¹ Noho izay, zaho, amigny maha gadra ho anigny Topo anahy, dra mapirisiky andrareo ba handeha apamendreha amigny aso ze nitokava andrareo. ² Mapirisiky andrareo zaho ba hana fanetre-tegna lahibe vo fahasora dra fahareta, mifandefisy amigny fitiava. ³ Manova ze faranigny herinao ba hitehiriza gny findresanigny fagnahy amigny fehinigny fihavana. ⁴ Raiky avo gny vata dra raiky avo gny fagnahy, manahaky gny nitokava andrareo tao amigny fanatenanigny fitokava andrareo ho raiky avoko. ⁵ Raiky avo koa gny Topo, raiky gny finoa, raiky gny batisa, ⁶ raiky avokoa Zagnahary vo gny ranigny maro, ze agnabonigny raha aby vo amigny alalanigny raha aby zay. ⁷ Isika sirairay aby dra name fahasoava araky gny habenigny fagnomezan'i Kristy. ⁸ Araky gny zakanigny Sorasy Masy ho: "Gny fa niakasy tagny amigny abo Izy, dra ninday reo babo ho amigny fahababoa, dra nanolosy fagnomeza ho anigny vahoaky Izy." ⁹ Ino gny hevisy gny ho: "Niakasy Izy", raha sy ho nozoso tagny amigny farisy ambaninigny tany avo koa Izy? ¹⁰ Izy gny nizoso gny olo niakasy ambony tagny andagnisy, ba afahany mameno gny raha aby. ¹¹ Kristy dra nanolosy gny ilany ho apostoly, gny ilany ho paminany, gny ilany ho evazelista, dra gny ilany ho pasitera vo papianasy. ¹² Nagnome reo asa reo Izy ba hagnapia reo vahoaky masy ho amigny asa fanopoa, amigny fagnoregna gny vatan'i Kristy. ¹³ Manohy magnory gny vatany Izy mandra-pahatrarasika aby gny firesa-pinoa vo gny faheza gny Zanak'Agnahary, dra ba hahavy asika ho matosy dra ba hahatrasy gny habenigny fahafenon'i Kristy. ¹⁴ Magnory asika Kristy ba sy hanahaky gny zaza ze akopakopanigny oza sasy isika, dra sy handesin'drivosy gny fapenara vo gny hafesen'ireo olo amigny tetiky feno fitaky. ¹⁵ Fa isika koa, amigny filaza gny fahamarigna amigny fitiava, dra tokony hitombo amigny fomba aby ao amin'Izy ze loha, zany ho, Kristy. ¹⁶ Kristy dra mananga gny zaka aby, dra nakambany vo natambany tamigny isatognony zay, vo gny fa miasa miaraky reo, dra mahavy gny vatany hitombo ba hapiory gny vatany amigny fitiava. ¹⁷ Noho izay, dra mizaka vo manindry fatrasy anizay ao amigny Topo zaho, ba sy hiay manahaky gny Jentilisa sasy handrareo, amigny fahafoagnanigny fisaignan'ereo. ¹⁸ Mezy gny fahezan'ereo, tafasaraky amigny fiaignan'Agnahary nohonigny sy faheza ao amin'ereo, nohonigny fahamafisa-pon'ereo. ¹⁹ Sy mahay megnasy ereo vo manolosy gny vatan'ereo ho amigny filanigny nofo, dra manohy manao anizao karaza-pahalotoa aby zao. ²⁰ Fa sy zay gny fomba niegnandrareo gny momban'i Kristy. ²¹ Inoako fa nahare gny momba Anazy handrareo, dra napenariny taminazy ao, akory gny fahamarigna dra ao amin'i Jesosy. ²² Napenariny handrareo ba hagnary gny fomba fiegnandrareo taloha, ba hagnary toera taloha. Gny toetra taloha ze sola nohonigny fitaky gny filany. ²³ Napenary handrareo ba hihavao ao amigny fanahinigny saindrareo, ²⁴ vo hekazo gny olom-baovao ze nihareny araky gny endrin'Agnahary _ ao amigny tena fahamarigna vo fahasigna. ²⁵ Noho izay, elao gny vandy, dra aoky gny sirairay amindrareo hifapizaka gny mary amigny namany, akory samy isanigny rasanigny maro isiky. ²⁶ Miteza fa za manota. Ka anga ho trasinigny masoandro moly gny fahasiahanao. ²⁷ Ka magnome hiriky ho anigny devoly. ²⁸ Ze nangalasy dra sy tokony hangalasy sasy koa. Sy maisy miasa izy, manao asa soa amigny tagnany, ba hanagnany raha ho zara ho anireo ao agnatinigny sy fahapia. ²⁹ Ka anga hisy zaka maloto hiboaky boaky amigny vavandrareo. Mapesa zaka ze taliavy amigny fondrareo gny hafa, araky ze taliavin'ereo, ba tena hagnapy reo ze miteno andrareo gny zakandrareo. ³⁰ Dra ka mapalahelo gny Fagnahy Masin'Agnahary, fa avy aminazy gny nanova tombo-kase andrareo ho amigny andronigny fagnavota. ³¹ Ialao gny olo-po aby, haromota, gny fahasiaha, gny fifamalia, vo gny fifapzan-drasy, miaraky amireo karazan'asa rasy aby. ³² Managna fahaleme-pagnahy amigny sirairay aby, fahasora-po, mifamela heloky, manahaky gny namelan'Agnahary andrareo tao amin'i Kristy.