¹ "Ambarako aminareo, marigny, taigna marigny, fao zay tsy miditry amin'ny tamiagna ho amin'ny valan'ondry, fao magnaniky lalagna hafa, dia mpangalatra ndraiky mpandroba izy. ² Fao zay miditry amin'ny tamiagna ndraiky no mpiambigny ondry tsara. ³ Izy no sokoafin'ny mpiambigny tamiagna. Maharegny feonazy ny ondry, avakeo izy magnantso ondrianazy manaokagna amin'ny agnarany kay minday azy miboaka. ⁴ Koafa nagnaboaka azy jiaby izy, nialaoha lalagna zareo, aveo magnaraka azy ny ondrianazy, satria mahay feonazy. ⁵ Ary tsy hagnaraka vahiny reo fao hilaifa azy ndraiky, satria tsy hainy ny feony vahiy." ⁶ Jesôsy nivaolagna zany aohatra zany tamin-jareo, naifa tsy azonjareo aby reo raha nivolagniny taminjareo. ⁷ Dia hoizy ndraiky Jesôsy tamin-jare: "Volagniky aminareo, marigny, marigny tatô be, fao Zaho no tamiagnan'ondry. ⁸ Zay jiaby tonga talaohakanaha mpangalatra ndraiky mpandroba, satria tsy nitandregny zareo ondry. ⁹ Zaho no tamiagna. Raha misy miditry ao amin'ny alalako, ho voavonjy izy; hiditry ndraiky hiboaka izy aveo hahita fihinanagna. ¹⁰ Fao ny mpangalatra tsy avy raha tsy hangalatra ndraiky hamono aveo handrava. Fao Zaho ndraiky avy mbô hanagnanjareo fiainagna aveo hanagna zany fôtry tatôbe. ¹¹ Zaho no mpiambigny ondry tsara. Ny miambigny tsara manôlotro ny haigninazy hamonjy ondrinazy. ¹² Ny mpikarama tsy miambigny avakeo tsy tômpony ondry. Raha nahita amboadia magnatogno izy hilaifa ny ondry kay hipariaka, aveo ny amboadia manambotro ndraiky mampipariaka zareo. ¹³ Milaifa izy satria mpikarama kay tsy miraharaha ny ondry. ¹⁴ Zaho no mpiambigny ondry tsara, ary haiko ny ninaha, ary hainy Zaho. ¹⁵ Ny Iada mahay Zaho, avakeo Zaho mahay Iada, ary Zaho manôlotro ny aigninaha hoan'ny ondry. ¹⁶ Managna ondry hafa zay tsy amin'ny tô vala tô Zaho. Tsy maintsy ho ndesiky faogna koa regny, aveo zareo haharegny feonaha mbô ho tonga andiany araiky faogna ndraiky mpiambigny araiky. ¹⁷ Zao no antony hitiavan'ny Iada Zaho: mahafoy manôlotro ny aigninaha Zaho mbô handraisako zany indraiky. ¹⁸ Tsisy malaka zany aminaha, fao haigninaha faogna manôlotro zany. Managna fahefagna hanôlotro zany Zaho, aveo managna fahefagna halaka zany indraiky. Zany didy zany azoko avy tamin'ny Iadako." ¹⁹ Nisy fizarazaragna indraiky teo amin'ny reo Jiosy noho reo vaolagna reo. ²⁰ Maro tamin-jare no nivaolagna nagnanjao: "Managna masantôko Izy aveo very saigny. Nagnino areo mitandregny Azy?" ²¹ Ny sanany nivaolagna: "Tsy fivolagnan'ny ôlogno misy masantôko zany. Moa ny Masantôko afaka mampahita mason'ny gila?" ²² Aveo tonga ny fetin'ny fanokanagna tao Jerosalema. ²³ Rirignigny tamin'ny zany, aveo Jesôsy nitsangagna teo agnatin'ny tempoly teo amin'ny fialofan'i Solomona. ²⁴ Aveo nitangoraonan'reo Jiosy Izy avakeo nivaolagna taminazy nagnanjao: "Zisiky aiza no hampisalasalanao zahay? Raha Anao Kristy, dia volagno aminay mibaribary aminay." ²⁵ Ary Jesôsy namaly zareo nagnanjao: "Afa nagnambara areo Zaho, fao tsy minao areo. Reo asa zay nitsaboky amin'ny agnaran'ny Iadako, reo no magnambara Zaho. ²⁶ Kanaifa areo tsy mino satria tsy mbô ondrinaha. ²⁷ Mitandregny feonaha ny ondrinaha; haiko zareo, avakeo magnaraka Zaho. ²⁸ Amaizako zare ny fiainagna bariky dintany; kay tsy hofoaty bariky dintany zareo, ary tsy hisy handrobaka azy am-pailatagnako. ²⁹ Ny Iadako, zay nagnamia reo Zaho, dia gaida noho ny hafa jiaby, aveo tsisy mahavita mandrobaka zareo ampailatagnan'ny Iada. ³⁰ Zaho ndraiky iada araiky faogna." ³¹ Avakeo nalaka vato reo Jiosy mbô hanopy vato Azy. ³² Avakeo Jesôsy namaly zareo: "Maro ny asa tsara namboakako areo avy tamin'ny Iada. Kay ino tamin'ny regny asa regny hanopianareo vato Zaho? ³³ Namaly Azy reo Jiosy nagnanjao: "Tsy ny asa tsara no hanopianay vato anao, fao ny fivolagnandratsy, satria Anao, ôlombelogno, dia magnano ny haigninao ho Zagnahary." ³⁴ Namaly zareo Jesôsy nagnanjao: "Tsy afa voasaoratra ao amin'ny lalagnanareo moa hoe: "Hoizy Zaho magnanjao: "zagnahary areo?" ³⁵ Raha nagnantso regny ho zagnahary izy, dia hoan-jôvy zany no navian'ny vaolagna Zagnahary (Ary ny Saoratra Masigny tsy azo foagnagna), ³⁶ Moa lehy nihamasignin'ny Iada ndraiky nirahigny ho amin'ny zao tontolo zao no atanareo hoe: 'Mivaolagna ratsy Anao,' noho Zaho nivaolagna: 'Zaho Zanaka Zagnahary'? ³⁷ Koafa tsy magnano reo asan'ny Iadako Zaho, dia aza mino Zaho. ³⁸ Fao raha magnano regny Zaho, na dia tsy mino Zaho aby areo, dia minoa reo asa mbô hahaizanareo ndraiky hazahoanare fao ny Iada dia akato Aminaha ary Zaho amin'ny Iada." ³⁹ Mbôla nikasa ny hanambotro Azy indraiky zareo, fao nilaifa Izy. ⁴⁰ Dia nandaiha andaforôn'i Jordana indraiky Izy hoagny amin'ny lehy toairagna zay nagnanaovan'i Jaona batisa voalaohany, aveo nidôko teo. ⁴¹ Maro ny ôlogno nagnatogno Azy avakeo hoizy zareo: "Jaona tsy mbô nitsabo famantaragna, fao raha jiaby nivolagnin'i Jaona mahakasiky io lalahy io marigny." ⁴² Maro ny ôlogo nino Azy teo.