¹ Dra hoeza koa Jesosy tamin'ereo mpianany ho: ''Nisy lelahy mpanan-karena ereo nana mpitata, dra nitoniny tagny amigny fa io mpitata io gny nandany gny fanagnany aby. ² Dra notoka anazy gny lelehy mpana-karena dra nizaka taminazy ho: 'Ino izaho reko momba anaoizaho? Mgnomeza tatisy momban'ny asa fitatanany, fa hanao sy ho afaky gny ho mpitadri-panagna avo,' ³ Dra gny mpitadrim-panagna nizaka tagny asainy ho: ''Ino moa gny tokony ataoko, fa magalaky amigny asa andesiko gny tompoko? Sy mana-kery hiasa tany zaho, dra megnasy gny ba hangataky zaho. ⁴ Fatako gny ho ataoko, ba iziaby anga amigny asa fitatagnako zaho, dra hampandroso anahy ao an-tragnon'izy ereo gny olo.' ⁵ Avy eo gny pita-draharaha nitoka gny kiraikiraiky tamin'ireo pitrosan'ny tompony, dra nagnotany gny volohany izy ho: 'Hotrino gny anany tompoko agny aminao?' ⁶ Nizaka izy ho:' Menaky oliva zasto litatra.' Nizaka tamy nazy ho: ' Takaro gny taratasinao, mipetraha malaky, dra dimapolo soratany.' Dra avy eo gny mpitatana gny zakany tamy gniraiky ho:' Hotrino gny trosanao?' Nizaka ho: 'vary zato famarana.' Nizaka taminazy ho:' Raiso gny taratasinao, dra sorato ho valopolo.' ⁸ Bak'eo gny topo dra nidera gny mpitata sy mary satria niasa tamin-kafesena izy. Fa fetsy Koa gny zanak'izao totolo zao gny amin'gny fifagnaraha amin'izy samy olo noho gny zanaky gny fahazava. ⁹ Mizaka amindrareo Zaho,mitaliava nama amin'gny alalan'gny vola sy mary,amin'zay gny fa lany zay,dra mety ho rambesin'ereo ao amy fonena mandrakizay andrareo. ¹⁰ Ze mahatoky amin'gny kely indrindra dra mahatoky amin'gny be koa,vo ze sy mary amin'gny masaiky indrindra dra sy mary amin'gny be koa. ¹¹ Raha sy mahatoky amy fampiasa vola sy mary andrareo,iza gny hatoky andrareo amin'gny harena mary? ¹² Raha sy mahatoky amy fampiasa gny volan'olo hafa andrareo, iza gny hagnome vola ho andrareo manoka? ¹³ Sy misy panopo afaky manopo topo ro,fa dre izy halaiky gny raiky dra ho tia gny raiky,dre koa izy hanolo-tegna ho an'gny raiky dra hanao sinosino gny hafa. Sy afaky manopo an'Agnahary vo gny hanagna andrareo.''' ¹⁴ Dra gny Fariseo,ze tia vola, gny fa nahare zay raha aby zay,dra nagnamavo Anazy ereo. ¹⁵ Nizaka tamin'ereo Izy ho:''Andrareo dra magnamary gny vatandrareo eo amason'olo,fa Zagnahary mahay gny fondrareo. Fa ze hasandrasy eo amin'gny olo dra hakany eo amason'Agnahary. ¹⁶ Gny lalana vo reo paminany dra nisy mandra-piavian'i Jaona. Fa hatramin'izay fotoa zay, gny fa nitoria gny filazasaran'gny fazakan'Agnahary,dra gny kirairaiky dra niezaky nagnisy gny lalany ho amin'izay. ¹⁷ Fa moramora koa gny haharava gny lagnisy vo gny tany noho gny sorosy kely indrindra ao amin'gny lalana ho avy sy mana-kery. ¹⁸ Ze misaraky amin'gny valiny dra mapakasy apela hafa dra mizangazanga,vo ze fa nisara-baly dra mizangazanga. ¹⁹ Dra nisy pagnarivo raiky ze niakazo voloparasy rongony manify dra nagnamamy isan'andro gny harem-beny. ²⁰ Nisy pangalasy raiky tokavy ho Lazarosy nipetraky teo amy vatrangarany, rakoky fery, ²¹ dra nagniry ba hiteno ze lasaky bak'eo agn'abo latabasin'gny lelahy pagnarivo. Fa dre gny aboa avo avy vo nilelasy gny feriny. ²² Dra indro maty gny pangataky dra nandesin'ireo Azely ho eo agnilan'i Abrahama. Maty avo koa gny pagnarivo dra nalevy, ²³ dra tao amin'gny fahavereza, raha napizaly,dra nanandrasy gny masony izy dra nahita an'i Abrahama tegny alavisy vo Lazarosy teo agnilany. ²⁴ Koa nihiakiaky fatrasy izy vo nizaka ho:'Abrahama Ray, mamindra fo aminahy dra alefaso Lazarosy, ba handroboahany gny tendron'gny rasan-tagnany ao agnaty rano vo hapangasiasiaky gny lelako,fa ato agnatin'gny fangirifiria fatrasy agnatin'itiho afo itiho zaho.' ²⁵ Fa Abrahama nizaka ho:'Anaky, sarovy fa tamin'gny androm-piaignanao dra nahazo raha soa anao,vo gny an'i Lazarosy koa araha rasy. Fa amizao izy atiho dra voatambitamby, dra anao ao amin'gny fangirifiria. ²⁶ Akoasy zay aby zay,dra nisy hasa lahibe napetraky , ba sy ho afaky hiapita ze te-hisaky laha tegny magnrgny amindrareo,vo sy misy afaky hisaky laha tegny hagnetiho aminay.' ²⁷ Gny lelahy pagnarivo nizaka ho:'Miangavy anao Zaho,ry Abrahama Ray,ba hagnirahanao anazy ho agny an-tragnon-drako ²⁸ fa mana rahalahy dimy zaho ba afahany mapitandry anazy reo, nohon'gny tahosy gny hahavian'ereo atiho amin'itiho toeran'gny fizalia itiho avo koa.'' ²⁹ Fa Abrahama nizaka ho:'Mana an'i Mosesy vo gny paminany ereo;ao ereo hiteno anazy reo.' ³⁰ Dra namaly gny lelahy pagna-rivo ho:'Aha,ry Abrahama Ray,fa raha misy laha tamin'gny maty magnagny amin'ereo,dra hibebaky ereo.' ³¹ Fa Abrahama koa nizaka taminazyho:'Raha sy miteno an'i Mosesy vo reo paminany ereo,dra sy ho resy lahasy mihisy dre misy olo misanga amin'gny maty aza.''