¹ Ary nisy lalahy araiky narary antsôvigny hoe: Lazarosy. Avy akao Betania izy, tanagnan'i Maria ndraiky Marta rahavaviny. ² Maria no nagnôsotro menaka mangitry Tompo ndraiky nagnadio ny tagnany tamin'ny volony, ary Lazarosy anadahiny narary. ³ Ary reo mpirahavavy nagniraka ôlogno hoagny amin'i Jesôsy, nivaolagna agnanjao: "Tompo, zahavo, fao marary lehy tianao." ⁴ Koafa regnin'i Jesôsy zany, dia nivaolagna Izy nagnanjao: "Tsy fahafataisagna no hiafaran'tô aretigny tô, fao ndraiky ho fanehoagna vogninahitry Zagnahary mbô hagnandratagna ny Zanaka Zagnahary amin'ny alalan'ny zany." ⁵ Ary Jesôsy tia i Marta ndraiky rahavaviny aveo Lazarosy. ⁶ Koafa naharegny Jesôsy fao marary Lazarosy, dia mbôla nijanogno aroa andro tao amin'ny toeragna nisy Azy Izy. ⁷ Ary tafaran'ny zany nivaolagna tamin'ny reo mpiaatra Izy nagnanjao: "Alôhy atsika hoagny Jodia ndraiky." ⁸ Hoizy reo mpianatra taminazy: "Raby, amin'ny zao mikasa hanopy vato Anao reo Jiosy, kay mbôla himpôdy agny ndraiky Anao?" ⁹ Ary namaly Jesôsy: "Tsy aroa ambin'ny fôlo ora moa ny fahazavagnan'ny andro? Raha misy ôlogno mandaiha amin'ny andro mazava, tsy ho tafintohigny izy, satria mahita fahazavagnan'izao tontolo zao. ¹⁰ Naifa, raha mandaiha amin'ny aligny izy, dia ho tafintohigny satria tsy aminazy ny fahazavagna." ¹¹ Nivaolagna reo raha reo Izy, ary tafaran'ny reo raha reo, hoizy tamin-jareo: "Resin-tory Lazarosy namantsika, fao handaiha Zao mbô hafahako hagnonjogno azy amin'ny tôromaso." ¹² Kay hoizy reo mpianatra taminazy: "Tompo, raha resin-tory izy, ho tsara." ¹³ Naifa Jesôsy nivaolagna fahafataisagna, naifa niheverin-jareo fao fialantsasatra amin'ny tôromaso no nivolagniny. ¹⁴ Aveo Jesôsy nivaolagna tsotra tamin-jareo nagnanjao: "Maty Lazarosy. ¹⁵ Ravo zaho, nohon'ny aminareo, fao tsy tagny Zaho mbô hahatonga areo hino. Andaiha atsika hoagny aminazy." ¹⁶ Tomasy, zay antsôvigny Didymo, dia nivaolagna tamin'ny reo mpianatra nagnanjao: "Andaiha koa atsika mbô hiaraka maty amin'i Jesôsy." ¹⁷ Koafa havy Jesôsy, hitany fao afa nalevigny aifatra andro tampasagna Lazarosy. ¹⁸ Aveo Betania afa marikitry Jerosalema, eo amin'ny dimy ambin'ny fôlo stadio eo no ailagnailagna. ¹⁹ Maro reo Jiosy havy tao amin'i Marta ndraiky Maria, mbô hampahery zareo nohon'ny fahafataisan'ny anadahin-jareo. ²⁰ Aveo, Marta, koafa naharegny fao tonga Jesôsy, nandaiha nitsaina Azy, fao Maria ndraiky nidôko tan-tragno ²¹ Dia nivaolagna tamin'i Jesôsy Marta: "Tompo, raha teo Anao, tsy maty ny anadahiko. ²² Naifa na dia zeo aby, haiky fao na ino na ino angatahinao amin-Jagnahary, hamaizany Anao zany." ²³ Hoizy Jesôsy taminazy: "Ny anadahinao hitsangan-ko velogno indraiky." ²⁴ Marta nivaolagna taminazy nagnanjao: "Haiky fao hitsangagna indraiky izy amin'ny fitsanganan'ny maty amin'ny andro farany." ²⁵ Nivaolagna Jesôsy taminazy: "Zaho no fananganagna ny maty ndraiky fiainagna; zay mino Zaho, na dia maty aby izy, ho velogno; ²⁶ aveo na zôvy na zôvy velogno kay mino Zaho tsy ho foaty bariky dintany. Mino zany moa anao?" ²⁷ Hoizy taminazy: "Ia, Tompo, mino zaho fao Anao no Kristy, Zanaka Zagnahary, lehy ho tonga eto amin'ny zao tontolo zao." ²⁸ Koafa voavaolagna zany, lôsogno izy nagnantso mangingigny Maria rahavaviny. Hoizy nagnanjao: "Tonga ny Mpagnanatra aveo magnantso anao Izy." ²⁹ Koafa regnin'i Maria zany, nitsangagna nalaky izy nandaiha aminazy. ³⁰ Ary Jesôsy tsy mbôl tonga tan-tanagna fao mbôla teo amin'lehy toairagna nitrahaofan'i Marta taminazy faogna. ³¹ Noho zany reo Jiosy, zay niaraka taminazy tantragno ndraiky nampahery azy, koafa nahita Maria nitsangagna nalaky kay lôsogno niboaka, nagnaraka azy, nihevitry fao handaiha hitomoagny akagny amin'ny fasagna izy. ³² Koafa tonga teo amin'ny toairagna nisy Jesôsy Maria kay nahita Azy, niondriky izy aveo nivaolagna taminazy: "Tompo, raha teto Anao, tsy maty ny anadahiko." ³³ Koafa nahita azy nitomoagny Jesôsy, aveo reo Jiosy niaraka taminazy koa nitomoagny, vônto fagnahinazy ary nihôron-kôditry Izy; ³⁴ dia nivaolagna Izy nagnanjao: "Taiza nandivaignanareo azy?" Hoizy reo taminazy: "Tompo, malaky aveo zahavo." ³⁵ Nitomoagny Jesôsy. ³⁶ Aveo hoizy reo Jiosy: "Zahavo ny hagidasan'ny fitiavany i Lazarosy!" ³⁷ Fao ny sanany tamin-jareo nivaolagna: "Moa tsy hain'ny tô lalahy tô, zay nampahita ny mason'ny lehy gila, ny magnano zay tsy nahafaty tô lalahy tô koa?" ³⁸ Aveo ndraiky Jesôsy, raha mbôla vônto fagnahinazy, nandaiha amin'ny fasagna. Ary zohy zany, aveo misy vato mamôgno azy. ³⁹ Nivaolagna Jesôsy: "Alao hiala ny vato." Marta, anabavan'i Lazarosy, lehy maty, nivaolagna tamin'i Jesôsy: "Tompo, afa mahimbo ny vatagna nazy raha amizao fotoagna zao, satria aifatr'andro zao no nahafataisany." ⁴⁰ Ary Jesôsy nivaolagna taminazy nagnanjao: "Tsy afa nambarako anao moa fao, raha hino anao, dia ho hitanao ny vogninahitry Zagnahary?" ⁴¹ Dia nalan-jareo ny vato. Jesôsy nanandratra masony kay nivaolagna nagnanjao: "Iada a, misaotra Anao Zaho satria nitandregny Zaho Anao. ⁴² Haiky fao mitandregny Zaho lalandava Anao, fao nohony vahoaka mitsangagna magnôlotro Zaho no nivalagnako zany, mbô hahafahan-jareo mino fao Anao nagniraka Zaho." ⁴³ Koafa avy nivaolagna zany Izy, nagnantso tamin'ny feo mafy nagnanjao: "Lazarosy, miboaha!" ⁴⁴ Niboaka lehy lalahy maty; nisy fehim-paty ny hongony ndraiky tagnany, aveo voafehy lamba koa ny haigniny. Hoizy Jesôsy tamin-jareo: "Vahao izy aveo ambilao handaiha." ⁴⁵ Aveo maro tamin-jareo Jiosy tonga tao amin'i Maria ndraiky nahita ny natan'i Jesôsy, no nino Azy; ⁴⁶ Fao ny sanany tamin-jareo ndraiky lôsogno nandaiha amin'ny Fariseo ary nivaolagna tamin-jareo ny raha nitsabon'i Jesôsy. ⁴⁷ Aveo ny laohan'ny mpisôrogno ndraiky reo Fariseo namôry ny Synedriona niaraka aveo nagnanjao: "Ino no tsabontsika? Tô lalahy tô magnano famantaragna maro. ⁴⁸ Raha ambailantsika amizao Izy, hino Azy jiaby; ary hoa avy ny Romana halaka tanagnantsika ndraiky firenenantsika." ⁴⁹ Naifa, nisy lalahy araiky tamin-jareo, Kaiafa, zay mpisoronabe tamin'ny zany tagno zany, nagnanjao taminjareo: "Areo tsy mahay na ino na ino. ⁵⁰ Tsy mieritreritry aby areo fao tsara hoanareo raha lalahy araiky no maty hoan'ny ôlogno toy zay ny firenena jiaby no ringagna." ⁵¹ Ary zay nivolagniny tsy natany nihinazy faogna. Fao ndraiky, noho izy mpisorognobe tamin'io tagno io, dia naminagny fao tôkony hofoaty hoan'ny firenena Jesôsy; ⁵² avakeo tsy hoan'ny firenena faogna, fao mbô hampikambagna ny zanaka Zagnahary zay niparitaka koa. ⁵³ Kay nanomboko tamin'io andro io nagnano tetiky ny mahakasiky hamonoagna Jesôsy zareo. ⁵⁴ Ary Jesôsy tsy nandaiha nibaribary tegny amin'ny reo Jiosy eky, fao niala teo Izy nandaiha amin'ny tany narikitry hefitry hoagny an-tanagna atao hoe Efraima. Ary nibidôko tao Izy ndraiky reo mpianatra. ⁵⁵ Ary afa narikitry ny Paska ny jiosy, ary maro tamin'ny reo tany ambailan'ny tanagna no nakatra tao Jerosalema alaohan'ny Paska mbô hagnadio ny haigninjareo. ⁵⁶ Nitady Jesôsy zareo, ary nitsangagna teo amin'ny Tempoly nifampiraisaka nagnanjao: "Ino no eritreretinareo? Hoe tsy ho tonga amin'ny andro firavoravoagna moa Izy?" ⁵⁷ Aveo afa nagnamia beko ny laohan'ny mpisorogno ndraiky Fariseo fao raha misy mahay ny misy Jesôsy, tôkony mivaolagna izy mbô hanambaoran-jareo Azy.