¹ I Bezalila vo Oholiaba dra reo olo mana-taleta zauy fa nomen'i Yaveh fahaiza-manao vo fahalakia ba ahafatasy gny fomba fiasa amy fagnamboara gny toera masy dra nanao gny asa arakizay aby nandidian'i Yaveh. ² Nampitokavin'i Mosesy i Bezalila, Ohiliaba, dra reo olo mana-taleta zay nomen'i Yaveh fahaiza-manao, dra ze nataniny fony ho avy ka hanao gny asa. ³ Izy reo dra nandramby reo fagnatisy aby avy tamin'i Mosesy,ze nandesin'ereo Israelita ho amy fagnamboara gny toera masy.Isa-maray dra bo nagnome fagnati-sitrapo ho an'i Mosesy reo olo. ⁴ Koa reo olo mana-taleta aby niasa teo amy toera masy dra niala tamy asany ze nataony. ⁵ Dra nizaka tamin'i Mosesy gny mpanao asa tagna ho:''Ninday mihoasy noho zay ampy amy fanova gny asa ze nandidian'i Yaveh ho ataonay reo olo.'' ⁶ Koa nagnome baiko i MOsesy fa sy tokony hisy hinday fagnatisy amy fagnamboara gny toera masy sasy ao amy toby na raiky avo.Dra nizano ninday fagnomeza reo olo. ⁷ Nana fitova mihoasy noho zay taliavy amy asa aby izy reo. ⁸ Koa dra magnamboasy tabernakely amy lamb vita amy rongony fosy vo manga, volomparasy, vo volonagn'ondry jaky dra miendriky Kerobina reo mpanao asa-tagna aby tao amin'ereo . Zay dra asan'i Bezalila, gny mpanao asa-tagna tena mahay. ⁹ Gny halavany lamba kiraikraiky dra valo ambiny folo hakiho, dra gny sakany dra efasy hakiho.Mitovy habe reo lamba aby. ¹⁰ Natambasin'i Bezalila gny lamba dimy, dra reo dimy hafa dra natambany avo koa. ¹¹ Nanao talimbatrangara manga teo amy farany sisin-damba taminigny sisiny raiky fa voavitrany izy, dra nataony tahaky zay koa sisin-damba taminigny lambahoaniny faharo. ¹² Nanao talimbatrangara dimam-polo tamin'ereo lamba voalohany izy dra dimapolo gny talimbatrangara egny amy amoroni gny lamba faharo voavitrany.Koa reo talimbatrangara dra mifanandrify aby. ¹³ Nanao farango volamena dimam-polo izy dra nakambany niaraky tamizay reo lamba ba hitamba sy ho raiky gny tabernakely. ¹⁴ Nanao lamba vita tamy volon'osy i Bezalila ho gny handrakofa gny tabernakely ;nahavita lamba raiky ambiny folo isa izy. ¹⁵ Gny halavany lamba kirairaiky dra telopolo hakiho, dra gny sakany lamba draiky dra efasy hakiho.Mitovy habe reo lambna raiky ambiny folo reo. ¹⁶ Nakambany kirairaiky reo lamba dimy dra gny enina hafa dra nakambany manoka. ¹⁷ Nasiany talimbatrangara dimapolo tamni'ereo ambin-damba voavitra volohany, dra dimapolo tamin'ereo ambin-damba ze nakambany tamin'ereo lambahoanyny faharo. ¹⁸ Nahavita farango varahina dimapoloo i Bezalila ba hagnamba gny lay ho raiky. ¹⁹ Nagnamboasy fandrakofa vita amy holisinagn'ondry lahy miloko mena ho agny tabernakely, vo fanarogna hafa vita amy holisy ba ho eo agnabony . ²⁰ Dra nagnamboasy rafisy misanga vita amy hazo gny akasia i Bezalila ho amy tabernakely. ²¹ Gny halavan'ereo zana-kazo kirairaiky dra folo hakiho, dra gny sakan'ereo zana-kazo dra raiky gny sasany hakiho. ²² Gny rafiasy kirairaiky aby dra misy zana-kazo ro ba hampikamba anazy reo miaraky.Nataony tahaky anizay avo koa reo rafisy gny tabernakely. ²³ Dra nataony tahaky zao reo rafisy aby ho agny tabernakely:rafisy ropolo ho agny taliaviny asimo. ²⁴ Nanao tombony volafosy efapolo i Bezalila ba atao eo ambanin'ereo rafisy ropolo.Nisy faladiany ro tao ambanigny rafisy raiky ba hampitambasy an'ereo rafisy aby, dra faladiany ro avo koa ambanin'ereo rafisy kirairaiky hafa ba hikambanan'ereo. ²⁵ Dra gny taliaviny faharo gny tabernakely, teo amy taliaviny avarasy , dra nasiany rafisy ropolo ²⁶ vo faladiany volafosy efapolo.Misy faladiany ro ambanigny rafisy volohany, faladiany ro gny ambanigny hazo pisaky magnaraky , ndra tahaky anizay avo. ²⁷ Nagnamboasy rafisy enina i Bezalila ho agny lamosiny tabernakely andrefa . ²⁸ Nasiany rafisy ro egny amin'ereo zorony tabernakely. ²⁹ Reo hazo pisaky reo dra nisaraky aby gny ambany, fa nitambasy tamy mason-dravaky raiky egny antampony.Nataony tahaky anizay gny ro tamin'ereo ho agny zorony ro. ³⁰ Dra nisy rafisy valo,niaraky tamin'ereo faladiany volafosy . Enina ambiny folo gny isan'ereo faladiany, faladiany ro ambanigny rafisy volohany , faladiany ro ambanigny rafisy magnaraky, dra tahakly anizay hatragny. ³¹ Nanao bara vita amy hazo akasia i Bezalila-dimy ho agny rafisy gny taliaviny tabernakely, ³² bara dimy ho agny rafisy amy taliaviny tabernakely hafa, dra bara dimy ho agny rafisy ao andamosiny tabernakely miagnandrefa . ³³ Nataony teo agnevon'ereo rafisy gny bara , zay ho,antegnategnany agnabony, ba hahatrara gny farany ro. ³⁴ Nofognasany volamena reo rafisy ro.Nagnamboasy gny mason-dravakin'ereo tamy volamena izy, ba hampiasa hitana an'ereo bara, dra nisaromany tamy volamena reo bara. ³⁵ Koa dra nagnamboasy lamba vita amy rongony fosy vo manga, volomparasy, vo volonagn'ondry jaky dra miendriky Kerobima, zay asany mpanao asa-tagna za-drahara i Bezalila. ³⁶ Nagnamboasy andry vita amy hazo akasia izy, dra nisaromany volamena reo .Nanao farangom-bolamena ho an'ereo andry avo koa izy , dra nenefy faladiany volafosy efasy ho an'ereo. ³⁷ Nagnamboasy fefy lamba ho agny filira amy lay izy .Natao tamy manga , volomparasy , dra volonagn'ondry jaky, taminigny fampiasa rongony fosy madiniky zay, ze asany mpanao peta-kofehy. ³⁸ Nagnamboasy fefy lamban'ereo andry dimy tamy farango avo koa izy .Nisaromany volamena gny tampon'ereo vo reo fihatognany.Reo faladiany dimy dra natao tamy varahina.