Pangurbanan Yesus Kristus Sakali gasan Salawasannya ¹ Lantaran Hukum Taurat hinggan baisi bayangan tentang hal-hal baik nang cagar datang wan lain gambaran sasungguhnya dari hal-hal itu, maka lawan kurban-kurban nang sama, nang buhannya parsambahakan tarus-tarusan satiap tahun, hukum itu kada pacangan kawa manyampurnaakan buhannya yang datang baparak. ² Tatapi sabaliknya, kadakah pambarian parsambahan saharusnya udah kada lagi diulah lantaran sakali disuiakan, urang-urang nang baibadah itu kada lagi marasaakan adanya kasadaran akan dosa? ³ Akan tatapi, intang parsambahan dosa itu, buhannya justru diingatakan akan dosa-dosa buhannya dari tahun ka tahun. ⁴ Sabab, darah lembu lakian wan kambing lakian kada mungkin kawa mahapus dosa. ⁵ Lantaran itu, wayah Kristus datang ka dunia, Sidin baucap, "Kurban wan parsambahan Pian kada hakun, tatapi saawakan sudah Pian siapakan gasan-Ulun; ⁶ Pian kada hakun wan kurban bakaran wan kurban panghapus dosa. ⁷ Imbah itu Ulun baucap, "Inilah Ulun:Ada tatulis tentang Ulun intang gulungan kitab, Ulun datang gasan manggawi sasuai kahandak Pian, ya Allah.""Mazmur 40:7-9 ⁸ Imbah Kristus mamadahakan, "Kurban wan parsambahan, balalu kurban bakaran wan kurban panghapus dosa kada Pian katujui, wan kada Pian tarima, "(nang diparsambahakan sasuai wan Hukum Taurat) ⁹ Inya manambahakan, "Inilah Aku. Aku datang gasan manggawi nang Pian kahandaki." Jadi, Yesus mahapusakan nang partama balalu manatapakan nang kadua. ¹⁰ Uleh kahandak-Nya, kita dikudusakan malalui pangurbanan awak Yesus Kristus, sakali gasan salawasannya. ¹¹ Satiap imam manggawi palayanan satiap hari dari waktu ka waktu gasan mamparsambahakan kurban nang sama, nang kada kawa mahapusakan dosa; ¹² Tatapi Kristus, imbah mamparsambahakan kurban lantaran dosa, sakali haja gasan salawasannya, Inya duduk di sabalah kanan Allah ¹³ wan mahadangi wayah musuh-musuh-Nya dijadiakan wadah kajajakan batis-Nya. ¹⁴ Hinggan wan satu kurban, Kristus manyampurnaakan buhannya nang imbah disuciakan-Nya gasan salawasannya. ¹⁵ Roh Kudus manjadi saksi jua gasan kita tentang hal ini sabab imbah baucap, ¹⁶ Inilah parjanjian nang cagar Kuadaakan lawan umat-Ku imbah waktu itu, ujar Tuhan:'Aku cagar maandak hukum-hukum-Ku dalam hati buhannya, wan Aku cagar manulisakannya dalam pikiran buhannya.""Yeremia 31:33 ¹⁷ Imbah itu, Inya manarusakan, "Aku kada maingat lagi dosa-dosa buhannya wan kada pacangan maingat lagi kajahatan buhannya. "Yeremia 31:34 ¹⁸ Wayahini, rahat pangampunan asan buhannya itu sudah tasadia, maka kada diparluakan lagi kurban gasan manabus dosa. Baparaklah wan Allah ¹⁹ Sabab itu, dinsanak-dinsanakku, lantaran wayahini kita baisi kawanian masuk ka dalam Ruang Mahakudus uleh pangurbanan darah Yesus, ²⁰ malalui jalan nang hanyar wan hidup, nang udah dibukaakan uleh Yesus gasan kita malalui tirai, yaitu awak-Nya, ²¹ wan lantaran kita imbah baisi saurang Imam Besar nang mangapalai rumah Allah, ²² maka itu hayu kita baparak wan Allah mamakai hati nang tulus wan kayakinan iman nang panuh, wan hati kita nang udah dibarasihakan dari nurani nang jahat, wan awak nang udah ditapas wan banyu nang murni. ²³ Hayu kita bapingkut wan pangakuan pangharapan kita lantaran Allah nang manjanjiakannya adalah satia, ²⁴ hayu kita mancari cara gasan kawa saling mandurung intang kasih wan manggawiakan ulahan-ulahan nang baik, ²⁵ wan jangan manjauhakan diri matan partamuan-partamuan ibadah kita, nangkaya dibiasaakan uleh babarapa urang. Akan tatapi, hayu kita sasama manguatakan, talabih lagi lantaran ikam tahu bahwa Hari Tuhan udah samakin parak. Jangan Malawan Allah ²⁶ Sabab, amun wan sangaja kita tatap baulah dosa imbah mandapatakan pangatahuan tentang kabenaran, maka kadada lagi kurban gasan mahapus dosa itu. ²⁷ Nang ada hinggan mahadangi panghakiman nang manakutakan wan nyarak api nang cagar mambinasaakan musuh-musuh Allah. ²⁸ Badasarakan kasaksian dari dua atawa tiga urang saksi, siapa haja nang kada manaati Hukum cagar dihukum mati kadada ampun lagi. ²⁹ Amun kayaitu, liwar baratnya panghukuman nang pantas ditarima uleh urang nang manjajak-jajak Anak Allah, wan nang maanggap najis darah parjanjian nang imbah dikudusakannya, wan nang mahina Roh* anugerah Alah? ³⁰ Sabab, kita pinandu Sidin nang baucap. "Pambalsan adalah hak-Ku; Aku pacangan manuntut pambalasan." Inya jua baucap, "Tuhan cagar mahakimi umat-Nya." ³¹ Liwar ngerinya pabila kita gugur ka dalam tangan Allah nang hidup. Paliharalah Kabanaran wan kasabaran ³² Akan tatapi, ingat haja hari-hari nang udah liwat, imbah ikam mandapat pencerahan, ikam batahan dalam parjuangan ikam mananggung kasusahan nang barat. ³³ Kadang-kadang, ikam dihina wan dianiaya yarang-tarangan dihadapan urang banyak, wan kadang-kadang ikam jua umpat mandarita wan urang-urang nang diparlakuakan nangkaya itu. ³⁴ Ikam jua manyayangi buhannya nang dipanjara, bahkan manarima wan himung rahat harta ampun ikam dijarah lantaran ikam tahu bahwa ikam baisi harta nang labih baik wan kekal. ³⁵ Lantaran itu, jangan ikam mambuang kayakinan ikam lantaran kayakinan ikam itu pahalanya ganal. ³⁶ Sabab ikam mamarluakan kauletan gasan manggawiakan kahandak Allah sahingga ikam kulehan apa nang dijanjiakan-Nya. ³⁷ Sabab, "Kada lawas lagi, Inya nang rahat datang, cagar datang, wan kada pacangan manunda. ³⁸ Tatapi, urang-Ku nang benar cagar hidup uleh iman. Wan, amun inya mundur takutan, maka jiwa-Ku kada pacangan manarima inya. "Habakuk 2:3-4 ³⁹ Kita lain urang-urang nang undur wan kabinasaan, sabaliknya urang=-urang nang baiman wan pamaliharaan jiwa.