¹ Noho izay, zaho Paoly, dra gadran'i Kristy Jesosy ho andrareo Jentilisa. ² Ataoko fa nahare gny fitatara gny fahasoavan'Agnahary ze name anahy ho andrareo handrareo. ³ Manorasy araky gny fagnambara napahafatary anahy zaho. Zay gny mary sihita momba ze nisoratiko tamindrareo. ⁴ Gny fa mamaky anizay handrareo, dra ho afaky gny hahazo gny fomba fahazoako anizay mary sihita momban'i Kristy zay. ⁵ Tamireo taranaky hafa dra sy natao fatasy gny zanak'olombelo zay mary zay. Fa amizao koa zay dra zinaka tamigny alalanigny fagnahy tamireo Apostoly vo reo paminany ze voatoka ho amity asa tihoky. ⁶ Izay mary sita zay dra mizaka fa reo Jentlisa dra mindray mandova, vo piara-miombo amigny vata, dra mizara gny fapanatena ao amin'i Kristy amigny alalanigny filazasara ereo. ⁷ Fa lasa panopon'izay filazasara izay zaho tamigny fahasoavan'Agnahary name anahy tamigny alalanigny fiasanigny heriny. ⁸ Namen'Agnahary anahy zay fagnomeza zay, na dre zaho aza gny farany masaiky amireo olo-masin'Agnahary. Zay fagnomeza zay dra gny ba hitoriako amireo jetilisa gny filazasaranigny haren'i Kristy saro-kasahy. ⁹ Gny fagnomeza-pahasoavan'Agnahary ho anahy dra gny hindesako fagnazava amigny olon'aby gny fandaharan'Agnahary. Io fandahara io dra navonin'Agnahary, gny nahary gny raha aby, nandrisy gny tao maro taloha. ¹⁰ Napahafatary tamigny fengona zay fandahara zay ba hahavy reo panapaky vo reo mana-pahefa agny an-dagnisy hahay gny toetra amigny fahendren'Agnahary. ¹¹ Nitranga araky gny fandahara mandrakizay ze taterany tao amin'i Kristy Jesosy Toposika zay. ¹² Fa ao amin'i Kristy gny anagnasika fahasakia vo lala apahatokia nohonigny finoasika Anazy. ¹³ Noho izay mengavy andrareo zaho ba sy ho kivy nohonigny fizaliako ho andrareo, ze voninahindrareo. ¹⁴ Noho izay dra mandohaliky eo agnatrehanigny Ray zah, ¹⁵ ze nagnome andrareo gny fianakavia agny an-dagnisy aby vo eto atany. ¹⁶ Mivavaky zaho ba hagnomezany andrareo, araky gny harenigny voninahiny, b ahatazaky amin-kery amigny alalanigny Fagnahy Masy, ze ao amindrareo. ¹⁷ Mivavaky zaho ba hitoby ao apondrareo amigny finoa Kristy, ba hifotosy vo hiory ao amigny fitiavany handrareo. ¹⁸ Hahazo hery anie handrareo dra ho afa-mahatakasy, miaraky amireo pino aby, gny sakany, gny halavany, gny haabony, dra gny halaliny, ¹⁹ dra ba hahay gny fitiavan'i Kristy, ze mihoasy gny fahezan'aby, dra ba ho fenonigny fahafenoan'Agnahary aby handrareo. ²⁰ Dra ho anazy ze mahavita manao mihoasy ze angatahisika aby na eriserisika, araky gny hery ze miasa ao agnatisika, ²¹ ho anazy gny voninahisy ao amigny fengona dra ao amin'i Kristy Jesosy hatramigny taranaky aby mandrakizay doria. Amena.