Imam Melkisedek ¹ Sabab, Melkisedek, Raja Salem wan imam Allah Nang Mahatinggi, manamui Abraham imbah Abraham bulik mambantai raja-raja, balalu mambarkahinya. ² Gasan Melkisedek, Abraham mambari saparsapuluh matan samua harta rampasan hasil kolehannya. Partama-tama, ngaran Melkisedek baarti "Raja kebenaran", salanjutanya, "Raja Salem" nang artinya "raja damai". ³ inya baisi abah atawa uma, kada baisi silsilah, wan hidupnya kada baawal atawa baakhir. Akan tatapi, nangkaya Anak Allah, inya cagar manjadi imam salawas-lawasannya. ⁴ Itihi haja, dasar bujur agung urang ini, sampai Abraham padatuan kita manyarahakan wan inya saparsapuluhan matan hasil rampasan perangnya. ⁵ Manurut Hukum Taurat, anak-anak Lewi nang manarima jabatan imam berhak mangumpul parsapuluhan matan umat nang adalah dinsanak-dinsanak buhannya, walaupun buhannya sama-sama katurunan Abraham. ⁶ Tatapi, Melkisedek nang kada matan katurunan Lewi, manarima parsapuluhan matan Abraham wan mambarkahi inya nang mamingkut janji-janji Allah. ⁷ Wan, kada kawa disangkal, nang labih randah diberkahi uleh nang labih tinggi. ⁸ Dalam isa hal, parsapuluhan ditarima uleh manusia fana nang bisa mati. Tatapi, intang hal ini, ditarima uleh dia nang dipastiakan hidup. ⁹ Lantaran itu, kawa dipadahakan bahwa buhan kaum Lewi nang berhak manarima parsapuluhan gin mambayar jua parsapuluhan buhannya malalui Abraham, ¹⁰ Sabab rahat Melkisedek manamuinya, Lewi masih ada intang awak padatuannya. ¹¹ Wayahini, saandainya kasampurnaan bisa tacapai malalui keimaman Lewi 9nang lantarannya, umat Israel kulehan Hukum Taurat), gasan apa ada imam lain nang harus dibangkitakan manurut aturan Melkisedek, wan lain imam matan garis katurunan Harun? ¹² Sabab, amun aturan kaimaman baubah, maka Hukum Taurat gin harus diubah. ¹³ Urang nang rahat kita panderakan ini baasal matan suku nang lain, wan kadada saikung-ikungnya dari suku-Nya nang suah batugas manjadi palayan altar. ¹⁴ Sabab, sudah jalas bahwa Tuhan kita baasal matan suku Yehuda, suku nang tentangnya Musa kada suah manyambat hal apa-apa nang bakaitan wan buhan imam. Yesus adalah Imam nangkaya Melkisedek ¹⁵ Samua hal ini manjadi samakin jalas rahat kita malihat cungulnya saikung imam lain, nang sarupa wan Melkisedek, ¹⁶ nang manjadi imam lain badasarakan parsaratan katurunan jasmani, tatapi bardasarakan kuasa kahidupan nang kada kawa binasa. ¹⁷ Sabab, Kitab Suci basaksi tentang Sidin: "Pian adalah Imam gasan salawasannya, manurut paraturan Melkisedek." ¹⁸ Di isa sisi, paraturan nang lawas sudah kada tepakai lantaran baisi kakurangan wan udah kada baguna, ¹⁹ wan lantaran hukum itu kada manyampurnaakan apa-apa. Tatapi, di sisi lain, ada pangharapan nang labih baik nang diperkenalakan lawan kita, wan pangaharapan itu manarik kita supaya mamaraki ka Allah. ²⁰ Wan lantaran pangharapan itu dibawa gasan kita lawan sabuah sumpah-imam nang lain manjadi imam kada diiringi sumpah. ²¹ Tatapi, Inya manjadi Imam wan sumpah nang diulah oleh Sidin nang baucap gasan -Nya, "Tuhan udah basumpah wan Inya kada cagar baubah pikiran: 'Pian adalah Imam gasan salawasannya. "Mazmur 110:4 ²² Lantaran sumpah ini, Yesus sudah manjadi jaminan matan parjanjian nang labih baik. ²³ Sabalumnya, ada banyak imam sahingga pabila ada imam nang mati, ada nang kawa manggantiakannya. ²⁴ Tatapi, Yesus mamingkut kaimaman secara tatap salawasannya lantaran Sidin pacangan hidup salawasannya. ²⁵ Imbah kayaitu, Yesus kawa manyalamatakan secara sampurna buhannya nang datang ka Allah malalui-Sidin, lantaran Sidin tarus badoa gasan buahnnya. ²⁶ Imam besar nangkaya itulah nang kita parluakan, yaitu Imam Besar yang kudus, kada bacacat, murni, dipisahakan matan urang-urang badosa, wan dtinggiakan malabihi tingkat-tingkat surgawi. ²⁷ Yesus kada nangkaya buhan imam besar lain. Buhannya harus mamparsambahakan kurban satiap hari, partama gasan dosa buhannya sorangan, imbah itu gasan dosa-dosa umat. Tatapi, Yesus kada parlu manggawiakannya. Sidin hinggan mamparsambahakan kurban sakali gasan salawasannya, yaitu diri-Nya sorangan. ²⁸ Hukum Musa manatapakan manusia yang hibak kalamahan gasan manjadi imam-imam besar. Akan tatapi, sumpah nang baasal matan Allah, nang datang imbah Hukum Musa, manatapakan Anak-Sidin, nang sudah dijadiakan sampurna sampai salawasanya.