¹ Telo andro taty afara, dra nisy fangala valy tao Kana ao Galilia, dra teo gny renin'i Jesosy. ² Jesosy vo reo pianany dra nasa tamigny fangala valy. ³ Gny fa lany gny divay, dra nizaka taminazy gny renin'i Jesosy ho: "Sy mana divay ereo." ⁴ Dra hoy Jesosy taminazy ho: "Rapela, nagnino hanao magnaminahy atiky io? Bo sy avy gny fotoako." ⁵ Dra hoy gny reniny tamireo panopo ho: "Na ino na ino zakany amindrareo, dra atovy zay." ⁶ Dra nisy siny vato andesy teo ze piasa amigny andro fisasanigny Jiosy, mahazaka ro hatramigny telo metasy aby. ⁷ Hoy Jesosy tamin'ereo ho: "Fenoy rano gny siny." Dra nifenon'ereo hatramigny sognony zay. ⁸ Nony boak'eo hoy Izy tamireo panopo ho: "Manovoza amizay dra andeso agny amigny topon'andrekisy gny fikaraka." Dra nitaterahin'ereo zay. ⁹ Zinakanigny Topon'andrekisigny fikarakara gny rano lasa divay, kanefa sy nahay ze niavian'izay izy (reo panopo ze nanovo gny rano koa nahafatasy). Boak'eo dra nitoka gny pazaka Izy ¹⁰ dra nizaka taminazy ho: "Gny olon'aby dra mandroso gny divay soa aloha ze vo gny divay moramora gny fa mamo ereo. Fa Handrareo koa nitahiny gny divay soa mandrak'Androany." ¹¹ Izay gny famatara volohany nataon'i Jesosy tao Kana agny Galilia, dra naneho gny voninahiny Izy, dra nino anazy reo pianany. ¹² Tafaranizay dra nizoso ho a Kapernaony agny Jesosy, gny reniny, reo rahalahiny vo reo pianany dra nizano tao andro visivisy ereo. ¹³ Dra fa mariny gny Paska gny Jiosy, dra niakasy ta Jerosalema agny Jesosy. ¹⁴ Nahita pivarosy agnomby, agnondry vo voromailala tao atepoly izy, nisy panakalo vola koa. ¹⁵ Noho izay dra namboasy karavasy izy dra nandroaky anazy aby hiboaky gny tepoly, na gny agnondry na gny agnomby. Nandraraky gny volan'ireo panakalo vola izy dra nandrobaky gny latabas'ereo. ¹⁶ Dra hoy izy tamireo pivarosy voromailala ho: "Andeso miboaky lavisy ty toera tihoky reo raha reo. Aoky zay gny fanova gny tragnon-dRako ho tragno fama rota." ¹⁷ Dra saroan'ireo pianany fa voasorasy ho: "Gny firehetako gny amigny tragnonao gny handevo anahy." ¹⁸ Boak'eo namaly reo lohandohanigny pisoro Jiosy dra nanao taminazy ho: "Ino gny famatara hasehonao anay, mahavy anao manao anireo raha reo?" ¹⁹ Jesosy namaly ho: "ravao ty tepoly tihoky, fa hasangako agnatinigny telo andro moza zay." ²⁰ Dra hoy reo panapaky Jiosy ho: "Enina amby efapolo tao gny nagnoregna ty tepoly tihoky, dra hanao ra hahasanga anazy ao agnatinigny telo andro?" ²¹ Kanefa, mombanigny tepolinigny vatany gny nizakany. ²² Tafaranigny nisanganany tamigny maty, dra saroan'ireo pianany fa nizaka anizay izy, dra nino gny Sorasy Masy vo ze zaka nizakan'i Jesosy zay ereo. ²³ Dra gny fa ta Jerosalema ao Izy tamigny andro firavoravoanigny Paska, dra maro gny nino gny agnarany gny fa nahita reo famatara ze nataony. ²⁴ Fa Jesosy koa sy natoky anereo noho Izy nahafatasy soa anazy aby, ²⁵ aokory sy nitalia na iza na iza hitalily aminazy gny mombanigny olo Izy, noho izy nahafatasy gny ao agnatinigny olo.