¹ Dra nisy Fariseo raiky atao i Nikodemosy, pitariky Jiosy. ² Nagnato an'i Jesosy tamigny andro hariva io lelahy io dra nizaka taminazy ho: "Raby , fatasay fa papianasy avy amin'Agnahary hanao, akory sy misy mahavita reo famatara ataonao raha sy miaraky aminazy Zagnahary." ³ Dra namaly anazy Jesosy nanao anizahoky ho: "Zakako amindrareo marina fa raha sy ateraky ndraiky gny olo, dra sy hahita gny fazakan'Agnahary izy." ⁴ Nikodemosy nizaka taminazy ho: "Amigny fomba ino gny hahatateraky gny olo raiky raha fa atisy izy? Sy afaky hilisy fagnindrony ao atrondreniny izy dra hateraky, sa afaky?" ⁵ Namaly Jesosy ho: "Zakako aminao mary, fa raha sy nateraky tamigny rano vo gny fagnahy gny zanak'olo, dra sy afaky hilisy ao amigny fazakan'Agnahary izy. ⁶ Izay ateraky gny nofo dra nofo, dra ze ateraky gny Fagnahy dra fagnahy. ⁷ Ka gaga amize nizakako hanao ho: 'Sy maisy hateraky ndraiky handrareo.' ⁸ Gny rivosy na eza na eza iriny; renao gny feony, fa sy fatasao ze niaviany na ze andehanany. Manahaky anizay avokoa ze ateraky gny Fagnahy." ⁹ Namaly Nikodemosy dra nizaka taminazy ho: "Ino gny fomba hahataterahan'izay raha zay?" ¹⁰ Jesosy namaly dra nizaka taminazy ho: "Papianasy an'Israely ra hanao dra bo sy azonao avo zay raha zay? ¹¹ Zakako aminao, mary fa ze fatasay gny zakanay, dra zahay mitalily gny momba ze hitanay. Kanefa bo sy magneky gny fagnambaranay handrareo. ¹² raha nitalily tamindrareo gny raha tety atany zaho nefa sy tenoandrareo, amigny fomba ino gny hinoandrareo anahy raha hitatara amindrareo gny raha misy agny andagnisy agny zaho? ¹³ Sy nisy niakasy agny andagnisy afa-sy gny nizoso boak'agny avo, dra gny zanak'olo zay. ¹⁴ Dra manahaky gny nanadratan'i Mosesy gny bibilava tagny agnefisy, gny sy maisy hanandrata gny zanak'olo, ¹⁵ ba hana fiegna mandrakizay ze mino anazy aby. ¹⁶ Fa tena tian'Agnahary izao totolo izao, dra nameny gny zanany lahy toka, ba sy ho levo ze olo mino anazy fa hana fiegna mandrakizay. ¹⁷ Fa Zagnahary sy nagniraky gny zanadahiny ho amizao totolo izao ba hasiaky anizao totolo izao, fa ba hamezy anizao totolo izao amigny alalany. ¹⁸ Izay mino anazy dra sy hohelohy, fa ze sy mino koa dra fa voaheloky sahady akory sy nino gny agnaranigny zanadahiny tokan'Agnahary. ¹⁹ Izao gny atonigny fisara: Avy teto amizao totolo izao gny fahazava, nefa dra naleonigny olombelo gny mazava akory rasy reo asa nataony. ²⁰ Fa ze manao rasy aby dra malaiky gny mazava dra sy magnato anizay ba sy ho hita miharihary reo asany. ²¹ Kanefa manao gny mary dra magnato gny mazana ba ho hita soa reo asany dra natao arakan'Agnahary." ²² Tafaranizay dra nandeha tagny Jodia Jesosy vo reo gny pianany tamin'ereo fotoa visy tao niaraky tamin'ereo izy dra nanao batisa. ²³ Dra Jaona koa nanao batisa ta Ainona agny agnilan'i Saleima akory maro gny rano tagny. Nagnato anazy gny vahoaky dra natao Batisa, ²⁴ fa sy bo nalefa agny atragno mezy Jaona. ²⁵ Boak'eo nisy fifandira tamigny ilany amireo pianas'i Jaona vo gny Jiosy raiky mombanigny andro fisasa. ²⁶ Nagnato an'i Jaona ereo dra nizaka taminazy ho: "Raby, gny raiky niaraky taminao ta apitanigny reniranon'i Joridana agny, ze zinakanao, ingo manao batisa izy, dra magnatogna anazy avokoa izy aby." ²⁷ Dra Jaona namaly ho: "Sy afaky mitakasy na ino na ino gny olo raiky raha sy name anazy boaky agny an-dagnisy zay. ²⁸ Handrareo avo dra fa afaky gny vavolombelo amigny zakako ho: 'Sy gny Kristy zaho,' fa koa: 'Nirahiny talohany.' ²⁹ Gny apekary dra anigny papakasy. Dra gny sakaizanigny papakasy, ze misangana vo mitenoa anazy, dra mifaly nohonigny amigny fahareza gny feonigny papakasy. Izay, dra gny mameno gny hafaliako. ³⁰ Sy maisy mitombo Izy, fa izaho koa sy maisy mihena. ³¹ Izy ze boak'agny agnabo dra amboninigny raha aby. Izy ze avy eto atany dra avy eto atany dra mizaka mombanigny eto atany. Ze boaky andagnisy agny dra agnabonigny raha aby. ³² Izy dra mitalily gny gny momba ze hitany vo reo, kanefa dra sy misy mitakasy gny fagnambarany. ³³ Ze nitakasy gny fitalilia koa dra nagnamafy fa mary gny Zagnahary. ³⁴ Fa gny raiky nirahin'Agnahary dra mizaka gny zakan'Agnahary. Akory sy nasiany fetra gny fagnomeza gny Fagnahy. ³⁵ Gny baba tia gny zanadahiny dra nametraky gny raha aby teo apela-tagnany. ³⁶ Ze mino gny zanadahiny dra mana gny fiegna mandrakizay, fa ze sy makato gny zanadahiny koa dra sy hahita fiegna, fa hahazo fahasiaha amin'Agnahary."