¹ Tafaran'ny nivolagnin'i Jesôsy reo vaolagna reo, dia niboaka niaraka tamin-jareo mpianany Izy hoegny andaforô egny amin'ny laohasan-driakan'i kidrona zay nisy saha nidirany ndraiky reo mpianany. ² Aveo Jodasy, zay hamadiky Jesôsy, nahay toairagna koa, satria nandaiha mazagna tagny Jesôsy ndraiky reo mpianany. ³ Avakeo Jodasy, nitariky reo vôndrogno miaramila ndraiky reo mpiandry raharaha sasany avy amin'ny reo laohan'ny mpisôrogno ndraiky reo Fariseo, nandaiha tagny niaraka tamin'ny fanilo, fanala aveo fitaovam-piadiagna. ⁴ Aveo Jesôsy zay afa nahay raha jiaby hitranga Aminazy, nandaiha talaoha avakeo nagnontany zareo nagnanjao: "Zôvy no tadiavinareo?" ⁵ Namaly Azy zareo: "Jesôsy avy akagny Nazaraita." Ary hoizy Jesôsy tamin-jareo: "Zaho no Izy." Jodasy, zay namadiky Azy, nitsangagna niaraka tamin-jareo miaramila faogna koa. ⁶ Koafa nivaolagna tamin-jareo Izy hoe: "Zaho no Izy," dia nihemotro zareo kay lavo tamin'ny tany. ⁷ Avakeo indraiky nagnontany zareo Izy nagnanjao: "Zôvy zahavanareo?" Ary nivaolagna zare: "Jesôsy avy akagny Nazareta." ⁸ Jesôsy namaly nagnanjao: "Nivaolagna areo Zaho fao Zaho no Izy. Noho zany raha mitady Zaho areo, ambilao reto handaiha." ⁹ Zany mbô hahatantairaka vaolagna nikoragniny nagnanjao: "Amin-jareo zay namaizanao Zaho, tsy nasiako very na araiky aby." ¹⁰ Avakeo Simona Petera, zay nanagna meso, nagnaboaka zany aveo namely lehy mpanompony mpisoronabe kay nanapaka sôfiny ankahery. Ary Malko no agnaran'lehy mpanompo. ¹¹ Hoizy Jesôsy tamin'i Petera: "Ampodiano akao amin'ny tragnony ny mesonao. Tsy tôkony higiaka ny kapoaka zay namaizan'ny Iada Zaho moa Zaho?" ¹² Noho zany reo vôndrogno miaramila ndraiky Kapiteny, avakeo reo mpiambigny raharahan'ny reo Jiosy, nanambotro Jesôsy aveo nanady Azy. ¹³ Nindesin-jareo tagny amin'i Anasy Izy alaoha, satria izy rafaozan-dahin'i Kaiafa, zay mpisoronabe taminy tagno io. ¹⁴ Aveo Kaiafa nagnamia hevitry reo Jiosy fao tsara raha misy ôlogno araiky maty ho an'ny vahoaka. ¹⁵ Nagnaraka Jesôsy Simona Petera, aveo nagnano hotra zany faogna koa ny mpianatra araiky hafa. Ary hain'lehy mpisoronabe mpianatra zany, avakeo niditry niaraka tamin'i Jesôsy tao amin'ny Kianjany mpisoronabe izy; ¹⁶ fao Petera nitsangagna tambailan'ny tamiagna. Noho zany lehy mpianatra hafa, zay hainy ny mpisoronabe, niboaka kay nikoragna tamin'ny lehy mpanompo vavy zay mpiambigny tamiagna aveo ninday Petera niditry. ¹⁷ Avakeo lehy mpanompo vavy, mpiambigny tamiagna nivaolagna tamin'i Petera nagnanjao: "Anao koa moa tsy araiky amin'ny mpianatra lalahy io?" Hoizy izy: "Tsizy zaho." ¹⁸ Aveo nitsangagna teo reo mpanompo ndraiky reo mpiambigny raharaha, ary nandrehitry môtro zareo, satria nanintsy ny andro; kay nagnafana haignin-jareo. Petera koa niaraka tamin-jareo, nitsangagna teo aveo nagnafana ny haigniny. ¹⁹ Nagnontany Jesôsy mahakasiky reo mpianany ndraiky fampianarany ny mpisoronabe. ²⁰ Jesôsy namaly azy nagnanjao: "Nivaolagna ampahibemaso tamin'izao tontolo zao Zaho. Nampianatra lalandava tao amin'ny Synagoga ndraiky tao amin'ny Tempoly Zaho zay nifampitaonan'ny Jiosy jiaby. Tsisy nivolagniky tamin'ny takogno. ²¹ Nagnino anao no nagnontany Zaho? Agnintania reo zay nitandregny Zaho mahakasiky zay nikoragniky. Zahavo, reo ôlogno reo dia mahay zay nikoragniky." ²² Koafa avy nivaolagna zany Jesôsy dia nisy araiky tamin'ny reo mpiambigny raharaha nitsangagna teo nanifaka tehimaigny Jesôsy aveo nivaolagna nagnanjao: "Zany moa no fomba hamalianao ny mpisôrogno?" ²³ Jesôsy namaly azy: "Raha nivaolagna raha diso Zaho, mitsagnana antomoa amin'zany diso zany, fao raha marigny nagnino anao manaifaka Zaho?" ²⁴ Avakeo Anasy nadaifa Azy voatady nandaiha amin'i Kaiafa mpisôrogno. ²⁵ Ary nitsangagna Petera kay nagnafana haigniny. Avakeo hoizy reo ôlogno taminazy: "Anao koa moa tsy araiky amin'ireo mpagnazary?" Tsy nagneky zany izy avakeo nivaolagna nagnanjao: "Tsizy Zaho." ²⁶ Araiky tamin'ny reo mpanompon'ny mpisoragnabe, zay havan'ny lehy zay nalan'i Petera sôfigny, niavaolagna nagnanjao: "Tsy hitako niaraka taminazy tao amin'ny saha moa anao?" ²⁷ Avakeo Petera tsy nagneky indraiky, aveo samby teo nagneno akôho. ²⁸ Aveo nindesindreo avy to amin'i Kaifa hoagny agnaty rova Jesôsy. Mbôla taigna maraigny ny andro tamin'zany, aveo zareo tsy niditry tagnaty rova mbô tsy ho voaloto fao afa hihinagna Paska. ²⁹ Kay niboaka teo amin-jareo Pilato kay nivaolagna nagnanjao: "Ino ny fiampagnagna entinareo manohitry tô lalahy tô?" ³⁰ Namaly zareo aveo nivaolagna taminazy nagnanjao: "Raha tsy mpagnano ratsy lalahy io, tsy natôlotray anao." ³¹ Noho zany Pilato nivaolagna taminjareo nagnanjao: "Ndesinareo Izy, ary tsarao araka ny lalagnanareo. Hoizy reo Jiosy taminazy nagnanjao: "Tsy ara-dàlagna aminay ny manôlotro ôlogno hofoaty." ³² Nivaolagna zany zareo mbô hahatantairaka vaolagna Jesôsy zay nivolagniny hotra hivaolagna hoe karazagna fahafataisagna hotry ny ino no hahafataisany. ³³ Aveo niditry tagnaty rova ndraiky Pilato kay nagnantso Jesôsy avakeo nivaolagna: "Anao moa mpanjakan'ny Jiosy?" ³⁴ Jesôsy namaly: "Magnontany avy amin'ny haigninao moa anao, sa nisy hafa nivaolagna anao mahakasiky Zaho?" ³⁵ Pilato namaly: "Tsy jiosy zaho, sa tsy zany?" Ny vahoakanao ndraiky reo laohan'ny mpisôrogno no nanôlotro Anao taminaha. Ino moa natanao?'' ³⁶ Jesôsy namaly: "Ny fanjakako tsy avy aketo amin'izao tontolo zao. Fao raha mbô akao agnatin'izao tontolo zao ny fanjakako , dia hiady reo mpanompoko mbô tsy hanoloragna Zaho amin'ireo Jiosy. Fao zeo ny fanjakako tsy avy aketo." ³⁷ Avakeo Pilato nivaolagna nagnanjao: "Mpanjaka moa zany Anao?" Jesôsy namaly: "Voalazanao fao mpanjaka Zaho. Fao hoamin'ny zany tanjogno zany no nahatirahako, aveo hoamin'ny zany antony zany no niaviako aketo amin'ny zao tontlo zao, mbô hitsagnagna antomoa amin'ny fahamarignagna. Reo jiaby zay an'ny fahamarignagna dia mitandregny feonaha." ³⁸ Pilato nivaolagna taminazy nagnanjao: "Ino no atao hoe marigny?" Koafa avy nivaolagna zany izy, niboaka indraiky aveo nivaolagna tamin-jareo nagnanjao: "Tsy mahita heloko amin'tô lalahy tô zaho. ³⁹ Fao areo managna fomba zay hagnahafako ôlogno araiky ho aminareo amin'ny Paska. Noho zany tianareo moa ny hagnahafako aminareo ny mpanjakan'ny Jiosy?" ⁴⁰ Avakeo reo nangaingaiky mafy indraiky zareo aveo nivaolagna nagnanjao: "Tsy lalahy io, fao Barabasy." Ary Barabasy mpangalatra.