¹ Lantaran itu, ayu saorang tinggalakan dasar tentang Kristus wan malangkah lawan kadiwasaan, kada lagi maulang-ulang ajaran dsar tetang, partubatan matan parbuatan nang mati wan imam lawan Allah; ² ajaran masalah pambasuhan wan panumpangan tangan; ajaran masalah kabangkitan urang mati wan hukuman kekal. ³ Wan, itulah nang cagar kita gawi, pabila Allah maijinakannya. ⁴ Sabab, kada mungkin maulah urang batubat pulang imbah mandapatakan pancerahan, imbah marasaakan karunia surgawi, imbah maambil bagian intang Roh Kudus, ⁵ marasai kabaikan firman Allah, wan marasaakan kuasa matan dunia nang cagar datang, ⁶ Amun buhannya maninggalakan jalan Kristus, maka mustahil kawa mahanyari pulang partobatan buhannya lantaran buhannya sudah manyalibakan Anak Allah untuk kadua kalinya wan manyupani-Sidin secara nyata. ⁷ Sabab, tanah nang manyarap banyak banyu hijan nang gugur di atasnya, wan mahasilakan buah nang bamanfaat gasan buhannya nang manggarapnya, cagar manarima barakah matan Allah. ⁸ Tatapi, amun tanah itu hinggan manumbuhakan duri wan samak-samak, maka tanah itu kada baguna wan parak kana kutuk, wan pahabisannya dicucul. ⁹ Akan tatapi, dinsanak-dinsanakku nang kusayangi, biar kami bapander kayaitu, kami mayakini hal-hal nang labih baik masalah ikam, yaitu hal-hal nang bahubungan wan kasalamatan. ¹⁰ Sabab, Allah kadaknya kada adil. Sidin ingat haja samua gawian wan kasih ikam nang ikam tampaiakan demi ngaran-Sidin wan malayani urang-urang Kudus nangkaya masih ikam ulah wayahini. ¹¹ Kami kaganangan asing-asing ikam manampaiakan kauletan nang sama gasan mamiliki jaminan pangharapan nang sampurna sampai akhir, ¹² supaya ikam jangan manjadi koler, tatapi maumpati taladan urang-urang nang imbah mawarisi janji-janji Allah malalui iman wan kauletan. Janji Allah Kada Suah Baubah ¹³ Rahat Allah bajanji wan Abraham, Sidin bajanji atas Sidin sorang lantaran kadada nang labih ganal daripada Sidin sorang. ¹⁴ Allah baucap, "Aku pasti cagar mambarkahi ikam," wan "Aku pasti cagar malipatgandaakan katurunan ikam." ¹⁵ Wan, imbah mahadangi lawan sabar, Abraham manarima janji itu. ¹⁶ Manusia basumpah demi urang nang labih ganal daripada dirinya sorang, wan sumpah dibariakan gasan managasakan supaya manyudahi masalah bahual. ¹⁷ Jadi, rahat Allah handak manampaiakan wan labih mayakinakan gasan ahli waris janji-Sidin bahwa tujuan-Sidin kada pacangan baubah, Sidin manjamin lawan maulah sumpah ¹⁸ Sahingga lawan dua hal nang kada kawa baubah itu, nang mangenai inya Allah mustahil bakaramput, kita nang datang mancari perlindungan supaya kulehan samangat nang ganal gasan bapingkut taguh wan pangharapan nang dibariakan gasan kita. ¹⁹ Pangharapan nang ampun kita ini adalah jangkar gasan jiwa kita, kuat wan pasti, nang manambus masuk sampai ka sabalah tirai, ²⁰ ka wadah nang sudah dimasuki Yesus gasan mambuka jalan gasan kita supaya manjadi Imam Besar gasan salawas-lawasnya, sasuai wan paraturan Melkisedek.