¹ Sabab, satiap imam Ganal nang dipilih matan antara manusia ditunjuk gasan manjadi wakil manusia dalam hal-hal nang barkenaan lawan Allah, supaya inya kawa mamparsambahakan parsambahan-parsambahan wan kurban-kurban atas dosa-dosa. ² Lantaran imam Ganal juga hibak lawan kalamahan, maka inya jua kawa basikap lambut tarhadap urang-urang nang kada baisi pangatahuan wan mudah tarsasat. ³ Nintu sababnya, inya wajib mamparsambahakan kurban panghapusan dosa, kada cuman gasan umat, tatapi jua gasan dirinya saurang ⁴ Kadada imam Ganal nang kawa maambil kahurmatan ini gasan dirinya saurang, inya hanya manarimanya wayah inya dikiau oleh Allah, nang kaya halnya Harun. ⁵ Damikian jua Kristus kada mamuliakan diri-Nya saurang gasan manjadi saikung urang nang Imam Ganal, tatapi oleh Sidin nang bapadah lawan Sidin, "Pian adalah Anak-Ku. wayah hari ini Aku udah manjadi bapa-Mu." Mazmur 2 : 7 ⁶ Di bahagian lain Inya jua baucap, "Pian adalah imam gasan salawasannya, manurut paraturan Melkisedek." Mazmur 110:4 ⁷ Dalam hidupnya sabagai manusia, Yesus mamparsambahakan doa atawa parmuhunan lawan ratapan wan banyu mata, gasan Sidin nang kawa manyalamatakan-Nya matan kamatian. Wan, Inya didangar lataran kasalehan-Nya. ⁸ Biar Yesus adalah Anak, tatapi Inya balajar maasi malalui pandaritaan nang dijalani-Nya. ⁹ Lawan imbah disampurnaakan, Inya manjadi sumber kasalamatan kekal hasan sabarataan urang nang maasi wan-Inya, ¹⁰ wan Inya imbah dikiyau uleh Allah manjadi Imam Besar sasuai paraturan Melkisedek. Malangkah manuju kadewasaan Ruhani ¹¹ Ada banyak nang kawa di padahakan masalah ini. Akan tatapi, ngalih gasan manjalasakannya lantaran ikam sudah kada katuju mandangarakan. ¹² Sabab, saharusnya wayahini ikam sudah kawa mangajar, tatapi kanyataannya ikam masih parlu urang gasan mangajari ikam masalah prinsip-prinsip dasar firman Allah. Ikam masih mamarluakan susu, kada makanan nang karas. ¹³ Sabab, urang nang hidup matan susu adalah urang nang balum bapangalaman dalam mamahami ajaran masalah kebanaran, inya masih bayi. ¹⁴ Akan tatapi, makanan padat adalah gasan urang-urang nang sudah dewasa, yaitu buhannya nang sudah malatih awaknya supaya kawa mambidaakan apa nang baik wan nang jahat.