¹ Bezalila nanao gny alitara ho agny fagnatisy dora tamy hazo akasia.Zay dra dimy hakiho gny halava dra dimy hakiho gny halavany-efa-joro -dra telo hakiho gny haabony. ² Dra nagnitasy reo zorony efasy hiendriky tahaky gny tandrokagn'omby izy.Gny tandroky dra natambasy raiky tamy alitara, dra nandrakosy anizay tamy varahina izy. ³ Nanao gny fitova aby ho agny alitara izy-vilagny ho agny laveniky,fangaly, kovetabe, sotro vaky, dra vilagny fandesa afo.Nanao reo fitova aby reo tamy varahina izy. ⁴ Nanao makarakara ho agny alitara izy,tohi-vakana varahina ba hapetraky ao ambanigny rindry, teo amy fisasahany ka hatrany amy farany ambany. ⁵ Nandrendriky mason-dravaky efasy ho an'ereo zoro efasy gny makarakara vahira izy, ho fihazogna reo bao. ⁶ Nanao bao taminigny hazo akasia dra nandrakosy reo tamy varahina i Bezalila. ⁷ Nametraky reo bao tamy mason-dravaky teo amin'ereo lafiny alitara izy , ba hitarazo anizay. Nanao gny alitara poak'aty izy, taminigny hazo pisaky. ⁸ Nanao koveta varihina lahibe miaraky amy fitoerany varahiny i Bezalila.Nanao gny koveta tamy fitarasin'ereo ampelany zay nanompo teo amy filira magnao amy lay fihaogna izy. ⁹ Nanao gny kiaza avo koa izy.Reo fefy lamba teo amy lafiny avarasy gny kiaza dra rongony fosy madiniky, zato hakiho gny halavany. ¹⁰ Reo fefy lamba dra nisy sangasangany ropolo, dra faladiany varahiny ropolo.Nisy farango naraikisy tamin'ereo sangasangany, vo teo amy fitohiza volafosy. ¹¹ Tahoky zay koa nagnaraky gny lafiny avarazy, dra nisy fefy lamba zato hakiho gny halavany miaraky amy sangasangany ropolo, faladiany varahina ropolo, farango naraikisy tamin'ereo sangasangany, dra fitohiza volafosy. ¹² Reo fefy lambany lafiny asignana dra dimapolo hakiho gny halavany, miaraky amy sangasangany vo faladiany.Reo farango vo fitohizan'ereo sangasangany dra volafosy. ¹³ Gny kiaza avo koa dra dimapolo hakiho gny halavany ao amy lafiny asignana. ¹⁴ Reo fefy lamba ho agny ankilany filira dra dimy ambiny folo hakiho gny halavany.Misy sangasangany telo miaraky amy faladiany telo reo. ¹⁵ Teo amy andaniny gny filira kiaza avo koa dra nisy fefy lamba dimaplo hakiho gny halavany ,miaraky amy sangasangany telo vo faladiany telo. ¹⁶ Reo fefy lamba aby magnodidy gny kiaza dra natao tamy rongony fosy mandiniky. ¹⁷ Gny faladian'ereo sangasangany dra natao tamy varahina.Reo farango vo reo fitohiza ho an'ereo sangasangany dra natao tamy volafosy, dra gny fandrakofa ho an'ereo tendrony sangasangany avo koa natao tamy volafosy.Reo sangasangany aby dra norakofa tamy volafosy. ¹⁸ Gny lamba teo amy vavahadiny kiaza dra ropolo hakiho gny halavany.Gny lamba dra natao tamy manga, volomparasy, vo rongony jaky, rongony hakiho gny halavany .Zay dra ropolo hakiho gny halavany dra dimy hakiho gny sakany, tahaky reo lambany kiaza. ¹⁹ Nisy faladiany varahina efasy vo farango volafosy zay.Gny fandrakofa ho an'ereo tendrony vo gny fitohizany dra natao tamy volafosy. ²⁰ Gny fihantognany aby ho agny tabernakely vo gny kiaza dra natao tamy varahina. ²¹ Zao gny lisita gny momba gny tabernakely, gny tabernakeliny lalany fanekena, nalany araky reo toromarik'i Mosesy zay.Zay dra asan'ereo Levita teo ambany fitarihan'i Itamara zanadahin'i Arona mpisoro. ²² Bezalila zanadahin'i Ory zanadahin'i Hora, laha tao amy fokon'i Joda, dra nanao gny raha aby ze nandidian'i Yaveh an'i Mosesy. ²³ Ohiliaba zanadahin'i Ahisamaka,laha tao amy fokon'i Dana, dra niasa niaraky tamin'i Bezalila ho mpanao sokitra, ho mpiasa vatany mahay, dra ho mpanao tenona amy manga, volomparasy, vo volonagn'ondry jaky, dra rongony fosy madiniky. ²⁴ Gny volamena aby ze nampiasa tamy tetika'asa aby nifandray tamy toera masy -gny volamena avy amy fagnatisy ahevaheva-dra taleta sivy amby ropolo vo sekely 730, voarefy tamy tamy fenitry gny sekely masy. ²⁵ Gny volafosy nomeny fiangona dra nilaza taleta zato dra sekely 1. 775, araky gny sekely masy, ²⁶ na beka raiky isan'olo. zay asasky gny sekely, voarefy tamy sekely masy.Reo tarahimariky reo dra nahakasiky gny fotony gny olo kirairaiky ze voahiaky tamy fagnisam-bahoaky, reo ropolo tao gny miakasy -dra lelahy 603. 350 gny fitambarany. ²⁷ Taleta volafosy zato gny narendriky ho an'ereo faladiany toera masy vo reo faladiany lamba:faladiany zato, dra taleta raiky isaky gny falafadiany kirairaiky aby. ²⁸ Tamy ambiny sekely volafosy 1.775,dra nanao farango ho an'ereo sangasangany i Bezalila, nandrakosy gny tendron'ereo sangasangany, dra nanao fitohiza ho an'ereo. ²⁹ Gny varahina avy amy fagnatisy ahevaheva dra nilaza taleta 70 dra sekely 2, 400. ³⁰ Tamizay gny nanovany reo faladiany ho agny filira mangnagny amy lay fihaogna, gny alitara varahina, gny makarakara varahiny, gny fitova aby ho agny alitara, ³¹ reo faladiany ho agny kiaza, reo faladiany ho agny filirany kiaza, reo fihatognany aby ho agny tabernakely, dra reo fihatognany aby ho agny kiaza.