¹ Jesosy nizaka tamin'ereo pianany ho:''Azo atoky fa hisy raha afaky hanosiky asika hanota, fa loza ho an'gny olo ze hiavin'izay! ² Soa ho anazy koa raha asia vato be eo amin'gny vozony dra atoraky an-dranomasy , manahaky ze hahatafitihy gny raiky amin'ereo madiniky reo. ³ Mitandrema andrareo. Raha manota gny rahalahindrareo, zakao fatrasy izy,dra raha mibebaky izy, mamela anazy. ⁴ Raha manota aminao impito ao agnatin'gny andro raiky izy,dra impito mihery aminao izy, mizaka ho:''Mibebaky zaho,'dra sy maisy mamela anazy anao!'' ⁵ Reo apostoly tamin'gny Topo ho:''Ampitomboy gny finoanay.'' ⁶ Gny Topo nizaka ho:''Raha mana finoa ohasin'gny voasinapy andrareo,dra afaky mizaka amin'io voroihazo io ho:'Miongota, vo magniria agny an-dranomasy,'dra hagneky andrareo izy. ⁷ Fa iza amindrareo, gny mana panopo miasa tagny dre miamby agn'ondry,dra hizaka aminazy gny fa avy laha tagny an-tanimboly izy ho:''Avia malaky dra mipetraha ba hihina'? ⁸ Fa sy hizaka se izy ho:'Hikarakaranao raha hohaniko zaho,dra asio fehitroky magnodidy gny akazonao dra manopoa anahy mandrapahalanin'gny haniko vo fisotroako. Dra bak'eo anao mihina vo mino'? ⁹ Sy misaotra gny panopo izy satria nanao gny ze nibaikoa anazy izy, sa misaotra se izy? ¹⁰ Dre dra andrareo koa aza, gny fa nahavita gny raha aby ze nandidia andrareo andrareo,dra tokony hizaka ho:''Zahay dra panopo sy mendriky . Ze tokony nataonay avo gny nataonay.'' ¹¹ Dra raha nandeha ho agny Jerosalema Izy,dra nandeha teo amin'gny sisi-tany teo agnelagnelan'i Samaria vo Galilia. ¹² Gny fa nilisy tao amin'gny tana raiky izy,dra nisy boka folo lahy nifakatozy taminazy tao. Nisanga lavisy Anazy ereo ¹³ dra nanandrasy abo gny feon'ereo, nizaka ho:''Jesosy, Topo o, mamindra fo aminay.'' ¹⁴ Gny fa nahita anazy reo Izy,dra nizaka tamin'ereo ho:''Mandehana dra ampisehoy amin'ireo pisoro gny vatandrareo.''Raha igny lasa igny izy reo dra nalio. ¹⁵ Gny fa nahita gny raiky tamin'ereo fa sitrana izy,dra nihery, niaraky tamin'gny feo abo nakalaza an'gnahary. ¹⁶ Nandohaliky teo atombon'i Jesosy izy, nanolosy fisaora ho Anazy. Izy dra Samaritana. ¹⁷ Dra Jesosy nizaka ho:''Sy fa voalio se izy folo? Fa eza gny sivy? ¹⁸ Sy nisy hafa nihery hagnome voninahisy an'Agnahary se,afa-sy itiho vahiny itiho?'' ¹⁹ Dra ho Izy taminazy:''Misangana,dra mandehana. Gny finoanao gny mahasitra anao.'' ²⁰ Raha nagnontanin'ereo Fariseo ho ombia gny fazakan'Agnahary gny ho avy,dra namaly anazy reo Jesosy dra nizaka ho:''Sy hita-maso gny fiavian'gny fazakan'Agnahary. ²¹ Sy hizaka koa izy reo ho:'Hatio, itiho gny izy!'na ho:'Iriho gny izy!'Fa indro,gny fazakan'Agnahary dra ao agnatindrareo.'' ²² Ho Izy tamin'ereo pianasy :''Avy gny andro hagniriandrareo gny hahita gny raiky amin'gny andron'gny Zanak'olo,fa sy hahita anizay andrareo. ²³ Dra ereo dra hizaka amindrareo ho:'Hatia, eryho! Hatio, etiho!'Fa ka miboaky dre magneziky anazy reo, ²⁴ fa tahaky gny selasy mamirasy mazava gny fa mitarasy laha tagny amin'gny gny raiky,dra manahaky anizay gny Zanak'olo amin'gny androny. ²⁵ Fa volohany dra sy maisy hizaly amin'gny raha maro Izy vo ho lavin'itiho taranaky itiho. ²⁶ Tahaky ze nisanga tamin'gny andron'i Noa,gny hiboaany koa amy andron'gny Zanak'olo.. ²⁷ Nihina ereo,nino,nanambaly, natolosy ho ampakary, mandrapihavin'gny andro ze niliran'i Noa tao amin'gny sambofiara vo avy gny Safo-drano dra nandringa anazy aby. ²⁸ Tahaky ze nisy tamin'gny andron'i Lota nihina sady nino ereo, nivily vo nivarosy, namboly vo nanao tragno. ²⁹ Fa tamin'gny andro ze niboahan'i Loza laha tao Sodoma,dra afo vo solifara gny nilasaky laha tagny an-dagnisy dra nandringa anazy aby. ³⁰ Dra ohasin'izay koa gny amin'gny andro hiboaany gny Zanak'olo. ³¹ Amin'izay andro zay, ka anga hiboaky hangalaky gny etany ho egny ambaliky gny tragno ze egny amin'gny tapo-tragno;dra la anga hihery ze agny an-tanimboly. ³² Tadidio gny valin'i Lota. ³³ Dre iza dre iza mitalia hamozy gny ainy dra hahavery anazy, fa dre iza dre iza gny ainy dra hamozy anazy. ³⁴ Mizaka amindrareo Zaho,fa amin'izay hariva zay dra hisy olo ro eo agn'abony fandria raiky. Gny raiky dra horambesiny, dra gny raiky ho angao. ³⁵ Dra hisy to vavy miara-mandisa vary. Gny raiky ho rambesy,vo gny raiky ho anga.'' ³⁶ [ Fagnamariha:reo fandika taloha soa indrindra dra manala gny andininy faha 36 ho:''Hisy ro lahy agny an-tanimboly; gny raiky ho rambesy,dra gny raiky ho anga.''] ³⁷ Nagnontany Anazy ereo ho:''Eza, Topo?''dra Izy nizaka tamin'ereo ho:''Ze hitoeran'gny maty,dra agny koa gny hisy votoro hiara-miango.''