cagar maulah sabuah parjanjian hanyar wan kaum Israel wan kaum Yehuda. ⁹ Kada nangkaya parjanjian nang udah Ku ulah gasan padatuan buhan ikam, yaitu rahat Aku maajaki buhannya lawan tangan-Ku sorangan gasan mamimpin buhannya kaluar matan tanah Mesir. Lantaran buhannya kada setia wan parjanjian nang Kubariakan, maka Aku kada paduli lawan buhannya,'ujar Tuhan. ¹⁰ Inilah parjanjian nang cagar Kuulah gasan kaum Israel imbah paristiwa itu,'ujar Tuhan: 'Aku pacangan maandak hukum-hukum-Ku dalam pikiran buhannya, wan Aku pacangan manulisakannya intang hati buhannya. Aku cagar manjadi Allah buhannya, wan buhannya cagar manjadi umat-Ku. ¹¹ Buhannya kada pacangan lagi mangajar sasama bangsanya atawa dinsanaknya lawan baucap, 'Pinandui Tuhan' lantaran sabarataan urang pacangan pinandu Aku, mulai nang halus sampai nang paling ganal. ¹² Sabab, Aku cagar maras banar pabila buhannya malanggar wan badosa. Wan, Aku kada pacangan lagi maingat kasalahan-kasalahan buhannya.""Yeremia 31: 31-34 ¹³ Wayah Allah maucapakan parjanjian hanyar ini, Sidin maulah parjanjian nang lawas kada barlaku lagi. Wan, apa nang sudah kada barlaku lagi wan usang cagar lakas hilang.